အောက်တိုဘာ-၁၀၊ ၂၀၂၅။ ထားမြတ်/People’s Spring
အာဏာသိမ်းစစ်ကောင်စီကနိုင်ငံတဝန်းပြည်သူလူထုအပေါ် အကြမ်းဖက်မှုအရှိန်မြှင့်လုပ်ဆောင်လျက်ရှိရာစက်တင်ဘာလအတွင်းလေကြောင်းတိုက်ခိုက်မှု ၁၈၇ကြိမ်ပြုလုပ်ခဲ့ပြီး ပြည်သူလူထု သေဆုံးထိခိုက်မှုများစွာ ရှိခဲ့ကြောင်း အမျိုးသားညီညွတ်ရေးအစိုးရ(NUG) လူ့အခွင့်အရေးဆိုင်ရာဝန်ကြီးဌာနက အသိပေးထုတ်ပြန်ပါတယ်။
လူ့အခွင့်အရေးဆိုင်ရာဝန်ကြီးဌာနမှတ်တမ်းတွေအရစစ်အုပ်စုရဲ့လေကြောင်းတိုက်ခိုက်မှုတွေကြောင့် ပြည်သူ ၁၈၅ ဦး သေဆုံးပြီး ၂၈၈ ဦး ဒဏ်ရာရခဲ့တယ်လို့ ဖော်ပြထားပါတယ်။
“လေကြောင်းတိုက်ခိုက်မှုကြောင့်သေဆုံးသူတွေထဲမှာ အသက် ၁၈ နှစ်အောက်ကလေးငယ် ၃၃ ဦးပါဝင်ပါတယ်။အလားတူပဲအကြမ်းဖက်စစ်အုပ်စုဟာလူထုကိုအစုလိုက်အပြုံလိုက်သတ်ဖြတ်မှုတွေလည်းဆက်လက်ကျူးလွန်ခဲ့ပါတယ်” လို့ လူ့အခွင့်အရေးဆိုင်ရာ ဝန်ကြီးဌာနက ထုတ်ပြန်ပါတယ်။
Public Service Announcement
စက်တင်ဘာတစ်လတည်းမှာပဲနိုင်ငံတဝန်းမှာ အစုလိုက်အပြုံလိုက်သတ်ဖြတ်မှုပေါင်း စုစုပေါင်း ၁၂ ကြိမ်ကျူးလွန်ခဲ့ပြီး လူပေါင်း၁၀၇ ဦးသေဆုံးခဲ့တယ်လို့ ဆိုပါတယ်။
အဲဒီထဲမှာတော့အသက် ၁၈ နှစ်အောက်ကလေးငယ်၂၇ ယောက်အထိပါဝင်ကြောင်းဖော်ပြထားပါတယ်။အာဏာသိမ်းစစ်တပ်ဟာစစ်ရာဇဝတ်မှုတွေနဲ့အတူတခြားသောလူ့အခွင့်အရေး ချိုးဖောက်မှုမျိုးစုံကိုလည်းပြုလုပ်ခဲ့တယ်လို့လည်း ဝန်ကြီးဌာနက ထုတ်ပြန်ပါတယ်။
စစ်အုပ်စုဟာတရားမဝင်ရွေးကောက်ပွဲကိုကြိုးပမ်းနေတာနဲ့ အမျှ မြေပြင်မှာ လူထုအပေါ် အကြမ်းဖက်မှုတွေလည်းဆက်တိုက်တိုးမြှင့်လုပ်ဆောင်နေကြောင်း ဖော်ပြပါတယ်။
” အကြမ်းဖက်စစ်အုပ်စုတချိန်မှာအရေးယူတာဝန်ခံရမယ့်သက်သေမှတ်တမ်းတွေပဲဖြစ်ပါတယ်။ဒါကြောင့် လူ့အခွင့်အရေးဆိုင်ရာဝန်ကြီးဌာနအနေနဲ့ အကြမ်းဖက်စစ်အုပ်စုရဲ့ ကျူးလွန်မှုတွေအရေးယူခံရနိုင်ဖို အစွမ်းကုန်ကြိုးပမ်း အားထုတ်သွားမှာဖြစ်ပါတယ်” လို့ လူ့အခွင့်အရေးဆိုင်ရာဝန်ကြီးဌာနက ထုတ်ပြန်ပါတယ်။
အာဏာသိမ်းစစ်တပ်ဟာအောက်တိုဘာပထမပတ်မှာလည်းသူတို့ လက်လွတ်ဆုံးရှုံးထားရတဲ့ နယ်မြေဒေသတွေက ပြည်သူတွေကို ပစ်မှတ်ထားတဲ့ လေကြောင်းတိုက်ခိုက်မှုတွေ ဆက်တိုက် ပြုလုပ်လျက်ရှိပါတယ်။
ရှမ်းမြောက်က TNLA ထိန်းချုပ်ထားတဲ့ မြို့ရွာတွေ၊ ချင်းပြည်နယ်က ချင်းညီနောင် အဖွဲ့ဝင်တွေ ထိန်းချုပ်ထားတဲ့ မြို့ရွာတွေ၊ ကချင်ပြည်နယ်ကKIA ထိန်းချုပ်ထားတဲ့မြို့ရွာတွေနဲ့ကရင်အမျိုးသားအစည်းအရုံး(KNU) ထိန်းချုပ် ဒေသတွေကို လေကြောင်း စစ်ဆင်ရေးတွေ ဆက်တိုက်လုပ်ဆောင်နေတာပါ။
စစ်ကောင်စီကလူထုကိုပစ်မှတ်ထားတိုက်ခိုက်နေတာကြောင့် လေကြောင်း၊ဒရုန်းနဲ့ လက်နက်ကြီးရန် ကာကွယ်ရေးဆိုင်ရာများ လိုက်နာဖို့ စစ်ရေးသတိရှိဖို့ တော်လှန်ရေးအင်အားစုတွေက တိုက်တွန်းထားပါတယ်။
