မေ-၁၂၊၂၀၂၅။ကဖေး၊ဇေအောင်/People’s Spring
ဒီပဲယင်းမြို့နယ်၊အိုးထိန်းတွင်းရွာစာသင်ကျောင်းအား စစ်ကောင်စီတပ်ကတိုက်လေယာဥ်ဖြင့်ဗုံးကြဲရာတွင် ကျောင်းသား၊ကျောင်းသူ ၂၀ ဦး နှင့် ဆရာမ ၂ဦး စုစုပေါင်း၂၂ ဦးသေဆုံးပြီး ၄၀ဦးခန့်ဒဏ်ရာရကြောင်းဒီပဲယင်းမြို့နယ်ပြည်သူ့အုပ်ချုပ်ရေးအဖွဲ့ကထုတ်ပြန်သည်။
အိုးထိန်းတွင်းရွာအလယ်တန်းကျောင်းကိုမေလ ၁၂ရက် နံနက် ၁၀နာရီဝန်းကျင်တွင် စစ်ကောင်စီက လေကြောင်းမှ ပေါင် ၅၀၀ ဗုံးတစ်လုံးဗုံးကြဲခြင်းဖြစ်သည်။
ကျောင်းကို ဗုံးကြဲခံရပြီးနောက် ပိုင်ရှင်မဲ့သွားသော လွယ်အိတ်လေးများနှင့် မြင်ကွင်း / သေဆုံးခဲ့သော ကျောင်းသားကျောင်းသူများ၏ အမည်စာရင်း။ဓါတ်ပုံ-ဒီပဲပင်းပကဖ 
ကျောင်းကို ဗုံးကြဲခံရပြီးနောက် ပိုင်ရှင်မဲ့သွားသော လွယ်အိတ်လေးများနှင့် မြင်ကွင်း / သေဆုံးခဲ့သော ကျောင်းသားကျောင်းသူများ၏ အမည်စာရင်း။ဓါတ်ပုံ-ဒီပဲပင်းပကဖ
“တိုက်ခိုက်ခံရမှုဖြစ်စဉ်တွင်ကျောင်းသားကလေးငယ်နှင့် အမျိုးသမီး စုစုပေါင်း(၂၂)ဦးပွဲချင်းပြီးသေဆုံးပြီး အရေးပေါ် ဆေးကုသမှုခံယူရသူ ၄၀ ခန့် ရှိသည်ဟု အတည်ပြုကြောင်း ဒီပဲယင်းမြို့နယ်ပြည်သူ့အုပ်ချုပ်ရေးအဖွဲ့ကယနေ့ညနေ၅ နာရီခန့်တွင်ထုတ်ပြန်သည်။
Public Service Announcement
Grade 2 မှ Grade 11ကြားကျောင်းသူ ၁၅ဦး၊ ကျောင်းသားငါးဦး နှင့် ဆရာမ ၂ ဦးသေဆုံးခဲ့ခြင်းဟုသတင်းရရှိသည်။ ဒဏ်ရာရရှိသူများ၏အခြေအနေကို အသေးစိတ်မသိရှိရသေးပေ။
“၅နှစ်၊ ၆နှစ်ကလေးတွေပါတယ်။တချို့ကလေးတွေဆိုဒဲ့မှန်လိုက်တော့ ကျနော်ကိုယ်တိုင်ပဲလိုက်ကောက်တာ ခန္ဓာကိုယ်ရှာမတွေ့တော့ဘူး။ခြေထောက်ပဲတွေ့တယ်”ဟု ဒေသခံတဦးကပြောသည်။
ထို့အပြင် ထိခိုက်ဒဏ်ရာရပြီး အရေးပေါ် ဆေးကုသမှုခံယူရသူ အရေအတွက်မှာ(၄၀)ခန့် ရှိနေကြောင်း ဒီပဲယင်းမြို့နယ်ပြည်သူ့အုပ်ချုပ်ရေးအဖွဲ့က အသိပေးသည်။
“စာသင်ကျောင်းတည့်တည့်ပေါ်ကျတာ။ တအိမ်ထဲက ကလေးနှစ်ယောက်ဆုံးရှုံးသွားသူတွေရှိတယ်။”ဟု ဒေသခံတဦးက ပြောသည်။လေကြောင်းတိုက်ခိုက်ခံရပြီးနောက်တရွာလုံးထွက်ပြေးတိမ်းရှောင်နေရသည်။
အဆိုပါစာသင်ကျောင်းသည် အမျိုးသားညီညွတ်ရေးအစိုးရ (NUG ) ၊ပညာရေးဝန်ကြီးဌာန၏ကြားကာလပညာရေး စနစ်ဖြင့် ဒေသခံကျောင်းသား၊ကျောင်းသူများကိုပညာသင်ကြားပေးနေသောကျောင်းဖြစ်သည်ဟု သိရသည်။
ဒီပဲယင်းမြို့နယ်တွင် ပြီးခဲ့သည့်၂၀၂၂ ခုနှစ် စက်တင်ဘာလ ၁၆ ရက်ကလည်း လက်ယက်ကုန်းကျေးရွာစာသင်ကျောင်းကို စစ်တပ်က လေကြောင်းတိုက်ခိုက်ခဲ့ရာ ကျောင်းသားကျောင်းသူ ၆ ဦးအပါအဝင် ၁၃ ဦးသေဆုံးခဲ့ကာ ၂၇ ဦး ဒဏ်ရာရရှိခဲ့သေးသည်။
စစ်ကောင်စီသည် စစ်ကိုင်းငလျင်ကြီးနောက်ပိုင်း လေကြောင်းတိုက်ခိုက်မှုပိုဆိုးပြင်းထန်စွာ ပြုလုပ်နေပြီး စစ်ကိုင်းနှင့် မန္တလေးတိုင်းတွင် ရက်ပိုင်းအတွင်း နေ့စဥ် ပြည်သူဆယ်ချီ သေဆုံးနေသည်။
