အိမ်သွင်/People’s Spring
ဓနုကိုယ်ပိုင်အုပ်ချုပ်ခွင့်ရဒေသ ပင်းတယမြို့နယ် နန့်အင်းကျေးရွာအနီးတွင် စစ်ကောင်စီနှင့် RCSS တိုက်ပွဲဖြစ်ပွားပြီး RCSS တပ်ဖွဲ့ဝင်တစ်ဦးသေဆုံးပြီးတစ်ဦးကို စစ်ကောင်စီကဖမ်းဆီးသွားသည်။
ပင်းတယမြို့နှင့် ၁၂ မိုင်ခန့်အကွာရှိ နန့်အင်းကျေးရွာအနီးတွင် ဒီဇင်ဘာလ ၁ရက်နေ့က တိုက်ပွဲဖြစ်ပွားခြင်းဖြစ်သည်။
“စစ်တပ်က သူ့အင်အားမရှိလို့ RCSSကို ပင်းတယဘက် ပို့ထားတာ။ အခုကသူတို့အချင်းချင်းချတာ။ စစစ်တပ်ဂိတ်နားမှာ နောက်ထပ်ဂိတ်တစ်ဂိတ်လာဖွင့်လို့ဆိုပြီးတော့ ပြီးခဲ့တဲ့ရက်ထဲက တင်းမာနေတာ။ တိုက်ပွဲဖြစ်တော့ ဒေသခံတွေ ပြေးရရှောင်ရပြန်တယ်” ဟု ဒေသခံတဦးကပြောသည်။
Public Service Announcement
RCSS တပ်ဖွဲ့ဝင် ၂၀ ဦးခန့်တပ်စွဲထားသောစစ်ဆေးရေးဂိတ်ကို စစ်ကောင်စီက စတင်တိုက်ခိုက်ခြင်းဟု ဒေသခံတစ်ဦးကပြောသည်။
RCSS တပ်ဖွဲ့ဝင်တစ်ဦးသေဆုံးကာ တစ်ဦးကိုစစ်ကောင်စီကဖမ်းဆီးသွားသလို လက်နက်ခဲယမ်းအချို့လည်းသိမ်းဆည်းသွားကြောင်း သတင်းရရှိသည်။ ကျန် RCSS တပ်ဖွဲ့ဝင်များ ထွက်ပြေးသွားပြီးနောက် RCSS စခန်းမှ ဆန်ရိက္ခာများကို စစ်ကောင်စီက သယ်ဆောင်သွားကြောင်း စုံစမ်းသိရသည်။
ဗိုလ်ချုပ်ကြီးယွက်ဆစ်ခေါင်းဆောင်သောရှမ်းပြည်ပြန်လည်ထူထောင်ရေးကောင်စီ(RCSS)သည် စစ်အာဏာရှင်တော်လှန်ရေးတွေမပါဝင်ဘဲ စစ်ကောင်စီနှင့်ပူးပေါင်းနေသည့်လက်နက်ကိုင်အဖွဲ့ဖြစ်သည်။ ဓနုကိုယ်ပိုင်အုပ်ချုပ်ခွင့်ရဒေသ ပင်းတယမြို့နယ်နှင့်ရွာငံမြို့နယ်အတွင်း ပြီးခဲ့သည့်စက်တင်ဘာလမှာစတင်ကာ စစ်ကောင်စီတပ်ရင်းများနှင့်အတူဝင်ရောက်လာပြီး ဂိတ်စခန်းအချို့ဖွင့်လှစ်ခဲ့သည်။ ၎င်းတို့တပ်စွဲသည့်ကျေးရွာအချို့တွင် ဒေသခံများထံမှ ဆပ်ကြေးတောင်းခံနေ၍ ဓနုဒေသခံများက ဆန့်ကျင်နေကြသည်။
ယခုမူ စစ်ကောင်စီနှင့် RCSS တိုက်ပွဲဖြစ်ပွားပြီး RCSS စခန်းအချို့ ရုတ်သိမ်းမှုရှိနေသည်ဟု ဒေသခံများကပြောသည်။ နန့်အင်းကျေးရွာသည် ပင်းတယ-ရပ်စောက်လမ်းမှ အတွင်းဘက်သို့ အနည်းငယ်ဝင်ရသည့် နေရာ၌ရှိပြီး လမ်းပိုင်းတလျှောက်၌ စစ်ကောင်စီကလုံခြုံရေးယူထားသည်။ တိုက်ပွဲနှင့်ပတ်သက်၍ စစ်ကောင်စီကရော RCSSကပါ သတင်းမထုတ်ပြန်သေးပေ။
ဒေသတွင်းအခြေအနေကိုစောင့်ကြည့်နေသည်ဟု ဓနုကိုယ်ပိုင်အုပ်ချုပ်ခွင့်ရဒေသမှ ပြည်သူ့ကာကွယ်ရေးတပ်ဖွဲ့အချို့ကပြောသည်။
