Scorpio/People’s Spring
လူသားဒိုင်းဆိုတဲ့ စကားလုံးဟာ စစ်ကောင်စီအာဏာသိမ်းပြီးနောက်ပိုင်း ကျယ်ကျယ်ပြန့်ပြန့် ကြားလာရတဲ့ စကားလုံးတစ်ခုပါ။ အထူးသဖြင့် အညာအပါအဝင် တော်လှန်ရေးအားကောင်းတဲ့ဒေသတွေမှာ မကြာခဏ ကြားနေကြရတာပါ။
ထင်တိုင်းကြဲနေတဲ့ အာဏာလု စစ်ကောင်စီတပ်ဟာ စစ်ကြောင်းထိုးပြီဆိုရင် စစ်ကြောင်းတလျှောက် ရွာတွေက ပြည်သူတွေ ကြီးကြီးငယ်ငယ်၊ ကလေးပါမချန် ကျားမ မရွေး ဖမ်းဆီးခေါ်ဆောင်ပြီး စစ်ကြောင်းရှေ့ကနေ လူသားဒိုင်းလုပ်လေ့ရှိတယ်။
ပြီးခဲ့တဲ့ မေလ ၃၁ရက်နေ့ကဆိုရင် ပြည်ခရိုင်၊ ပေါက်ခေါင်းမြို့နယ်မှာ စစ်ကြောင်းထိုးပြီး ကျေးရွာတွေကို မီးရှို့နေတဲ့ စစ်ကောင်စီတပ်က ဒလမဲရွာကအသက် ၁၆ နှစ်ဝန်းကျင်ဆယ်တန်းကျောင်းသူတွေအပါအဝင် ရွာသူတွေကို လူသားဒိုင်းအဖြစ် ဖမ်းဆီးခေါ်ဆောင်သွားတယ်လို့ သိရတယ်။
Public Service Announcement
တကယ်တော့ တိုင်းရင်းသားဒေသတွေမှာ လူသားဒိုင်းဆိုတဲ့ စကားလုံးက နားရည်ဝနေခဲ့တာ နှစ်ပေါင်း ကြာရှည်လှပါပြီ။ မြေပြန့်က ပြည်သူတွေ လူသားဒိုင်း အလုပ်ခံခဲ့ရတဲ့ ရုပ်သံမှတ်တမ်းတစ်ခု ပြီးခဲ့တဲ့ ဇူလိုင်လအတွင်းက ထွက်ပေါ်လာခဲ့ပါတယ်။
အဲဒီ ရုပ်သံမှတ်တမ်းကို မန္တလေးတိုင်း၊ မိတ္ထီလာခရိုင် အမှတ် (၃) တပ်ရင်း (Meikhtila Special Force)ကနေ ဇူလိုင်လ ၁၂ ရက်နေ့မှာ ထုတ်ပြန်လိုက်တာပါ။ ဇူလိုင်လ ၉ ရက်နေ့က မိတ္ထီလာခရိုင်အတွင်းမှာ အမြန်လမ်း မိုင်တိုင် ၃၁၇ ကနေ စစ်ကြောင်းထိုးလာတဲ့ စစ်တပ်ဟာ ကာကွယ်ရေးအဖွဲ့တွေနဲ့ တိုက်ပွဲဖြစ်နေချိန် ကျေးရွာတရွာအနီးမှာ ပြည်သူတွေကို လူသားဒိုင်းလုပ်ခဲ့တာဖြစ်ကြောင်း မိတ္ထီလာခရိုင် အမှတ် (၃) တပ်ရင်းရဲ့ တာဝန်ရှိသူတွေက ပြောပါတယ်။
လူသားဒိုင်းအလုပ်ခံရသူတွေကတော့ တအုန်းအုန်းတဒိုင်းဒိုင်းကြားထဲမှာ ကြောက်ကြောက်လန့်လန့်နဲ့ ကောက်စိုက်နေကြသူတွေ၊ လယ်လုပ်ကြသူတွေ ဖြစ်နေခဲ့ပါတယ်။
ရုပ်သံမှတ်တမ်းမှာ လက်နက်တွေနဲ့ စစ်ကောင်စီတပ်သားတွေက ပြည်သူ ၅ ဦးထက်မနည်းကို လက်ပြန်ကြိုးတွေတုပ်ပြီး ရှေ့ကပြေးခိုင်းခဲ့တယ်။ ပြည်သူတွေဟာသူတို့ပြေးခိုင်းတဲ့အတိုင်း ကြောက်ကြောက်လန့်လန့်နဲ့ ပြေးနေကြတာတွေ့ရတယ်။
လူထုနွေဦးက ထပ်မံရရှိတဲ့ ရုပ်သံမှတ်တမ်းမှာတော့ ပိုဆိုးသွားခဲ့ပါပြီ။ ပြည်သူတွေကို နှစ်ဘက်ပစ်ခတ်နေတဲ့ကြား စစ်မျက်နှာပြင်အလယ်မှာ ထိုင်ခိုင်းထားတာဖြစ်ကြောင်း မိတ္ထီလာခရိုင် အမှတ် (၃) တပ်ရင်းရဲ့ တာဝန်ရှိသူက ပြောပါတယ်။ နောက်မှသိရတာက ထိုင်ခိုင်းထားတဲ့ ပြည်သူတွေဟာ အမျိုးသားငါးဦးတင််မက အမျိုးသမီးနှစ်ဦးပါ ပါဝင်ကြောင်း ဒေသခံတွေဆီကနေ သိရပါတယ်။ ပြည်သူပါမှန်းသိတဲ့အခါ တိုက်ပွဲကို ရပ်တန့်လိုက်ရကြောင်း မိတ္ထီလာခရိုင် အမှတ် (၃) တပ်ရင်းရဲ့ တာဝန်ရှိသူတွေက ပြောပါတယ်။
“ကျွန်တော်တို့ အချိန်မီသိနိုင်ပြီး တိုက်ပွဲ ရပ်တန့်နိုင်တဲ့အခါ တော်သေးတာပေါ့။ မဟုတ်ရင်ကျ တိုက်ပွဲအလယ်မျိုးကော ရှေ့ကနေ ပြေးခိုင်းနေတာမျိုးကတော့ အတော့ကို အန္တရာယ်များတာ”လို့ မိတ္ထီလာခရိုင်တပ်ရင်း ၃ ရဲ့ ဒုတပ်ရင်းမှူး Kellyo က ပြောပါတယ်။
စစ်တပ်ကပြည်သူတွေကိုလူသားဒိုင်းလုပ်တဲ့ အထောက်အထား ရုပ်သံတချို့ကို မိတ္ထီလာခရိုင် အမှတ် (၃)တပ်ရင်း က ဒရုန်းနဲ့ မှတ်တမ်းတင်နိုင်ခဲ့တာဖြစ်ပါတယ် ။
အဲဒီနေ့ကတော့ လူသားဒိုင်းအလုပ်ခံရတဲ့ ပြည်သူတွေ ကံကောင်းခဲ့တယ်ဆိုရမှာပါ။ တိုက်ပွဲဆက်မဖြစ်တော့လို့ စစ်ကောင်စီစစ်ကြောင်း ပြန်ဆုတ်ချိန် ပြန်လွှတ်ထားခဲ့တယ်လို့ သိရတယ်။
ဒါပေမယ့် အခုသြဂုတ်လထဲမှာလည်း စစ်ကောင်စီတပ်က စစ်ကြောင်းတွေဆက်ထိုးနေပြီး ထိုးတိုင်းလည်း ပြည်သူတွေကို လူသားဒိုင်းအဖြစ် ဖမ်းဆီးခေါ်ဆောင်သွားတာတွေရှိနေကြောင်း ဒေသခံတွေက ပြောပါတယ်။
“ဒီရက်ပိုင်းစစ်ကြောင်းဆိုအယောက် ၃၀ လောက်ထိ ခေါ်သွားတာမျိုးပါရှိနေပါတယ်”လို့ မိတ္ထီလာခရိုင်အတွင်းက ဒေသခံတဦးက ပြောပါတယ်။
ဒါကြောင့် ပြည်သူတွေအနေနဲ့ စစ်ကောင်စီတပ်နဲ့ ခပ်ဝေးဝေးနေဖို့ ကာကွယ်ရေးရဲဘော်တွေက အကြံပေးပါတယ်။
“အခုချိန်ထိလည်း စစ်ကြောင်းထိုးတိုင်းလည်း ပြည်သူကို ဆွဲခေါ်ပြိး လူသားဒိုင်း လုပ်နေဆဲပဲ။ အဲဒီတော့ စစ်က ထီလာခရိုင်အတွင်းလည်း ရောက်လာနေပြီမို့ တဖက်က အဆိုးဝါးဆုံးသော လုပ်ရပ်တွေ ကြုံနိုင်တာမို့ သတိထားပြီး ခပ်ဝေးဝေးကနေဖို့ အသိပေးလိုပါတယ်”လို့ မိတ္ထီလာခရိုင်တပ်ရင်း ၃ ရဲ့ ဒုတပ်ရင်းမှူး Kellyo က ပြောပါတယ်။
“ပြည်သူတွေကတော့ ဘယ်အချိန် စစ်ကြောင်းထိုးမလဲ၊ ငါ့များ ဘယ်ခေါ်သွားမလဲနဲ့ လယ် တောက် ကျီးလန့်စာစားလုပ်နေရပါတယ်”လို့ဒေသခံအမျိုးသားတဦးက ပြောလိုက်ပါတယ်။ ။
ရုပ်သံ-မိတ္ထီလာခရိုင် အမှတ် (၃) တပ်ရင်း
