■ရွှေလုပ်ငန်းရှင်တိုင်းစစ်အုပ်စုစွပ်စွဲသော ပမာဏကိုအရောင်းအဝယ်လုပ်ဟုလုပ်ငန်းရှင်တဦးပြော
ဖေဖော်ဝါရီ-၅၊၂၀၂၆။တာရာ၊ရဲခေါင်/People’s Spring
ပြည်တွင်းရွှေဈေးကွက်မတည်မငြိမ်ဖြစ်အောင်ရွှေတုံးရွှေခဲတွေကို ဝယ်ယူဖြန့်ဖြူးရောင်းချနေတယ်ဆိုတဲ့ စွပ်စွဲချက်နဲ့ ရန်ကုန်ရွှေအသင်းဥက္ကဌ ဦးမျိုးမြင့်အပါအဝင် အသင်းရဲ့ရာထူးအကြီးဆုံး ရွှေလုပ်ငန်းရှင်ကြီး သုံးဦးကို စစ်ကောင်စီကဖမ်းဆီး ထားပါတယ်။
ရွှေဈေး ၁ ကျပ်သားကျပ်သိန်း ၁၀၀ ကျော်အထိစံချိန်တင်တက်ပြီး နောက်မှာ ရန်ကုန်တိုင်းဒေသကြီးအဖိုးတန် သတ္တု(ရွှေ)ရောင်းဝယ်သူများအသင်းဥက္ကဋ္ဌ ဦးမျိုးမြင့်(သိန်းသန်း စိန်ရွှေရတနာဆိုင်)၊ ဒုတိယဥက္ကဋ္ဌ(၁) ဦးမျိုးသူဝင်း(အကယ်ဒမီရွှေဆိုင်)နဲ့ အတွင်းရေးမှူး ဦးနေမျိုးထက်(ရွှေစင်အကယ်ဒမီရွှေဆိုင်)တို့ကို စစ်အုပ်စုက အရေးယူခဲ့တာပါ ။ ၎င်းတို့ဟာရွှေဈေးနှုန်းတည်ငြိမ်စေရေး ကြပ်မတ်ထိန်းသိမ်းဆောင်ရွက်သွားရန်တာဝန်ရှိသူများဖြစ်ပါရက်ကိုယ်တိုင်က ရွှေဈေးကွက်မတည်မငြိမ်ဖြစ်အောင် ပြင်ပရွှေပေါက်ဈေးနှုန်းနဲ့ရွှေတုံးရွှေခဲတွေကိုဝယ်ယူ၊သိုလှောင်ပြီး အရောင်းအဝယ်တွေပြုလုပ်ခဲ့တယ်လို့ စစ်ကောင်စီကစွပ်စွဲ
အရေးယူထားတယ်လို့ ဒီကနေ့ထုတ်ပြန်ပါတယ်။
Public Service Announcement
ဒါကြောင့် ၎င်းတို့ ၃ ဦးဟာလူသိများတဲ့ရွှေဆိုင်လုပ်ငန်းတွေပိုင်ဆိုင်တဲ့ ရွှေလုပ်ငန်းရှင်ကြီးတွေလည်းဖြစ်နေပါတယ်။
ဦးမျိုးမြင့်ဟာ ၂၀၂၆ ဇန်နဝါရီလအတွင်း ၇၀ ကျပ်သားရှိတဲ့အခေါက်ရွှေတုံး ၈ တုံးကို ပြင်ပပေါက်ဈေးနဲ့ ဝယ်ပြီး အမြတ်တင်ပြန်ရောင်းဖို့ သိုလှောင်ထားခဲ့တယ်လို့စွပ်စွဲထားပါတယ်။အလားတူ ဦးမျိုးသူဝင်းက သူရဲ့ရွှေဆိုင်တွေက ၂၀၂၅ ဒီဇင်ဘာလနဲ့ ၂၀၂၆ ဇန်နဝါရီလမှာ အခေါက်ရွှေ ၉၇၀ ကျပ်သားအား ပြင်ပပေါက်ဈေးနှုန်းနဲ့ဝယ်ယူပြီး ရွှေ ၉၅၀ ကျပ်သားကို အမြတ်ယူဈေးနှုန်းမြှင့်တင် ပြန်လည်ရောင်းချခဲ့တယ်လို့စွပ်စွဲထားပါတယ်။ အလားတူ ဦးနေမျိုးထက်ရဲ့ရွှေစင်အကယ်ဒမီရွှေဆိုင်တွေက၂၀၂၅ ဒီဇင်ဘာလနဲ့ ၂၀၂၆ ဇန်နဝါရီလ အတွင်း အခေါက်ရွှေ ၃၁၉ ကျပ်သားကို ပြင်ပပေါက်ဈေးနဲ့ ဝယ်ပြီး၂၆၈ ကျပ်သားအား အမြတ်ရယူပြန်ရောင်းချခဲ့တယ်လို့ စစ်အုပ်စုကစွပ်စွဲထားပါတယ်။
“ ရွှေဆိုင်လုပ်ငန်းရှင်တွေမှာ ရွှေဆိုတာ အနည်းဆုံးပိဿာ ဆယ်နဲ့ချီရှိကြတာပဲ။အခုလို ဖမ်းတာက ဥက္ကဌ နဲ့ အတွင်းရေးမှူးတွေဆိုတော့ ရွှေစျေးကို ဟန့်လိုက်တာ ပါတယ်။ နောက်တစ်ခုက ရွှေစျေး သိန်း ၁၀၀ ကျော်တာကို YGEA က မထိန်းနိုင်လို့ ဖမ်းတာလို့ မြင်တယ်။ ပြီးတော့ YGEA ထဲမှာ နဂိုကတည်း ကစစ်တပ်ထောက်လှမ်းရေးက ရှိပြီးသား။ရှင်းရှင်း ပြောရရင် စစ်တပ်က အကျိုးစီးပွားနဲ့ ဒါမှမဟုတ် သူမကြိုက်တော့ရင် ဖမ်းတယ်ဆိုတာပါပဲ “ လို့ရန်ကုန်အခြေစိုက် ရွှေအရောင်းအဝယ်လုပ်နေသူတစ်ဦးက ပြောပါတယ်။
ဒါကြောင့် ရွှေဆိုင်လုပ်ငန်းရှင်အများစု အလားတူလုပ်တာမှာရွှေအသင်းက ရာထူးအကြီးဆုံး ပုဂ္ဂိုလ်သုံးဦးတည်းကိုဘာကြောင့်ရွေးပြီးအရေးယူတာလဲ ဆိုတာဟာ နောက်ကွယ်မှာ အခြားအကြောင်းရင်းတွေရှိနိူင်တယ်လို့ ရွှေဈေးကွက်စောင့်ကြည်သူအချို့ကပြောပါတယ် ။ အာဏာသိမ်းခေါင်းဆောင်ရဲ့မိသားစုနဲ့ နီးစပ်ပြီး၊စစ်ခေါင်းဆောင်မိသားစုဝင်တွေကိုယ်တိုင်ရင်းနှီးမြှပ်နှံထားတဲ့ နှစ်ပိုင်းအတွင်းဆိုင်ခွဲတွေအများအပြဖွင့်ထားတဲ့ ရွှေဆိုင်တချို့ရှိနေပြီး သူတို့က အခုဖြစ်စဥ်ကြောင့် ရွှေအသင်းမှာ ရာထူးကြီးကြီးတွေယူလိုက်ရင် မထူးဆန်းဘူးလို့ရွှေဈေးကွက်စောင့်ကြည့်သူအချို့ကပြောပါတယ် ။
ရန်ကုန်ရွှေအသင်း(YGEA)ကပါဝင်သူတွေဟာစစ်တပ်အာဏာသိမ်းပြီးကတည်းက စစ်တပ်စိတ်ကြိုက်လုပ်ပေးခဲ့ကြသူတွေဖြစ်ပါတယ်။အသင်းဥက္ကဌ ဦးမျိုးမြင့်နဲ့ အသင်းဝင်လုပ်ငန်းရှင်တွေဟာ နိုင်ငံမှာ စစ်တပ်ကဗုံးကြဲလို့ ၊စစ်တပ်ကကျူးလွန်လို့ လူအစုလိုက်အပြုံလိုက်သေဆုံးတဲ့နေတွေမှာတောင် ဂေါက်ရိုက်သီးမပျက်သလို ၊ဂေါက်သီးရိုက်ပြီးရင်လည်း သူတို့ဓါတ်ပုံတွေကိုအသင်းဖေစ်ဘွလ်မှာ အမြဲတင်ခဲ့တာကို တွေ့ရပါတယ်။
အာဏာသိမ်းစစ်အုပ်စုစေခိုင်းသမျှလုပ်ခဲ့ပေမယ့်၎င်းတို့ ၃ ဦးကို စစ်ကောင်စီက ထုတ်ပြန်ထားတဲ့ အမိန့် ကြော်ငြာစာပါတားမြစ်ချက်တွေကို ဖောက်ဖျက်ကျူးလွန်တာကြောင့် တည်ဆဲဥပဒေတွေနဲ့အညီ အရေးယူဆောင်ရွက်သွားမယ်လို့ ဆိုပါတယ်။ဒါပေမယ့် ဘယ်လိုအရေးယူဆောင်ရွက်မယ်ဆိုတာကို အသေးစိပ်မဖော်ပြပါဘူး။
ဒါ့အပြင်ရွှေလုပ်ငန်းရှင်များအနေဖြင့်ရွှေဈေးကွက်တည်ငြိမ်အောင် ဝိုင်းဝန်း ထိန်းသိမ်းဆောင်ရွက်သွားကြဖို့ ၊ အမိန့်ညွှန်ကြားချက်တွေကိုလိုက်ကြရန်နဲ့ မလိုက်နာတဲ့ရွှေလုပ်ငန်းရှင်တွေကိုထိရောက်စွာ အရေးယူဆောင်ရွက်သွားမယ်လို့လည်းခြိမ်းခြောက်ထားပါတယ်။
၂၀၂၅ နှစ်ကုန်ပိုင်းနဲ့ ၂၀၂၆ နှစ်ဆန်းပိုင်းရွှေဈေးစံချိန်တင်တက်ခဲ့တာဟာ ကမ္ဘာ့ရွှေဈေးကိုယ်တိုင်တက်တာ ၊အမေရီကန်ဒေါ်လာအပေါ်ယုံကြည်မှုလျော့ကျပြီး နိုင်ငံကြီးတွေကိုယ်တိုင်ရွှေဝယ်စုတာ၊ကျပ်ငွေတန်ဖိုးကျတာ စတာတွေကြောင့်ဖြစ်တယ်လို့ဈေူကွက်ကျွမ်းကျင်သူတွေကပြောပါတယ်။စစ်တပ်က ရွှေနဲ့ ဒေါ်လာဈေးတက်လာရင်လုပ်ငန်း
ရှင်တွေကို အပစ်ပုံချပြီး ဖမ်းဆီးတဲ့နည်းနဲ့ ဈေးကျအောင်လုပ်တဲ့နည်းလမ်းကိုပဲ အစဥ်အဆက်ကျင့်သုံးနေတာဖြစ်ပါတယ် ။
ဒါအပြင် ဒေါ်လာ ၊ရွှေ ၊စားအုန်းဆီစတဲ့လုပ်ငန်းရှင်တွေကို ဖမ်းဆီးပြီးရင် စစ်အုပ်စုက ပြစ်မှုအတိုးအလျှော့ ၊ထောင်တွင်းအနေချောင်ဖို့အကြောင်းပြချက်တွေနဲ့ လာဘ်ငွေသိန်းပေါင်းသောင်းချီရယူ လေ့ရှိတယ်လို့လုပ်ငန်းရှင်တွေကပြောပါတယ် ။
