■ကျန်းမာရေးဝန်ကြီးဌာနထက်ပင် ကာကွယ်ရေးဝန်ကြီးဌာန က နှစ်ဆကျော်ပိုများ
မေ-၈ ၊၂၀၂၅။ရဲခေါင်/ People’s Spring
စစ်ကောင်စီက၂၀၂၂-၂၀၂၃ ဘဏ္ဍာရေးနှစ်တွင်ကိုဗစ်ရောဂါ ထိန်းချုပ်ကုစားရေး ခေါင်းစဥ်ဖြင့်အသုံးစရိတ်ခွဲပေးရာတွင် ကာကွယ်ရေးဝန် ကြီးဌာနသည် အများဆုံးထုတ်ယူသုံးစွဲခဲ့ပြီး ကျန်းမာရေးဝန်ကြီးဌာန၏အသုံးစရိတ်ထက်နှစ်ဆကျော် ပိုများခဲ့သည်။
စစ်တပ်အာဏာသိမ်းပြီးနောက်တစ်နှစ်ဖြစ်သော ၂၀၂၂-၂၀၂၃ ဘဏ္ဍာနှစ်တွင် စစ်ကောင်စီက ကိုဗစ် ၁၉ ကာကွယ်၊ထိန်းချုပ်၊ကုသရေးနှင့် ကုစားရေး အသုံးစရိတ် သုံးစွဲမှု အစီရင်ခံစာပါ အချက်အလက်များတွင် ကာကွယ်ရေးဝန်ကြီးဌာနက ကျပ်သန်း ၄,၈၆၄ သန်း( ကျပ် ၄ ဘီလီယံ)ကျော်သုံးစွဲခဲ့ပြီး ကိုဗစ်ကာကွယ်ရေးတွင်လည်း အသုံးစာရိတ်အများဆုံးယူခဲ့သည်ကို တွေ့ရသည်။
Public Service Announcement
စစ်ကောင်စီ၏ ကျန်းမာရေးဝန်ကြီးဌာနသည်ကိုဗစ် ၁၉ ကာကွယ်၊ထိန်းချုပ်၊ကုသရေးနှင့် ကုစားရေးအသုံး စရိတ်သည် ၂,၃၈၅ သန်း ( ကျပ် ၂ ဘီလီယံကျော်)သာရှိသည်။
ထိုဘဏ္ဍာရေးနှစ်တွင် စစ်ကောင်စီက ကိုဗစ်ရောဂါ ကာကွယ်၊ကုသ၊ထိန်းချုပ်ရေးအတွက် ဝန်ကြီးဌာ
န၂၇ ခု၊ဗဟိုဘဏ်နှင့် ပြည်ထောင်စု အစိုးရအဖွဲ့များ၏ အသုံးစရိတ်စုစုပေါင်းသည်ကျပ် ၁၂,၆၇၈ သန်း (ကျပ်၁၂ ဘီလီယံ)ကျော်သာရှိခဲ့သည်။ ရွေးကောက်ခံအရပ်သားအစိုးရလက်ထက်တွင် ကိုး
ဗစ်ကာကွယ်၊ကုသ ၊ထိန်းချုပ်ရေးနှင့် ကုစားရေးအတွက် ရန်ပုံငွေ ကျပ်ဘီလီယံ ၄၀၀ ချထားပေးခဲ့သည်။ စစ်အုပ်စုက အာဏာသိမ်းပြီးနောက် ထိုငွေများကို သိမ်းယူပြီး စစ်ကောင်စီလက်အောက်ခံဌာနများ ၊စစ်ကောင်စီ နှင့် နီးစပ်သော လုပ်ငန်းရှင်များကို ပေးခဲ့သည်။
ထို့ကြောင့် စစ်ကောင်စီ၏ ကာကွယ်ရေးဝန် ကြီးဌာနအသုံးစရိတ်သည် ကိုဗစ်အသုံးစာရိတ်အားလုံး၏ သုံးပုံတစ်ပုံကျော်ကိုပင်သုံးစွဲခဲ့ပြီး အများဆုံး ထုတ်ယူသုံးစွဲခဲ့ခြင်းလည်းဖြစ်သည်။
ပုံမှန်အားဖြင့် တစ်နိုင်ငံလုံး၏ ဘက်ဂျက်ခွဲဝေမှုတွင်လည်း ကာကွယ်ရေးဝန်ကြီးဌာနကအများဆုံးရယူသုံးစွဲပြီး ၂၀၂၄-၂၀၂၅ ဘဏ္ဍာရေးနှစ်ဘက်ဂျက်ကိုစစ်ကောင်စီက မထုတ်ပြန်သော်လည်း
ဘက်ဂျက်၏ ၃၀ ရာခိုင်နှုန်းကျော်ကို ကာကွယ်ရေးဝန်းကြီးဌာနကသုံးစွဲကြောင်း ဘက်ဂျက်လေ့လာသူအချို့ကပြောသည်။
“စစ်တပ်သည် လူထုထက်အမြဲအရေးပါတယ်ဆိုတာ သူတို့ခေါင်းထဲအမြဲရှိတယ်ပဲပြောရမယ်။သူတို့မသေရေးအတွက် နိုင်ငံဘဏ္ဍာကြိုက်သ
လောက်ယူသုံးခဲ့တာ။ကပ်ရောဂါ ကို အဓိက ကုသရတဲ့ ကျန်းမာရေးဝန်ကြီးဌာနရဲ့အသုံးစရိတ်ထက် နှစ်ဆကျော်တယ်ဆိုတာ အခု ပရော်ဖက်ရှင်နယ် အရမ်းဆန်ပါတယ်ဆိုတဲ့စစ် တပ်အောက် လုပ်နေတဲ့ ဆရာဝန်ဆိုတဲ့သူတွေ ကိုယ့်ဘာသာပြန်ပြီး မေးခွန်းထုတ်စေချင်တယ်”ဟု CDM ဆရာဝန်တစ်ဦးက လူထုနွေဦးသို့ ပြောသည်။
ကာကွယ်ရေးဝန်ကြီးဌာန နောက်တွင် စက်မှုဝန်ကြီးဌာန၊ကျန်းမာရေးဝန်ကြီးဌာန၊လူမှုဖူလုံရေးဌာနတို့ရှိကအများဆုံးဖြစ်သည်။
ကိုဗစ် ၁၉ ကပ်ရောဂါဖြစ်ပွားစဥ် အတွင်း စစ်တပ်အာဏာသိမ်းပြီးနောက် ဆေးဝါးပြတ်လပ်ခြင်း၊အောက်စီဂျင်အရင်းအမြစ်မလောက်ငှခြင်း၊ဖြတ်တောက်ခံရခြင်းနှင့် ကုသရေးစင်တာမလုံလောက်မှုများကြောင့် ပြည်တွင်း၌ သေဆုံးမှုသောင်းနှင့်ချီရှိခဲ့ရသည်။
“တစ်နိုင်တစ်ပိုင်အောက်စီဂျင်ထုတ်တဲ့ နေရာတွေကိုစစ်တပ်က လိုက်ပိတ်ခဲ့တယ်။ပြီးတော့ တပ်တွေထဲ အောက်စီဂျင်ထုတ်တဲ့အရင်းအမြစ်တွေဖော်ဖော်သီသီ လုပ်ပြီး လိုတဲ့သူတွေကို အောက်စီဂျင်အိုးအလိုက် သိန်းနဲ့ချီ ယူပြီးရောင်းခဲ့တယ်”ဟု ပဲခူးမြို့ အင်းတိုင်အခြေစိုက်တပ်မ ၇၇ မှ CDM စစ်သားတစ်ဦးက ကိုဗစ်ကပ်ရောဂါကာလအတွင်း စစ်တပ်လုပ်ခဲ့သည့်လုပ်ရပ်များကို လူထုနွေဦးသို့ ရှင်းသည်။
ထို့အပြင် စစ်ကောင်စီသည် ကိုဗစ်ကာကွယ်ဆေးများကို ၎င်း၏ ထိပ်ပိုင်းအရာရှိများနှင့် တပ်သားများကို အဆင့်လိုက် ကနဦးထိုးနှံခဲ့ပြီးမှသာ ပြည်သူများထံ ဖြန့်ဝေပေးခဲ့သည်။
စစ်ကောင်စီ၏အချက်အလက်များအရ ကိုဗစ်ပထမလှိုင်း ဒီချုပ်အစိုးရလက်ထက်၂၀၂၀ ခုနှစ် မတ်လ ၂၃ ရက်မှ သြဂုတ် ၁၄ ရက်ထိ ပိုးတွေ့သူ ၁၆၀၀ ရှိပြီး သေဆုံးသူခြောက်ဦးရှိသည်။စစ်တပ်အာဏာ သိမ်းစဥ် ကိုဗစ်ဒုတိယလှိုင်း ၂၀၂၁ ခုနှစ် မေလ၂၄ ရက်အထိ ပိုးတွေ့သူ ၁၄၀,၀၀၀ ကျော်တွင် သေဆုံးသူ ၃၂၁၀ ဦးရှိသည်။ သို့သော်အဆိုပါစာရင်းမှာ မမှန်ဘဲ မြေပြင်တွင်သေဆုံးသူသောင်းချီရှိခဲ့ကြောင်း နာရေးကူညီဆောင်ရွက်ခဲ့သူအချို့ကပြောသည်။
ထို့အတူ ၂၀၂၂ ခုနှစ် ဇန်နဝါရီ ၂၇ ရက်အထိ ကိုဗစ်တတိယလှိုင်းတွင် ပိုးတွေ့သူ လေးသိန်းခန့်တွင် သေဆုံးသူ ၁၆,၀၉၅ ဦးရှိခဲ့ပြီး စတုတ္ထလှိုင်း၂၀၂၂ ခုနှစ် စက်တင်ဘာ တွင် ကိုဗစ်ပိုးတွေ့သူ ၈၀,၀၀၀ခန့်၌ သေဆုံးသူ ၁၃၂ ဦး ရှိခဲ့သည်ဟုစစ်ကောင်စီကဆိုသည်။
