ဖေဖော်ဝါရီ ၅၊၂၀၂၆။ သုည/People’s Spring
စစ်ကိုင်းတိုင်းအတွင်းက သပိတ်အဖွဲ့တွေ၊ ဒေသခံပြည်သူတွေဟာ စစ်အာဏာရှင်ဆန့်ကျင်ရေး လူထုသပိတ်လှုပ်ရှားမှုတွေကို ဒီကနေ့ (ဖေဖော်ဝါရီ ၅) မှာ ဆက်လက်ပြုလုပ်ခဲ့ပါတယ်။
စစ်ကိုင်းတိုင်း ကသာခရိုင်မှာ ၅/ကသာလူထုအောင်လံသပိတ်က ဒေသခံပြည်သူတွေနဲ့ ပူးပေါင်းပြီး “ တော်လှန်ဒီရေမြင့်သစ်သို့” စာသားကိုင်စွဲကာ စစ်အာဏာရှင်ကို ဆန့်ကျင်ကြောင်း ချီတက်ဆန္ဒပြခဲ့ပါတယ်။
ဒါ့အပြင် “ ဘူးသပိတ်ကိုင်စွဲ လူထုတိုက်ပွဲ” စာသားနဲ့ စစ်တပ်ထုတ်ကုန် ပစ္စည်းတွေကို ပြည်သူတွေအနေနဲ့ မသုံးစွဲဲကြဖို့ တိုက်တွန်းနှိုးဆော်ခဲ့ပါတယ်။
Public Service Announcement
ယင်းမာပင်မြို့နယ်မှာလည်း ရွာပေါင်းစုံသပိတ်စစ်ကြောင်းနဲ့ သွေးမအေးတဲ့ရွှေနွယ်သွေးသပိတ်စစ်ကြောင်းတို့ ပူးပေါင်းကာ သပိတ်ကော်မတီဝင် ကိုကျော်ဝင်းအောင် ကျဆုံးခြင်း ၁နှစ်၄လပြည့်အဖြစ် အလေးပြုအခမ်းအနားကို ပြုလုပ်ခဲ့ပြီး စစ်အာဏာရှင်ကို ဆန့်ကျင်ကြောင်း ဆန္ဒထုတ်ဖော်ပြသခဲ့ပါတယ်။
ယင်းမာပင်မြို့နယ်မြောက်ခြမ်းမှာလည်း အောင်လံလွင့်မည်ရွှေရေကြည် လူထုသပိတ်ဟာ စစ်အာဏာရှင်စနစ်နဲ့ စစ်တပ်ပြုလုပ်တဲ့ ရွေးကောက်ပွဲကို ဆန့်ကျင်ကြောင်း ကြွေးကြော်ဆန္ဒပြခဲ့ပါတယ်။
စစ်ကိုင်းတိုင်းအတွင်း ဒေသခံတော်လှန်ပြည်သူတွေဟာ နယ်မြေမငြိမ်သက်မှုကြားထဲကနေပဲ စစ်အာဏာရှင်ကျရှုံးရေးနဲ့ စစ်တပ်ရွေးကောက်ပွဲဆန့်ကျင်ရေး ဆန္ဒပြသပိတ်တွေကို နေ့စဉ်ပြုလုပ်နေကြပါတယ်။
