“အကျိုးစီးပွါး၊ ရပ်တည်ချက်နဲ့ အမြော်အမြင်”

မသီတာစမ်း​ချောင်း​ ရေးသားသည်

ကမ္ဘာကြီးမှာ နိုင်ငံအသီးသီးဟာ ကိုယ်ကျိုးစီးပွါးကို အခြေခံတဲ့ ရပ်တည်ချက်တွေကို ဦးစားပေးလာကြပြီး ကမ္ဘာကြီးတခုလုံးရဲ့ တည်ငြိမ်တိုးတက်ရေးအကျိုးစီးပွါးအလို့ငှာ အမြော်အမြင်တွေကို မျက်ကွယ်ပြုလာကြပါတယ်။ ဒီတော့ ကမ္ဘာသူ ကမ္ဘာသား အာဏာမဲ့များအဖို့ အားပေးထောက်ခံမှုနဲ့ ပြစ်တင်ရှုံ့ချမှုတွေကို လုပ်ဖို့ အင်မတန် ခက်ခဲတဲ့ အဆုံးအဖြတ်တွေ ချလာကြရပါတယ်။

ဂါဇာအရေးမှာ ဟားမတ်စ်ကို လက်ခံဖို့ ခက်ကြသလို နေတန်ညာဟူးအစိုးရရဲ့ စစ်ဆင်ရေးတွေကလည်း အကြမ်းဖက်မှု အလွန်အကျွံများတာမို့ ကျန်ကမ္ဘာသူ/သားတွေအတွက် ဘယ်လိုရပ်တည်အားပေးရမယ်ဆိုတာဟာ စိန်ခေါ်မှုလို ဖြစ်ခဲ့ပါတယ်။ အထူးသဖြင့် နိုင်ငံအစိုးရအသီးသီးအတွက် ခက်ခဲခဲ့တာပေါ့။ ပဋိပက္ခဖြစ်နေတဲ့ ဘက်နှစ်ဘက်မှာ အားနည်းချက်ကိုယ်စီ ရှိနေကြတဲ့အခါ ကျန်သူတွေဟာ ခိုင်မာတဲ့ လူသားဆန်မှုမူဝါဒတွေ၊ အကြမ်းမဖက် ပြဿနာဖြေရှင်းရေးအမြော်အမြင်တွေကို ကိုင်စွဲဖို့ထက် ကိုယ်ကျိုးစီးပွါးကို အခြေခံတဲ့ ရပ်တည်မှုတွေကိုပဲ ရွေးချယ်တတ်ကြပါတယ်။ ဒီလိုနဲ့ အမေရိက၊ ဥရောပအစိုးရတွေက အစ္စရေးအစိုးရဘက်ကို ရွေးချယ်ပြီး လူထုအများစုကတော့ ပါလက်စတိုင်းလူထုဘက်ကို စာနာမှုတွေ ပေးကြပါတယ်။

အခု အမေရိကနဲ့ တရုတ်ရဲ့ ကုန်သွယ်စီးပွါးစစ် ဖြစ်လာတဲ့အခါမှာလည်း ကမ္ဘာ့နိုင်ငံအစိုးရများရော လူထုတွေပါ ရွေးရခက်ကြီး အနေအထားကို ရောက်လာတာမို့ နောက်ဆုံးမှာ ကိုယ်ကျိုးစီးပွါးကို အခြေခံတဲ့ ရပ်တည်ချက်ကိုပဲ ရွေးချယ်လာကြပါတယ်။ အမေရိကရွေးကောက်ပွဲမှာကတည်းက အမေရိကန်လူထုဟာ ဒီမိုကရေစီစံချိန်စံညွှန်းတွေ ဆက်လက်ထိန်းသိမ်းနိုင်ဖို့နဲ့ ကမ္ဘာ့သိက္ခာရှိနိုင်ငံအဖြစ် ဆက်လက်ရပ်တည်ဖို့ဆိုတဲ့ အမြော်အမြင်ထက် တစ်ဦးချင်း၊ တစ်စုချင်းရဲ့ ကိုယ်ကျိုးစီးပွါး ကာကွယ်နိုင်ဖို့ကို ဦးစားပေးခဲ့ကြတာမို့ ရာဇဝတ်သားကိုတောင် စီးပွါးရေးပြန်ကောင်းလာအောင် လုပ်နိုင်မယ့်သူ၊ အမျိုး-ဘာသာကို စောင့်ရှောက်နိုင်မယ့်သူအဖြစ် ယုံကြည်ပြီး ရွေးချယ်ခဲ့ကြပါတယ်။

Public Service Announcement

ကိုယ်ကိုယ်တိုင် ပြောင်းရွှေ့အခြေချခဲ့ရာက နိုင်ငံသားဖြစ်လာခဲ့ရတဲ့ မြန်မာပြည်ဖွား တိုင်းရင်းသားတွေထဲမှာတောင် ဒီလိုသဘောထားနဲ့ လက်ရှိရာဇဝတ်သားသမ္မတကို ရွေးခဲ့ကြပါတယ်။ ရာဇပလ္လင်ပေါ် ရောက်ကတည်းက ရမ်းကားလာတာမှာ သူတို့ မျှော်လင့်ထားသလို မဟုတ်ဘဲ စီးပွါးရေး၊ နိုင်ငံရေး၊ အုပ်ချုပ်ရေးတွေ ကမောက်ကမ ဖြစ်လာတဲ့တိုင် ကိုယ့်ရွေးချယ်မှု မမှားကြောင်း သူများကိုရော ကိုယ့်ဘာသာကိုပါ သက်သေပြဖို့အတွက် ကြိုးစားလာကြပါတယ်။ အဲဒါကတော့ အမေရိကန်တွေအတွက်ရော မြန်မာတွေအတွက်ပါ ဘုံရန်သူလို ယူဆထားတဲ့ တရုတ်ကို နှိမ်နင်းအနိုင်ယူပေးနိုင်မယ့်သူမို့ ထောက်ခံနေရတာပါဆိုတဲ့ ဇာတ်ကြောင်းပြောပါပဲ။

ဖြစ်ရပ်တွေမှာ အကြောင်းရင်း၊ ဦးတည်ရာကောင်းကျိုး၊ ဘေးထွက်ဆိုးကျိုး စတဲ့ အကြောင်းရပ်တွေ အများအပြား ရှိပေမဲ့ အဲဒါတွေကို ခြုံငုံသုံးသပ်ပြီးမှ ဆုံးဖြတ်ဖို့ထက် “ရန်-ငါ”ဆိုတဲ့ ကိုယ်ကျိုးစီးပွါးအခြေခံ အဆုံးအဖြတ်ပေး၊ ရပ်တည်ပေးဖို့ကို ရွေးချယ်လာကြတာပါ။ ရာဇဝတ်သားသမ္မတကြီး ရမ်းကားနေတာကို သိပေမဲ့ ငါတို့ရဲ့ ရန်သူတော် တရုတ်ကို ဖိုက်ပေးနေတာမို့ ထောက်ခံရမယ်လို့ တွေးတာဟာ ဒီသဘောပါပဲ။ တကယ်လည်း လူတစ်ဦးချင်းစီအတွက်ရော နိုင်ငံအစိုးရအဆင့်တွေမှာပါ အားနည်းချက်တွေ ပြည့်နေတဲ့ အမေရိကလူမိုက်နဲ့ အမြဲလို တကိုယ်ကောင်းဆန်နေဆဲ တရုတ်ကြား ဘယ်သူ့ကို အားပေးသင့်လဲဆိုတဲ့ အဆုံးအဖြတ်ဟာ ခက်ခဲပါတယ်။ (ဘယ်အရေးအရာတွေမှာ ဘယ်သူ့ရဲ့ ဘယ်လုပ်ဆောင်ချက်တွေကိုပဲ အားပေးသင့်လဲဆိုတာမျိုး မတွေးကြတာလည်း ပါတာပေါ့)

နည်းနည်းပိုကောင်းတဲ့သူကိုပဲ ရွေးချယ်ခွင့် ရှိနေသလို အနေအထားမျိုးဟာ လတ်တလော ကမ္ဘာ့နိုင်ငံရေး အခင်းအကျင်းပါပဲ။ ရာဇဝတ်သားသမ္မတကြီးက ကုန်သွယ်စီးပွါးစစ်ကို တရုတ်အပေါ် ဦးတည်ပေမဲ့ တကမ္ဘာလုံးကိုပါ ပတ်ရမ်းလိုက်တဲ့အခါ ပညာရှင်အချို့က ‘မစ်ကီးမောက်စ်ကာတွန်းဇာတ်ကောင်’လောက်တောင် စီးပွါးရေးပညာကို နားမလည်ဘဲ လျှောက်လုပ်နေတယ်လို့ ဝေဖန်ကြပါတယ်။ ဒါပေမဲ့ သူ့ကို သမ္မတအဖြစ် ရွေးခဲ့တဲ့ သူ့ပါတီကအမတ်တွေအပါအဝင် အာဏာလက်ဝယ်ရှိနေတဲ့ သူ့လူအများစုကတော့ “မကြာခင် ရွှေဘ နိုင်မှာပါ”ဆိုတဲ့သဘောထားနဲ့ သွေးအေးနေကြဆဲပါပဲ။ တကယ်တော့ အမေရိကန်လူထုမှာ တရုတ်ကို စီးပွါးပြိုင်ဖက်အဖြစ်ထက် ဘုံရန်သူအဖြစ် မုန်းတီးနေတဲ့စိတ်အခံ ရှိနေသလို ငါတို့က ပိုမြင့်မြတ်စွာ နေထိုင်ကျင့်ကြံခဲ့သူတွေပါဆိုတာမျိုး ခံယူထားကြတာ ရှိနေပါတယ်။ တရုတ်ကို ၂၀ ရာစုတုန်းက အနေအထားအတိုင်း ရှိနေသေးတယ်လို့ ထင်မြင်နေကြဆဲလည်း ဖြစ်ပါတယ်။

အဲဒီလိုပဲ ဥရောပနိုင်ငံအများစုကလည်း အလားတူ စဉ်းစားမှု ရှိခဲ့ဖူးပါတယ်။ ဒါပေမဲ့ (ရုရှကို ဘယ်နည်းနဲ့မှ အနိုင်မပေးချင်တဲ့) ဥရောပဟာ ရမ်းကားအခွန်မြှင့်စီမံကိန်းကြီး စတဲ့အခါ အမေရိကကို စိတ်နာလာရာက တရုတ်ကို ရန်သူလို သဘောမထားတော့ဖို့ စတွေးလာပါတယ်။ တကယ်တော့ သူ့ကိုယ်ကျိုးစီးပွါးအတွက် ပိုပြီး ဦးစားပေးလာတဲ့သဘောပေါ့။ ကမ္ဘာမှာ လူ့ရပိုင်ခွင့်စံချိန်စံညွှန်းတွေကို ဦးစားပေးပါတယ်လို့ နာမည်သိက္ခာရှိတဲ့ ဥရောပထဲမှာလည်း ကိုယ်ကျိုးစီးပွါးကို ဦးစားပေးဖို့ ဆော်ဩတဲ့ ပါတီတွေ လူကြိုက်များလာ၊ အာဏာရလာတဲ့ ဥရောပနိုင်ငံတွေ များလာတာပါပဲ။

ရေရှည်စီးပွါးရေးအမြော်အမြင်ရယ်လို့ တိတိပပ မရှိနေဘဲ တရုတ်ကို အနိုင်ရလိုဇောတစ်ခုတည်းနဲ့ ယူကရိန်းအရေးမှာလည်း ရုရှကို ချွေးသိပ်နိုင်မယ်လို့ သူ့ကိုယ်သူ ထင်ပြီး နိုင်ငံရေးကစားဖို့ ကြိုးစားတဲ့ အမေရိကရဲ့ အဖြစ်ကတော့ ကမ္ဘာ့နိုင်ငံတွေရဲ့ လေးစားမှု ဆုံးရှုံးသွားတာကို ငြင်းမရပါဘူး။ ဒါ့အပြင် ကိုယ် ထုတ်ပြန်ခဲ့တာတွေကို ကိုယ့်ဘာသာ ပြန်ရုပ်သိမ်းရ၊ ရပ်ဆိုင်းရနဲ့ ဖြစ်ရတာတွေကြောင့်လည်း အရှက်ရစရာ ဖြစ်နေပါတယ်။ တရုတ်ကို အဓိက တိုက်မှာမို့ ရုရှနဲ့ အဆင်ပြေနေအောင် လုပ်ပေမဲ့ အထက်စီးကနေ ငါ ပြောရင် ရမှာပဲဆိုပြီး တထစ်ချ တွက်ကိန်းကလည်း ထင်သလို မဖြစ်လာတော့ ယူကရိန်းအရေးကို လက်ရှောင်တော့မယ်လို့ လေသံပစ်လာပါပြီ။

တဘက်မှာတော့ တရုတ်ဟာ အဆုံးထိ သွားမယ်ဆိုသလို တုံ့ပြန်မှုတွေကို တစ်ထစ်ချင်း လုပ်လာနေပါတယ်။ ဒီကြားထဲမှာ ယူကျုဘ်တင်ဆက်သူ Lei က လတ်တလော တရုတ်ရဲ့ လျှို့ဝှက်ဗျူဟာပါဆိုပြီး ဖော်ထုတ်လာတာတွေဟာလည်း (မှန်တာ မှားတာ၊ လုပ်နိုင်တာ မလုပ်နိုင်တာထက်) စိတ်ဝင်စားစရာ ကောင်းနေပါတယ်။

သူ ပြောတာက ဧပြီ ၇ – ၉ သုံးရက်တာကာလအတွင်း တရုတ်နိုင်ငံထဲက အုပ်ချုပ်ရေးဆိုင်ရာ အရာရှိကြီးငယ်တွေကို ဌာနဆိုင်ရာ လျှို့ဝှက်အခန်းတွေထဲမှာ “ဆုံးဖြတ်ချက်”လို့ ခေါင်းစဉ်တပ်ထားတဲ့ စာလုံးရေ ၇၀၀၀ ပါတဲ့ စာရွက်စာတမ်းတစ်ခုကို ဖတ်စေခဲ့ပါတယ်တဲ့။ ကင်မရာ၊ ဖုန်း၊ မှတ်စု ဘာဆိုဘာမှ ပေးမယူဘဲ စိတ်ထဲမှာ မှတ်မိနေအောင်ပဲ ဖတ်ရမယ်လို့ ညွှန်ကြားချက်လည်း ပါရှိခဲ့ပါတယ်။ အဓိကကတော့ အမေရိကနဲ့ ကုန်သွယ်စီးပွါးစစ်ပွဲ ဆင်နွှဲရာမှာ တန်ပြန်ဖို့ ဗျူဟာမူဝါဒ ငါးချက်ကို အသေးစိတ် ရေးပြထားတာ ဖြစ်ပါတယ်။ အဆုံးသတ်ရည်မှန်းချက်ကတော့ အမေရိကကို ကမ္ဘာ့ဦးသျှောင်အနေအထားကနေ အဆုံးသတ်သွားအောင် လုပ်ဖို့လို့ ဆိုပါတယ်။

ဒါကို လုပ်ရတဲ့ အဓိက အကြောင်းရင်းဟာ တရုတ်ကွန်မြူနစ်ပါတီအတွက် ကုန်သွယ်ရေးစစ်ပွဲအတွင်း ပြည်တွင်းတည်ငြိမ်မှု ရစေချင်တာရော၊ ရှီကျင့်ဖင်အတွက် ဝူဟန်ကိုဗစ်နဲ့ ပတ်သက်တဲ့ အမှားတွေကို အကြောင်းပြုပြီး တရားခံအဖြစ် စွပ်စွဲခံရမှာကို ကာကွယ်ချင်တာရောကြောင့်လို့လည်း ဆိုထားပါတယ်။

ပထမဆုံးဗျူဟာကတော့ ကမ္ဘာ့နိုင်ငံတွေကိုပါ အမေရိကကို တန်ပြန်ရေး ဆွဲဆောင်စည်းရုံးဖို့ ဖြစ်ပါတယ်။ ဂျာမဏီ၊ ပြင်သစ်၊ ယူကေ၊ ကနေဒါ၊ ဂျပန်၊ ဩစတြေလျနဲ့ တရုပ်ရဲ့ အိမ်နီးချင်းနိုင်ငံတွေအပြင် အိန္ဒိယနဲ့ ဗီယက်နမ်အပါအဝင် ဘယ်ညာယိမ်းနေတဲ့ နိုင်ငံတွေကိုပါ ဆွဲထည့်ပြီး အမေရိကကို ထီးတည်းဖြစ်အောင် လုပ်ဖို့ ရည်ရွယ်ပါတယ်။ ဒုတိယဗျူဟာက ငွေကြေးဆိုင်ရာစစ်ပွဲပါ။ နှစ်ပိုင်းပါဝင်ပြီး ပထမပိုင်းက တရုတ်နိုင်ငံထဲက ကြွယ်ဝသူများရဲ့ နိုင်ငံခြားရောက် ပိုင်ဆိုင်မှုတွေကို တရုတ်ဘဏ်တွေ ဒါမှမဟုတ် ကြားနိုင်ငံတခုခုဆီကို ပိုင်ဆိုင်သမျှ ပြန်လွှဲပြောင်းရေး လုပ်ခိုင်းဖို့နဲ့ ဒုတိယပိုင်းကတော့ အဲဒီညွှန်ကြားချက်ကို မလိုက်နာသူတွေကို နိုင်ငံတော်ပုန်ကန်သူအဖြစ် သတ်မှတ်ပြီး အရေးယူသွားဖို့တို့ ဖြစ်ပါတယ်။ တတိယဗျူဟာကတော့ ပြည်တွင်းဈေးကွက် လည်ပတ်ရေးဗျူဟာဖြစ်ပြီး ၁၉၇၀ နှစ်များဆီက ဘာမဆို အစိုးရက ပေးတဲ့ ရာရှင်နဲ့ လုပ်ရတဲ့ စီးပွါးရေးစနစ်ပုံစံပေါ့။ စတုတ္ထဗျူဟာက နိုင်ငံတကာ နိုင်ငံရေးဗျူဟာပါ။ တရုတ်ရဲ့ နိုင်ငံခြားရေး၊ နိုင်ငံတကာဆက်ဆံရေးတွေအနေနဲ့ ဗျူဟာမြောက် ဆက်ဆံရေးပါတနာတွေကို ရုရှ၊ အီရန်၊ မြောက်ကိုရီးယားတို့နဲ့ ထူထောင်ဖို့ ဖြစ်ပါတယ်။ ဒါ့အပြင် တရုတ်ကွန်မြူနစ်ပါတီအနေနဲ့ သူ့ရဲ့ ဩဇာကို ကမ္ဘောဒီးယား၊ လာအို၊ မြန်မာနဲ့ ထိုင်းနိုင်ငံတွေမှာ ထူထောင်ဖို့ဖြစ်ပြီး နိုင်ငံရေး-စစ်ရေး-ယဉ်ကျေးမှုမျက်နှာစာတွေကို အဓိကထားဖို့ ဖြစ်ပါတယ်တဲ့။ နောက်ဆုံးဗျူဟာကတော့ တိုင်ဝမ်နဲ့ ပတ်သက်ပါတယ်။ တိုင်ဝမ်အပေါ် အမေရိကန်ရဲ့ စစ်ရေးအရ လွှမ်းမိုးမှုကို ဟန့်တားနိုင်ဖို့ ဆိုပါတော့။ အဲဒါကို ‘A new type of conventional war fought under a full spectrum information warfare backed by a credible nuclear deterrent’ ‘အများလက်ခံနိုင်လောက်တဲ့ နျူကလီယားကန့်သတ်ရေးအစီအစဉ်ကို နောက်ခံပြုထားတဲ့ ကွက်ပြည့်နယ်စုံ (သတင်း)အချက်အလက်စစ်ပွဲ အခင်းအကျင်းအောက်မှာ သမားရိုးကျစစ်ပွဲကို ပုံစံအသစ်နဲ့ ဆင်နွှဲရေး’ရယ်လို့ ဆိုပါတယ်။ ဒါကို ဖွင့်ဆိုရှင်းပြတဲ့ အသေးစိတ် အစီအစဉ်ကိုတော့ တိတိကျကျ မရှင်းပြထားပါဘူး။

ဒီတော့ တရုတ်ဟာ အသေးစိတ် ပြင်ဆင်မှုတွေ လုပ်ပြီးထားပြီဆိုတာကိုတော့ သတိချပ်ကြရမှာပါ။ တကယ်တော့ အများက ကုန်ပစ္စည်း အခွန်အခဆိုင်ရာ စစ်ပွဲကို အာရုံရောက်နေကြပေမဲ့ တရုတ်ဟာ “ကွက်ပြည့်နယ်စုံ (သတင်း)အချက်အလက်စစ်ပွဲ အခင်းအကျင်းအောက်မှာ သမားရိုးကျစစ်ပွဲကို ပုံစံအသစ်နဲ့ ဆင်နွှဲရေး”ဆိုတာကို ပြင်ဆင်နေတာကတော့ သေချာပါတယ်။ (တိုင်ဝမ်အရေးအတွက်သက်သက် ဒါကို ပြင်ဆင်နေတယ်လို့တော့ မယူဆပါဘူး။ ChatGPT ခေတ်ထလာချိန်မှာ DeepSeek ဘွားခနဲ ပေါ်လာတာမျိုးကိုလည်း တွေ့ခဲ့ရပြီပဲ။) မြန်မာ့နိုင်ငံရေးမှာ သူ ဝင်ပလေးနေတာတွေကို သတိထားကြည့်ရင်လည်း “သမားရိုးကျစစ်ပွဲ”ကို ပုံစံအသစ်နဲ့ ဆင်နွှဲနေတာပဲလို့ ရိုးတိုးရိပ်တိပ် သဘောပေါက်နေကြတယ်လို့ ဆိုရမှာပါ။ ဒါပေမဲ့ “”ကွက်ပြည့်နယ်စုံ (သတင်း)အချက်အလက်စစ်ပွဲ အခင်းအကျင်း”ဆိုတာကို ဘယ်လို သုံးနေလဲဆိုတာကိုတော့ ရေရေရာရာ မပြောနိုင်ကြသေးပါဘူး။ ခုတလော မြန်မာ့မြေမှာ အမေရိက-တရုတ်ကြားခံစစ် ဆင်နွှဲလာလေမလားလို့ ပြောနေကြတာတော့ ရှိပါတယ်။ အိန္ဒိယသတင်းဝဘ်ဆိုဒ်တစ်ခုက သတင်းအချက်အလက်ထက် အတွေးအမြင် ဆောင်းပါးတစ်ပုဒ်ကို အခြေခံပြီး ဖြစ်လာတာဆိုပါတော့။

ဘာပဲဖြစ်ဖြစ် ငလျင်ကြီးအပြီးမှာ စကစဟာ မီဒီယာအပါအဝင် ကမ္ဘာ့အခင်းအကျင်းကို အာဆီယံမြေကတဆင့် ထိတွေ့ခွင့်ရလာပါတယ်။ ဒါကြောင့် စကစအနေနဲ့ အတွေ့အကြုံ ရှိခဲ့ဖူးသလို ၂၀၀၈ နာဂစ်အလွန် ဝင်္ကပါအခင်းအကျင်းမျိုးကို တကျော့ပြန် စွမ်းနိုင်သွားလေမလားလို့ တွေးပူသူတွေ များလာကြပါတယ်။ ဒါကြောင့်လည်း အရပ်သားပြည်သူတွေနဲ့ ကလေးသူငယ်တွေကို ပစ်မှတ်ထားပြီး ဗုံးကြဲသတ်ဖြတ်အကြမ်းဖက်နေတဲ့ စကစကို အဆုံးထိ တိုက်နိုင်မှသာ တော်လှန်ရေး အောင်မြင်မယ်လို့ တွေးတောသူတွေ ပိုပိုများလာနေပါတယ်။ ဒီအနေအထားမှာ သတိထားကြရမှာကတော့ သတင်းအချက်အလက်ကို အပြည့်အဝ အခြေမခံတဲ့ သတင်းဆန်ဆန် အချက်အလက် ဖြန့်ဝေမှု၊ မပြည့်စုံတဲ့ အချက်အလက် ဖြန့်ဝေမှု၊ မှားယွင်းနေတဲ့ အချက်အလက် ဖြန့်ဝေမှုတွေရယ်၊ ကိုယ်ကျိုးစီးပွါး မကင်းတဲ့ ရပ်တည်ချက်တွေပေါ်ကနေ တဘက်သားအပေါ် သုံးသပ်ဝေဖန်ပြောဆိုမှုတွေပဲ ဖြစ်ပါတယ်။

တကယ်တော့ လက်ရှိကမ္ဘာ့အခင်းအကျင်းမှာကိုက အမြော်အမြင်၊ ဆင်ခြင်သုံးသပ်မှုတွေရဲ့ အခန်းကဏ္ဍက မှေးမှိန်ပြီး ကိုယ်ကျိုးစီးပွါးကို အခြေခံတဲ့ ရပ်တည်ချက် (တနည်း ဘက်လိုက်အကဲဖြတ်မှု)တွေရဲ့ အခန်းကဏ္ဍက ကြီးထွားမြင်သာနေပါတယ်။ ဒီတော့ စာဖတ်သူ၊ သတင်းဖတ်သူတွေအဖို့ မီဒီယာကိုယ်ခံစွမ်းအားတွေ အားအလွန်ကောင်းမှသာ ‘သမားရိုးကျမဟုတ်တဲ့ (သတင်း)အချက်အလက်စစ်ပွဲတွေ”ကို ခံနိုင်ရည် ရှိမှာပါ။ ဒီစစ်ပွဲနည်းဗျူဟာကို တရုတ်ကသာ မဟုတ်ဘဲ ကိုယ်ကျိုးစီးပွါး ဦးထိပ်ထားတဲ့ အမြော်အမြင်မဲ့ အစုအဖွဲ့အားလုံးက လုပ်နိုင်နေတာကိုလည်း သတိထားကြရမှာ ဖြစ်ပါတယ်။ အဲဒီအတွက် ဘယ်သတင်းအချက်အလက်ကိုမဆို စေ့စေ့စပ်စပ် ခြေခြေမြစ်မြစ် ရေဆုံးရေဖျား ရှာဖွေဖတ်ရှုကြဖို့ အရေးကြီးပါတယ်။ ကိုယ် ထောက်ခံအားပေးနေသူမို့ ငါ့ဘက်ကမို့ ယုံမယ် ပုံမယ်လို့ ဆုံးဖြတ်လို့ မဖြစ်သလို ကိုယ်နဲ့ မသင့်မြတ်သူဘက်ကမို့ ရန်ဘက်ကမို့ ကန်မယ် တိုက်မယ်လို့ တထစ်ချ ဆုံးဖြတ်ဖို့လည်း မဖြစ်နိုင်တော့တဲ့ အနေအထားတစ်ခုကို တစစ ချဉ်းကပ်လာနေပါပြီ။

တော်လှန်ရေးသမားတွေသာမက လူတွေအားလုံး သတိကြီးကြီး ထားပြီး လတ်တလော အနေအထားကို ကျော်ဖြတ်ကြရမှာပါ။ ကမ္ဘာကြီးမှာ နိုင်ငံအသီးသီးဟာ ကိုယ်ကျိုးစီးပွါးကို အခြေခံတဲ့ ရပ်တည်ချက်တွေကို ဦးစားပေးလာကြပြီး ကမ္ဘာကြီးတခုလုံးရဲ့ တည်ငြိမ်တိုးတက်ရေးအကျိုးစီးပွါးအလို့ငှာ အမြော်အမြင်တွေကို မျက်ကွယ်ပြုလာကြတဲ့ အချိန်အခါမှာ အကောင်းဆုံး ကိုင်စွဲရမယ့် အဆောင်ပစ္စည်းဟာ မှန်ကန်တိကျတဲ့ သတင်းအချက်အလက်ကို အခြေခံပြီး လူ့အဖွဲ့အစည်းတခုလုံးရဲ့ အကျိုးစီးပွါးအတွက် ထားရှိအပ်တဲ့ အမြော်အမြင်သာ ဖြစ်ပါတယ်။ အမြော်အမြင်ကို အားထားပြီးသာ ရပ်တည်ချက်ကို တည်ဆောက်ကြရအောင်ပါ။ ။