အောက်တိုဘာ-၁၀၊ ၂၀၂၅။ ထားမြတ်/People’s Spring
ကရင်အမျိုးသားအစည်းအရုံး(KNU) မြိတ်-ထားဝယ်ခရိုင်အတွင်းက တကူကျေးရွာကို စစ်ကောင်စီတပ်က ဒီကနေ့ လေကြောင်းကနေ ဗုံးကြဲတိုက်ခိုက်ခဲ့လို့ ပြည်သူ ထိခိုက်မှုရှိခဲ့တယ်လို့ ကရင်အမျိုးသားအစည်းအရုံး(KNU) မြိတ်ထားဝယ်ခရိုင်က သတင်းထုတ်ပြန်ပါတယ်။
အောက်တိုဘာ ၁၀ရက် မနက် ၉နာရီခွဲမှာ စစ်ကောင်စီက တိုက်လေယာဉ်နဲ့ ဗုံးကြဲခဲ့တာဖြစ်ပြီး တကူရွာက မီးသတ်တပ်ဖွဲ့ အဆောက်အဦး ပျက်စီးမှု ရှိခဲ့တယ်လို့ မှတ်တမ်းဓာတ်ပုံမှာ တွေ့ရပါတယ်။
လေကြောင်း တိုက်ခိုက်လို့ ကလေးတစ်ဦးအပါအဝင် လမ်းသွားလမ်းလာပြည်သူ အချို့ ထိခိုက်ဒဏ်ရာရခဲ့ပြီး ဖြစ်စဉ်ကို ဆက်လက်စုံစမ်းနေကြောင်းလည်း KNU မြိတ်ထားဝယ်ခရိုင်က အသိပေးထားပါတယ်။
Public Service Announcement
စစ်ကောင်စီတပ်ဟာ KNU မြိတ်ထားဝယ်ခရိုင် ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ(၄) နယ်မြေကို လေကြောင်း ဗုံးကြဲတိုက်ခိုက်တာတွေ ဆက်တိုက်လုပ်ဆောင်လျက်ရှိပါတယ်။
ဒီမနက် အစောပိုင်းကလည်း KNU ထိန်းချုပ်ထားတဲ့ ထားဝယ်မြို့နယ် ထီးခီးကျေးရွာကို စစ်ကောင်စီက လေကြောင်း တိုက်ခိုက်မှု ထပ်မံ ပြုလုပ်ခဲ့ပါတယ်။ အောက်တိုဘာ ၈ရက်ကလည်း ထီးခီးရွာကို စစ်ကောင်စီက လေကြောင်း တိုက်ခိုက်ခဲ့လို့ ဒေသခံတွေ မြန်မာ-ထိုင်းနယ်စပ်မှာ သွားရောက်စစ်ရှောင်နေရပါတယ်။
KNU အုပ်ချုပ်နယ်မြေတွေကိုသာမက နိုင်ငံတဝန်း အရပ်သား ပြည်သူနေထိုင်ရာ နေရာတွေကို ပြစ်မှတ်ထားတဲ့ လေကြောင်း စစ်ဆင်ရေးတွေ ဆက်တိုက်ပြုလုပ်နေတာကြောင့် ပြည်သူ အစုလိုက် သေဆုံးထိခိုက်တဲ့ဖြစ်စဉ်တွေ ဆက်တိုက်ဖြစ်ပေါ်လျက်ရှိပါတယ်။
