ဧပြီ၂၁၊၂၀၂၅။ရဲခေါင်/People’s Spring
ကရင်နီပြည်နယ်သို့ တပ်ကူလာသည့် ရှမ်းပြည်တောင်ပိုင်း၊ မိုင်းပွန်မြို့နယ်အခြေစိုက် ခမရ(၅၁၇) တပ်ရင်းမှ တပ်သားသစ်နှစ်ဦး အလင်းဝင်လာကြောင်း ကရင်နီဒီမိုကရက်တစ်တပ်ဦး(KDF)မှ တာဝန်ရှိသူက လူထုနွေဦးသို့ ပြောသည်။
ဧပြီ ၁၉ ရက်က လွိုင်ကော်မြို့နယ် ဒေသခံပြည်သူကာကွယ်ရေးတပ်ထံသို့ ရှမ်းပြည်နယ်တောင်ပိုင်း မိုင်းပွန်မြို့နယ်အခြေစိုက် ခမရ(၅၁၇)တပ်ရင်းမှ စစ်ကောင်စီတပ်သား နှစ်ဦးသည် လက်နက်မဲ့ အလင်းဝင်ရောက် ပူးပေါင်းလာခဲ့ခြင်းဟု ဆိုသည်။
“ကရင်နီကို တပ်ကူလာရတယ်လို့ သိထားပါတယ်။နဂိုကတည်းကတော့ အလင်းဝင်ဖို့ ကျွန်တော်တို့နဲ့ ချိတ် ဆက်ထားတာပေါ့။လက်နက် ယူမလာနိုင်ဘဲ လူဘဲအရင်ထွက်လာနိုင်ခဲ့တဲ့အနေအထား ဖြစ်သွားရတယ်”ဟု အထက်ပါ တာဝန်ရှိသူက အလင်းဝင်လာသည့် အဓမ္မပြည်သူ့စစ်မှုထမ်းရသူနှစ်ဦး၏ အခြေ အနေကို ရှင်းပြသည်။
Public Service Announcement
အလင်းဝင်လာသူနှစ်ဦးသည် စစ်ကောင်စီ၏ စစ်မှုထမ်း အပတ် စဉ်(၅)၊(၆) သင်တန်းဆင်းဖြစ်ပြီး စစ်မှုထမ်းဥပဒေထုတ်ပြန်ပြီးနောက် ဖမ်းဆီးခြင်းခံခဲ့ရကာ အတင်းအဓမ္မလူသစ်စုဆောင်းခံခဲ့ရသူများဟု KDFက အသိပေးသည်။
အလင်းဝင်ခိုလှုံလာသော တပ်သားများအား လုံခြုံသောနေရာတွင် ထားရှိထားပြီးဖြစ်ကာ အဆိုပါတပ်သားများအား နွေးထွေးစွာကြိုဆိုကြောင်းနှင့် တပ်သားများ၏ ဆန္ဒအလျောက် လွတ်လပ်စွာ ရွေးချယ်ခွင့်များကို အလေးပေးဆောင်ရွက်နေကြောင်းလည်း ဖော်ပြသည်။
ယခုနှစ် ဇန်နဝါရီ ၂၉ရက်ကလည်း ဘောလခဲမြို့အခြေစိုက် ခမရ(၄၂၉)တပ်ရင်းမှ စစ်ကောင်စီတပ်သားလေးဦးသည် လက်နက် ၃လက်နှင့် အတူ KDFထံ အလင်းဝင်ရောက်ခဲ့သည်။
ကရင်နီပြည်နယ်၌ စစ်ကောင်စီတပ်တွင် အဓမ္မစစ်မှုထမ်းရသူများအနက် အလင်းဝင်ဘက်ပြောင်းလာသူ ရာနှင့်ချီရှိကြောင်း ကရင်နီအမျိုးသားများကာကွယ်ရေးတပ်(KNDF)တာဝန်ရှိသူက လူထုနွေဦးသို့ ပြောထားသည်။
