မေ ၃၀၊၂၀၂၅။ထားမြတ်/People’s Spring
ကရင်အမျိုးသားအစည်းအရုံး(KNU) တပ်မဟာ (၆)နယ်မြေ၊ မြဝတီမြို့နယ်ရှိ စစ်ကောင်စီ၏ နယ်စပ်တပ်စခန်းတစ်ခုဖြစ်သော ဘုရင့်နောင်တပ်စခန်းကို တော်လှန်ရေးပူးပေါင်းတပ်ဖွဲ့များက ယနေ့(မေလ ၃၀ရက်)နံနက်တွင် သိမ်းပိုက်နိုင်ခဲ့ဟု KNU သတင်းရင်းမြစ်က အတည်ပြုသည်။
ယခုသိမ်းပိုက်လိုက်သည့် တပ်စခန်းသည် နယ်စပ်ရှိ ဗျူဟာမြောက်စခန်းတစ်ခုဖြစ်ပြီး စစ်ကောင်စီတပ်သားများ ထွက်ပြေးသွားသည်ဟုဆိုသည်။
” ဘုရင့်နောင်က ထိုင်းဘက်ကမ်းနဲ့ ဝေါ်လေကြား မှာပေါ့။ အဲဒီဂွင်မှာပဲ။ သူက စခန်းကြီးတော့ ဘယ်ဟုတ်မလဲ။ စခန်းကြီးက ဝေါ်လေတို့ ကနဲလေးတို့ပေါ့။ ရှေ့တန်း ကာကင်းစခန်းပေါ့”ဟု KNU သတင်းရင်းမြစ်က ပြောသည်။
Public Service Announcement
အဆိုပါ တပ်စခန်းမှ စစ်ကောင်စီတပ်သားများသည် ထိုင်းနိုင်ငံဘက်နှင့် ညှိနှိုင်းပြီး ဝင်ရောက်သွားခြင်းဟု ဆိုသည်။
အဆိုပါ တပ်စခန်းသိမ်းပိုက်မှုနှင့် နယ်စပ်ရှိ တပ်စခန်းများ တိုက်ခိုက်သိမ်းပိုက်ခံနေရသောကြောင့် မြဝတီမြို့စောင့်တပ်ဖြစ်သော ခလရ(၂၇၅)တပ်ရင်းက လက်နက်ကြီးများဖြင့် တော်လှန်ရေးတပ်များရှိရာသို့ ယမန်နေ့ညက တစ်ညလုံး ပစ်ကူပေးခဲ့ကြောင်း မြဝတီမြို့ခံများက ပြောသည်။
“တစ်ညလုံး ပစ်နေတာ။ ငလျင်လှုပ်တာလားဆိုပြီး လန့်နိုးမှ လက်နက်ကြီးတွေ ပစ်နေတာ”ဟု မြဝတီမြို့ခံတစ်ဦးက ပြောသည်။
မြန်မာ-ထိုင်းနယ်စပ်တွင် တိုက်ပွဲများပြင်းထန် ခဲ့ပြီးနောက် ဒေသခံပြည်သူ ၅၀၀ ကျော်မှာ ထိုင်းနိုင်ငံ ဘက်သို့ထွက်ပြေးတိမ်းရှောင်လာကြောင်း ထိုင်းဒေသတွင်းသတင်းဌာနအချို့ကဖော်ပြသည်။
နယ်စပ်တွင် အမြင်ပေပင်လယ်ရေမျက်နှာပြင်အထက် ပေ ၄၁၆၀ ( ၁၂၆၈ မီတာ)ကျော်တွင်တည်ရှိသော အဆိုပါစခန်းမှာ စစ်တပ် အခိုင်အမာစခန်းဖြစ်ပြီး စတင်အခြေချပြီးနောက်ပိုင်း ကရင်တော်လှန်ရေးတပ်ဖွဲ့များက အကြိမ်ကြိမ်တိုက်ခိုက်ခဲ့ဖူးသော်လည်း မသိမ်းပိုက်နိုင်ခဲ့ဘူးပေ။
ယခုအကြိမ်တွင်မှာ KNLA ၊ KNDOနှင့် ပူးပေါင်းတပ်များက ထိုးစစ်ဆင် သိမ်းပိုင်နိုင်ခဲ့ခြင်းဖြစ်ကြောင်း ထိုင်းဒေသတွင်း သတင်းဌာနဖြစ်သော AECက ဖော်ပြထားသည်။
မေလ ၃၀ရက်တွင် စစ်ဘေးရှောင် ပြည်သူ ၅၃၃ ဦးသည် ထိုင်းနိုင်ငံဘက်ခြမ်းရှိ နေရာ သုံးနေရာသို့ ယာယီတိမ်းရှောင်နေကြရကြောင်း ဖော်ပြထားသည်။
ယခု မေလနောက်ဆုံးပတ်အတွင်း စစ်ကောင်စီတပ်အနေဖြင့် တပ်မဟာ(၆)နယ်မြေအတွင်း အရေးပါသည့် တပ်စခန်းများကျရှုံးခဲ့ရသည့် အခြေအနေတွင် လက်ကျန် စခန်းများမှ အလွယ်တကူ ဆုတ်ခွာသွားသည့် သဘောဖြစ်မည်ဟု သတင်းရင်းမြစ်က သုံးသပ်သည်။
KNU ဦးဆောင်သည့် တော်လှန်ရေးပူးပေါင်းတပ်သည် မေလ ၂၃ရက်က တပ်မဟာ(၆) နယ်မြေရှိ ဘလယ်ဒိုတပ်စခန်းနှင့် မေလ ၂၈ရက် တွင် ကနဲလေးတပ်စခန်းကို တိုက်ခိုက်သိမ်းပိုက်ခဲ့ရာ စစ်ကောင်စီထံမှ လက်နက်ခဲယမ်းများစွာ သိမ်းပိုက်ရရှိခဲ့သည်။ ထို့ပြင် အဆိုပါ တပ်စခန်းများမှ စစ်ကောင်စီတပ်ဖွဲ့ဝင်များစွာ ထိုင်းနိုင်ငံဘက်သို့ ထွက်ပြေးသွားခဲ့သည်။
ထိုသို့ ထွက်ပြေးသွားသည့် စစ်ကောင်စီတပ်ဖွဲ့ဝင်များကိုလည်း ထိုင်း၏ အကူအညီဖြင့် မြ၀တီ မြို့အခြေစိုက် စစ်ကောင်စီလက်ကျန်တပ်စခန်း ခလရ(၂၇၅)တပ်ရင်းသို့ ပို့ဆောင်စုစည်းထားသည်ဟု သတင်းရင်းမြစ်အချို့က ပြောထားပြီး အင်အားရာချီရှိသည်ဟု ဆိုသည်။
KNU ပူးပေါင်းတပ်အနေဖြင့် မြန်မာ-ထိုင်းနယ်စပ်ရှိ စစ်ကောင်စီလက်ကျန်တပ်စခန်းများကို ဆက်လက် ရှင်းလင်းသွားမည်ဖြစ်၍ ယခုမေလကုန်နှင့် ဇွန်လပထမပတ်အတွင်း စစ်ရေးထူးခြားမှုများ ဆက်ရှိနေမည်ဟု KNU သတင်းရင်းမြစ်က ပြောသည်။
(နယ်စပ်တွင်တိုက်ပွဲဖြစ်ပွားပြီး ဒရုန်းဖြင့်တိုက်ခိုက်နေမှုကို ထိုင်းဘက်ခြမ်းမှတွေ့ရစဥ်)
