မေ – ၈၊၂၀၂၅ ၊ နိုင်ပကောင်း/People’s Spring
ကရင်ပြည်နယ် ၊ ကော့ကရိတ်မြို့နယ် ၊ ကျုံဒိုးမြို့ အနီး ပြီးခဲ့တဲ့ ဧပြီလကုန်ပိုင်းက ဖြစ်ပွားခဲ့ တိုက်ပွဲမှာ စစ်ကောင်စီတပ် ဘက်က ဒုတပ်ရင်းမှုးအပါအဝင် တပ်ဖွဲ့ဝင် ၃၀ ဦးခန့် အကျအဆုံးရှိပြီး တပ်ဆုတ်သွားရတယ်လို့ တိုက်ပွဲမှာ ပါဝင်တိုက်ခိုက်တဲ့ မွန်ပြည်လွတ်မြောက်ရေးတပ်တော်( MLA) ဒီနေ့ (မေလ ၈ )မှာ သတင်းထုတ်ပြန်ပါတယ်။
ဧပြီလ ၃၀ ရက်က ကျုံဲဒိုးမြို့အရှေ့ခြမ်း ၂ မိုင်ကျော်အကွာမှာရှိတဲ့ နွားခြံကုန်း ရွာဘက်ဆီ စစ်ကြောင်းထိုးလာတဲ့ စစ်ကောင်စီတပ်စစ်ကြောင်းနဲ့ KNU ဦးဆောင်တဲ့ ပူးပေါင်းတပ်တွေကြား တိုက်ပွဲဖြစ်တာပါ။
မွန်ပြည်လွတ်မြောက်ရေးတပ်တော်(MLA) ရဲ့ သတင်းထုတ်ပြန်ချက်အရတော့ တိုက်ပွဲ က ၁၀ နာရီ ကြာ မြင့်ခဲ့တယ်လို့သိရပါတယ်။
Public Service Announcement
တိုက်ပွဲအတွင်း စစ်ကောင်စီတပ်ရဲ့ ကမ်းရိုးတန်းတိုင်းစစ်ဌာနချုပ် လက်အောက်ခံ အမှတ်(၄၃၂) ခြေမြန်တပ်ရင်း ရဲ့ ဒုတပ်ရင်းမှုး ဗိုလ်မှုးစိုးမင်းထက် အပါအဝင် တပ်ဖွဲ့ဝင် ၃၀ ဦးခန့် သေဆုံးသွားပြီး စစ်ကြောင်းပျက်ကာ ပြန်ဆုတ်သွားကြတယ်လို့ MLA ကဆိုပါတယ်။
ကျုံဒိုးမြို့ဆီကို စစ်ကူတက်ရာမှာ ဘားအံမြို့ အခြေစိုက် တပ်မ (၂၂) လက်အောက်ခံ အမှတ် (၂၀၂ ) ခြေမြန်တပ်ရင်း အပြင် တနင်္သာရီ တိုင်း၊ မြိတ်မြို့အခြေစိုက်၊ ကမ်းရိုးတန်းတိုင်းစစ်ဌာနချုပ် လက် အောက် ခံတပ်ဖွဲ့တွေက ထုတ်နုတ်အင်အားတွေပါဝင်တယ်လို့ ကရင်စစ်ရေးသတင်းရင်းမြစ် က ပြောပါတယ်။
ပူးပေါင်းတပ်ဘက်ကတော့ မွန်ပြည်လွတ်မြောက်ရေးတပ်တော်(MLA)၊ မွန်ပြည်သစ်ပါတီ (NMSP-AD)၊ ပျံလွှားစစ်ကြောင်း၊ Lion Battalion စစ်ကြောင်း တို့ လည်းပါဝင်တယ်လို့သိရပါတယ်။
ကျုံဒိုးမြို့အနီး ဧပြီလကုန်ပိုင်းက ဖြစ်ပွားတဲ့တိုက်ပွဲသတင်းနဲ့ပတ်သက်ပြီး စစ်ကောင်စီဘက်က သတင်းထုတ်ပြန်တာမရှိပါဘူး။
ကျုံဒိုးမြို့ အသိမ်းမခံရရေးနဲ့ ၁၉ မိုင်ခန့်ရှည်လျားတဲ့ ကျုံဒိုး – ကော့ကရိတ်လမ်းပိုင်း ကို ပြန်လည်စိုးမိုးထိန်းချုပ်နိုင်ဖို့အတွက် စစ်ကောင်စီတပ်ဟာ ကျုံဒိုးမြို့တဖက်ကမ်း ဘားအံမြို့နယ် ၊ ဂျိုင်းရွာအုပ်စု ရိုးမဟာကျေးရွာမှာ အင်အားစုဖွဲ့ပြီး မြေပြင်ကနေ စစ်ကြောင်းထိုးဖို့ ကြိုးပမ်းခဲ့တယ်လို့သိရပါတယ်။
ကျုံဒိုးမြို့ပေါ်မှာတော့ အမှတ် (၅၄၅) ခြေမြန်တပ်ရင်း ၊ အမှတ် ( ၅၄၆) ခြေမြန်တပ်ရင်းနဲ့ ဗျုဟာ စခန်းကုန်း ရှိပါတယ်။
အဲဒီတပ်ရင်းတွေဟာ ကော့ကရိတ်မြို့အခြေစိုက် အမှတ် (၁၂) စစ်ဆင် ရေး ကွပ်ကဲမှုဌာနချုပ်လက်အောက်ခံ တိုက်ခိုက်ရေးတပ်တွေဖြစ်ပါတယ်။
ပြီးခဲ့တဲ့ သင်္ကြန် ကာလအတွင်း ကျုံဒိုးမြို့အနီးဝန်းကျင်နဲ့ ကျုံးဒိုး – ကော့ကရိတ် လမ်းပိုင်းမှာ တိုက်ပွဲတွေ ဖြစ်ပွားခဲ့ပါတယ်။
ကျုံဒိုးမြို့ကိုလည်း ပူးပေါင်းတပ်တွေက ဝန်းရံပိတ်ဆို့ခဲ့တဲ့အခြေအနေ ရှိခဲ့တယ်လို့ ကရင်စစ်ရေးသတင်းရင်းမြစ်က ပြောပါတယ်။
ကျုံဒိုးမှာ လက်ရှိအခြေအနေကတော့စစ်ရေးတင်းမာနေဆဲလို့သိရပါတယ်။
