အောက်တိုဘာ-၂၄၊ ၂၀၂၅။ People’s Spring
မြန်မာနိုင်ငံမှာ လူတချို့သာ ပါဝင်နိုင်တဲ့ ရွေးကောက်ပွဲကို အာဆီယံနိုင်ငံခြားရေးဝန်ကြီးတွေက မလိုလားကြောင်း မလေးရှားနိုင်ငံခြားရေးဝန်ကြီးက ပြောပါတယ်။
အာဆီယံထိပ်သီးညီလာခံ မစတင်မီ ကျင်းပခဲ့တဲ့ အာဆီယံနိုင်ငံခြားရေးဝန်ကြီးများအစည်းအဝေးအပြီး အလှည့်ကျဥက္ကဋ္ဌနိုင်ငံ မလေးရှားနိုင်ငံခြားရေးဝန်ကြီး မိုဟာမက်ဟာဆန်က ပြောဆိုခဲ့တာပါ။
အာဆီယံအနေနဲ့ ဒီဇင်ဘာမှာ ကျင်းပမယ်ဆိုတဲ့ စစ်ကောင်စီရဲ့ ရွေးကောက်ပွဲကို တားဆီးနိုင်ခြင်းမရှိပေမယ့် အာဆီယံနိုင်ငံခြားရေးဝန်ကြီးတွေဟာ အဲဒီရွေးကောက်ပွဲကို လွတ်လပ်မျှတပြီး အားလုံးပါဝင်နိုင်တဲ့ ရွေးကောက်ပွဲဖြစ်စေလိုကြောင်း မစ္စတာမိုဟာမက်ဟာဆန်က ပြောပါတယ်။
Public Service Announcement
အောက်တိုဘာ ၂၆ကနေ ၂၈ရက်အထိ သုံးရက်ကြာကျင်းပမယ့် အာဆီယံထိပ်သီးညီလာခံမှာ အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင် တက်ရောက်ခွင့် မရသလို စစ်ကောင်စီနိုင်ငံခြားရေးဝန်ကြီးလည်း အာဆီယံနိုင်ငံခြားရေးဝန်ကြီးများအစည်းအဝေးမှာ တက်ရောက်ခွင့်မရပါဘူး။ စစ်ကောင်စီက နိုင်ငံခြားရေးဝန်ကြီးဌာန အမြဲတမ်းအတွင်းဝန် ဦးဟောက်ခန့်ဆုမ်းကို စေလွှတ်ထားတာ တွေ့ရပါတယ်။
အာဏာသိမ်းစစ်ကောင်စီအနေနဲ့ အာဆီယံခေါင်းဆောင်တွေ သဘောတူချမှတ်ထားတဲ့ တူညီဆန္ဒ ၅ရပ်ကို အပြည့်အဝအကောင်အထည်ဖော်ခြင်းမရှိတာကြောင့် မြန်မာနိုင်ငံကိုယ်စားလှယ်ပြုအဖြစ် နိုင်ငံရေးနဲ့သက်ဆိုင်ခြင်းမရှိသူကိုယ်စားလှယ်(non-political representative)ကိုသာ ထိပ်သီးညီလာခံနဲ့ နိုင်ငံခြားရေးဝန်ကြီးအဆင့် အစည်းအဝေးတွေမှာ တက်ရောက်ခွင့်ပြုထားပါတယ်။
စစ်ခေါင်းဆောင်မင်းအောင်လှိုင်ဟာ အာဏာသိမ်းပြီးစ ၂၀၂၁ ဧပြီမှာ အာဆီယံခေါင်းဆောင်တွေအားလုံး တွေ့ဆုံဆွေးနွေးခွင့်ရတာ နောက်ဆုံးဖြစ်ခဲ့ပြီး ၂၀၂၁ ခုနှစ် နှောင်းပိုင်းကစလို့ ထိပ်သီးညီလာခံ ၉ ကြိမ်ထက်မနည်း တက်ရောက်ခွင့် မရရှိခဲ့ပါဘူး။
ဒီနေ့ ကျင်းပခဲ့တဲ့ အာဆီယံနိုင်ငံခြားရေးဝန်ကြီးများအစည်းအဝေးအပြီးမှာ မလေးရှားနိုင်ငံခြားရေးဝန်ကြီးက အာဆီယံရဲ့ မြန်မာပြည်ငြိမ်းချမ်းရေးအစီအစဥ် တူညီဆန္ဒ ၅ရပ်ဟာ အကောင်အထည်ဖော်ဖို့ ခက်ခဲတဲ့အရာမဟုတ်ဘူးလို့ ပြောကြားသွားခဲ့ပါတယ်။ စစ်ကောင်စီအနေနဲ့ အာဆီယံတူညီဆန္ဒ ၅ရပ်ကို လိုက်နာကျင့်သုံးသင့်တယ်လို့လည်း မစ္စတာမိုဟာမက်ဟာဆန်က တိုက်တွန်းခဲ့ပါတယ်။
ကိုးကား – Reuters
