ဖေဖော်ဝါရီ- ၅၊၂၀၂၆။မိုမို/People’s Spring
မကွေးတိုင်း၊ ဂန့်ဂေါမြို့နယ်မှာ သတင်းထောက်လှမ်းတဲ့ ပျူစောထီးနှစ်ဦးကို တော်လှန်ရေးတပ်တွေက ဖမ်းမိတယ်လို့ ဒေသခံသတင်းရင်းမြစ်တချို့က ပြောပါတယ်။
အဲဒီပျူစောထီး နှစ်ဦးဟာ ဂန့်ဂေါမြို့အခြေစိုက် ခလရ(၅၀)တပ်ရင်း တပ်တွင်းက ဖြစ်ပြီး ထောက်လှမ်းရရှိတဲ့သတင်းတွေကို ဗိုလ်ကြီးသက်ပိုင်စိုးထံ အစီရင်ခံရတယ်လို့ ဆိုပါတယ်။
“ မနေ့က(ဖေဖော်ဝါရီ ၄ ရက်)က မနက်ပိုင်းက မိတာ။ပြည်သူတွေရယ်၊ ပကဖ အဖွဲ့ရယ်၊ Black Dragon Force အဖွဲ့ရယ် ဝိုင်းဖမ်းကြတာ။လေကြောင်းရန်နဲ့ လုံခြုံရေးအရနေရာတိကျတော့ ပြောခွင့်မရှိဘူး” လို့ ဂန့်ဂေါအခြေစိုက်သတင်းရင်းမြစ်က ပြောပါတယ်။
Public Service Announcement
အခုတကြိမ်အပါအဝင် ဂန့်ဂေါမြို့နယ်ထဲမှာ စစ်တပ်သတင်းပေးတွေ ဖမ်းဆီးရရှိတာ သုံးကြိမ်ခန့်ရှိတယ်လို့လည်း သိရပါတယ်။
“ စျေးသည်ပုံစံ၊ ဆံပင်ကျွတ်ဝယ်တဲ့ ပုံစံ၊တောင်သူသုံးပစ္စည်းရောင်းတဲ့ပုံစံ အစရှိသဖြင့် ပုံစံမျိုးစုံပဲ” လို့ ဂန့်ဂေါမြို့နယ်စစ်ရေးသတင်းရင်းမြစ်က စစ်တပ်အတွက်သတင်းထောက်လှမ်းသူတွေ ရဲ့ အခြေအနေကို ပြောပါတယ်။
ဖမ်းမိတဲ့ စစ်တပ်သတင်းထောက်လှမ်းသူ နှစ်ဦးနဲ့ပတ်သက်တဲ့ အသေးစိတ်အခြေအနေကို Black Dragon Forceထံ ဆက်သွယ်မေးမြန်းနေဆဲဖြစ်ပါတယ်။
လက်ရှိမှာ တော်လှန်ရေးတပ်တွေက ဂန့်ဂေါမြို့နယ်မြောက်ပိုင်းမှာရှိတဲ့ စစ်တပ်အခြေစိုက်ရွာတွေကို ပြီးခဲ့တဲ့နှစ်ကုန်ပိုင်းကစလို့ စစ်ဆင်ရေး ဖော်ဆောင်နေပါတယ်။
တိုက်ပွဲတွေမှာ စစ်ကောင်စီတပ်စွဲထားတဲ့ ပျူစောထီး ကျေးရွာ နှစ်ရွာသိမ်းပိုက်ပြီး စစ်အုပ်စုဘက်က ၄၀ ကျော်သေကာ လက်နက်ရှစ်လက် သိမ်းဆည်းရရှိတယ်လို့ ဂန့်ဂေါခရိုင်စစ်ဌာနက ဇန်နဝါရီ ၁၀ ရက်မှာ ထုတ်ပြန်ထားပါတယ်။
ယောဒေသဖြစ်တဲ့ ဂန့်ဂေါ၊ ထီးလင်း၊ ဆော၊ ကျော၊လောင်းရှည်မြို့တွေက ချင်းပြည်နယ်ရဲ့ အဓိကဝင်ပေါက်၊ထွက်ပေါက်တစ်ခုဖြစ်သလို စစ်ကိုင်းတိုင်းနဲ့ ထိစပ်နယ်မြေဖြစ်ပါတယ်။
ဒါကြောင့် စစ်တပ်က လေကြောင်းကနေ ဗုံးကြဲတာတွေ၊ စစ်ကြောင်းထိုးတာတွေ နဲ့ လက်နက်ကြီးပစ် ခတ်တာတွေကြောင့် စစ်ရှောင်စခန်းက အရပ်သားတချို့ထိခိုက်သေဆုံးတာရှိပါတယ်။
