မေ ၁၂၊၂၀၂၅။ထားမြတ်/People’s Spring
ကျောင်းသားကလေးငယ်များနှင့် ဆရာမ စုစုပေါင်း ၂၂ဦး သေဆုံးကာ ၄၀ဦးကျော် ဒဏ်ရာရရှိခဲ့သည့် စစ်ကိုင်းတိုင်း၊ ဒီပဲယင်းမြို့နယ် အိုးထိန်းတွင်းရွာ လေကြောင်းတိုက်ခိုက်မှု အပါအဝင် စာသင်ကျောင်းများကို စစ်ကောင်စီ ပစ်မှတ်ထားတိုက်ခိုက်ခြင်းနှင့်ပတ်သက်ပြီး အမျိုးသားညီညွတ်ရေးအစိုးရ(NUG)၏ ပညာရေးဝန်ကြီးဌာနက ယနေ့(မေ ၁၂ရက်) ထုတ်ပြန်ခဲ့ရာ စစ်ကောင်စီ၏ လုပ်ရပ်အပေါ် နိုင်ငံတကာက ထိရောက်စွာ အရေးယူရန် တာဝန်ရှိကြောင်း ဖော်ပြသည်။
ယနေ့ (မေလ ၁၂ရက်) နံနက်တွင် အိုးထိန်းတွင်းရွာ စာသင်ကျောင်းကို စစ်ကောင်စီက လေကြောင်း တိုက်ခိုက်ခဲ့ခြင်း ဖြစ်သည်။
အပြစ်မဲ့သော ကလေးသူငယ် ကျောင်းသား၊ ကျောင်းသူများ၊ ဆရာ၊ဆရာမများကို လေကြောင်းမှ တိုက်ခိုက် ရန် အမိန့်ပေးသူများ၊ ပြစ်မှုကို ကာယံမြောက်ကျူးလွန်သူများ၊ ပူးပေါင်းပါဝင်သူများအားလုံးကို ထိုက်ထိုက်တန်တန် အရေးယူအပြစ်ပေးသွားမည်ဖြစ်ကြောင်း ပညာရေးဝန်ကြီးဌာနက ဖော်ပြပြီး မည်သည့်အကြောင်းကြောင်းကြောင့်မှ ပြစ်ဒဏ်ကင်းလွတ်ခွင့် မရှိစေရေး ကမ္ဘာကြေသော်လည်း ဥဒါန်းကျေမည်မဟုတ်ဘဲ ပြင်းထန်စွာ အပြစ်ပေးအရေးယူနိုင်ရေး စုံစမ်းရှာဖွေ ဖော်ထုတ်သွားမည်ဟု ထုတ်ပြန်သည်။
Public Service Announcement
နိုင်ငံတကာအသိုင်းအဝိုင်းအနေဖြင့်လည်း ထိရောက်အကျိုးရှိသော တားဆီးအရေးယူမှုများကို ဆောင်ရွက်ပြီး ကလေးငယ်များအတွက် လုံခြုံစွာပညာသင်ယူခွင့်နှင့် ဘေးကင်းလုံခြုံသောကျောင်းများ ပေါ်ပေါက်လာရေး အားဖြည့်ပံ့ပိုးရန် တာဝန်ရှိကြောင်း ကြေညာချက်၌ ပါရှိသည်။
ကလေးငယ်များအပါအဝင် မြန်မာပြည်သူများအား သတ်ဖြတ်နေသည့် စစ်ကောင်စီ၏ လုပ်ရပ်အား ကမ္ဘာက လျစ်လျူရှုပစ်ထားကြောင်း တအာင်းတပ်မတော်(TNLA) အထွေထွေအတွင်းရေးမှူးချုပ် ဗိုလ်ချုပ်တားဘုန်းကျော်က အိုးထိန်းကွင်းရွာ လေကြောင်း တိုက်ခိုက်ခံရမှု သတင်းကို မျှဝေပြီး ရေးသားထားသည်။
” ကမ္ဘာကြီးရေ နှာစေးတာ ကြာလှချေရဲ့၊ ဘယ်အချိန်ထိ လျစ်လျူရှုပစ်ထားမှာလဲလေ။ အမျိုးတို့ရေ အလုပ်တွေ ပိုတိုး၀ိုင်းလုပ်ကြပါအုံး”ဟု ဗိုလ်ချုပ်တားဘုန်းကျော်က ရေးသားထားသည်။
ယခု စစ်ကောင်စီ လေကြောင်းတိုက်ခိုက်ခဲ့သည့် အိုးထိန်းတွင်းရွာ စာသင်ကျောင်းသည် NUG ပညာရေးဝန်ကြီးဌာန၏ ကြားကာလ ပညာရေးစနစ်ဖြင့် ဒေသခံ ကျောင်းသား၊ကျောင်းသူများကို ပညာသင်ပေးနေသည့် ကျောင်းဖြစ်သည်။
စစ်ကောင်စီသည် ငလျင်ဘေးကြောင့် အပစ်ရပ်စဲကြောင်း ကြေညာထားသော်လည်း စစ်ကိုင်းတိုင်း၊ မန္တလေးတိုင်းအပါအဝင် နိုင်ငံတဝန်း ပြည်သူများ အစုလိုက်၊အပြုံလိုက်သေဆုံးစေခဲ့သည့် လေကြောင်း တိုက်ခိုက်မှုများကို ဆက်တိုက်ကျူးလွန်လျက်ရှိသည်။
