ဇွန် ၁၊၂၀၂၅။ထားမြတ်၊ရဲခေါင်/People’s Spring
ပအိုဝ်းဒေသ ဆီဆိုင်မြို့နယ်တိုက်ပွဲအတွင်း အဖမ်းခံခဲ့ရသည့် ပအိုဝ်းအမျိုးသားလွတ်မြောက်ရေးတပ်မတော်(PNLA) ရဲဘော် ၅ဦးအား စစ်ကောင်စီတပ်နှင့်ပြည်သူ့စစ် PNOတို့က ပစ်ခတ်သတ်ဖြတ်ခဲ့သည့် ရုပ်သံမှတ်တမ်းကို စစ်ကောင်စီစစ်သုံ့ပန်းထံမှ ပြန်လည်ရရှိခဲ့ပြီး အဆိုပါ စစ်သုံ့ပန်းကလည်း ဟုတ်မှန်ကြောင်းထွက်ဆိုခဲ့သည်ဟု PNLAပြောရေးဆိုခွင့်ရှိသူခွန်ရိန်းယံကပြောသည်။
ယခုနှစ် ဇန်နဝါရီ ၁၂ရက်တွင် ဆီဆိုင်မြို့နယ် ထီစုံကျေးရွာအနီး စစ်ကြောင်းထိုးလာသည့် စစ်တပ်နှင့် PNLAတပ်တို့ တိုက်ပွဲဖြစ်ပွားခဲ့ရာ PNLA ရဲဘော် ၅ဦး ဖမ်းဆီးသတ်ဖြတ်ခံရကြောင်း PNLAက ယခင်ကတည်းက ထုတ်ပြန်ထားပြီး ဖြစ်သည်။
PNLA ရဲဘော်များအား ပစ်ခတ်သတ်ဖြတ်သည့် ရုပ်သံကို တော်လှန်ရေးတပ်များက ပြန်လည် ဖမ်းဆီးနိုင်ခဲ့သည့် စစ်ကောင်စီ သုံ့ပန်းထံမှ ရရှိခဲ့ခြင်းဖြစ်ပြီး ယင်းသုံ့ပန်းကလည်း ဖြစ်စဉ်များကိုထွက်ဆိုခဲ့ဟု ခွန်ရိန်းယံက ပြောသည်။
Public Service Announcement
” စစ်သုံ့ပန်းဆီက သူတို့ဖုန်းထဲမှာ ပြန်ရပြီးတော့ သူတို့ကိုပြန်စစ်ဆေးတာပေါ့။ သူတို့က ၅ယောက်ကို တပြိုင်နက်တည်းသတ်တာတော့ မဟုတ်ဘူး။ တယောက်ကို တခြားနေရာမှာ သတ်တယ်။ ပြီးတော့ လေးယောက်ကို အဲဒီဗီဒီယိုထဲမှာပါတဲ့အတိုင်းပဲ သူတို့ ပစ်သတ်ခဲ့တယ်။ပြီးတော့မှသူတို့ အလောင်းတွေစီထားတဲ့ပုံစံပေါ့”ဟု ခွန်ရိန်းယံက ပြောသည်။
စစ်သုံ့ပန်း၏ ထွက်ဆိုချက်အရ PNLA ရဲဘော်များကို ပစ်ခတ်သတ်ဖြတ်ရာတွင် စစ်ကောင်စီတပ်သားများသာမက PNO ပြည်သူ့စစ်များလည်း ပါဝင်ပစ်ခတ်သတ်ဖြတ်ခဲ့ဟု ခွန်ရိန်းယံက ရှင်းပြသည်။
PNO ပြည်သူ့စစ်က ဖမ်းဆီးထားသော PNLA ရဲဘော် ၄ ဦးကို ပစ်ခတ်သတ်ဖြတ်ခဲ့သော သက်သေရုပ်သံမှတ်တမ်းကို People’s Spring တယ်လီဂရန်ချန်နယ် https://t.me/PeopleSpring/78438တွင်ကြည့်ရှုနိုင်ပါသည်။
စစ်ပွဲအတွင်း ဖမ်းမိထားသည့် စစ်သုံ့ပန်းများကို သတ်ဖြတ်သည့် လုပ်ရပ်သည် စစ်ရာဇဝတ်မှု ကျူးလွန်ခြင်းဖြစ်ကြောင်း ခွန်ရိန်းယံက ပြောသည်။
ပအိုဝ်းလူမျိုးအချင်းချင်းဖြစ်သော်လည်း စစ်ကောင်စီလက်အောက်ခံ PNO ပြည်သူ့စစ်က စစ်အာဏာရှင်အလိုကျ ပအိုဝ်းလူမျိုးကို ပြန်လည်သတ်ဖြတ်ခဲ့ခြင်းဖြစ်သည်ဟု PNLAက ထုတ်ပြန်ထားသည်။
ပြီးခဲ့သည့် ၂၀၂၂ စက်တင်ဘာလ ၁၄ ရက်တွင်လည်း စစ်ကောင်စီလက်အောက်ခံ PNO ပြည်သူ့စစ်သည် ကျေးရွာအလည်ပြန်သည့် PNLA ရဲဘော် ၅ဦးကို ဖမ်းဆီးသတ်ဖြတ်ခဲ့ဖူးသည်။
” ကျနော်တို့အနေနဲ့ကတော့ စစ်သုံ့ပမ်းတွေ ဖမ်းမိတာတွေရှိတယ်။ PNO ပြည်သူ့စစ် အဖွဲ့ဝင်တွေ ဗိုလ်မှူး အဆင့်ထိ ဖမ်းမိတာရှိတယ်။ ဒါပေမဲ့ ဒီလိုမျိုး ညှင်းပမ်းနှိပ်စက်တာမျိုးသတ်ဖြတ်တာမျိုး တယောက်မှ မလုပ်ခဲ့ဘူး။ စစ်သုံ့ပမ်း ဥပဒေနဲ့အညီပဲ ထိန်းသိမ်းထားတယ်”ဟု ခွန်ရိန်းယံကပြောသည်။
PNLA အနေဖြင့် ဖမ်းမိစစ်သုံ့ပန်းများအနက် ပအိုဝ်းစာပေယဉ်ကျေးမှုနှင့် ပအိုဝ်းရဟန်းသံဃာများ၏ မေတ္တာရပ်ခံချက်အရ လွတ်ငြိမ်း ချမ်းသာခွင့်ပေးခဲ့သူများ ရှိသကဲ့သို့ထိန်းသိမ်းထားသူများကို ဆေးကုသခွင့် အသက်ရှင်သန်ခွင့်ပေးခဲ့ဟု ပြောပြသည်။
လက်ရှိ တော်လှန်ရေးသည် စနစ်ပြောင်းတော်လှန်ရေးဖြစ်၍ စစ်အာဏာရှင်စနစ်ကို အပြီးတိုင် တိုက်ဖျက်နိုင်ရေး ဆင်နွှဲနေသည့် တော်လှန်ရေးဖြစ်ကြောင်း၎င်းက ဆိုသည်။ PNLA အနေဖြင့် PNO ပြည်သူ့စစ်များကို ဦးစွာ တိုက်ခိုက်ခြင်းမရှိသေးကြောင်း၊ ပအိုဝ်းအချင်းချင်း သတ်ဖြတ်မှု မဖြစ်ရေး PNO ပြည်သူ့စစ်ခန်းများကို တိုက်ခိုက်ခြင်း ဖမ်းဆီးသတ်ဖြတ်ခြင်းမရှိဘဲ ကိုယ့်ကိုယ်ကိုယ် ကာကွယ်ခွင့်ဖြင့် နေထိုင်လျက်ရှိသည်ဟု ခွန်ရိန်းယံက ပြောသည်။
