မေ – ၆ ၊ ၂၀၂၅ ၊ ဆိုင်းမင်း /People’s Spring
ငလျင်ဒဏ်ကြောင့် ပြိုကျပျက်စီးသွားတဲ့ မန္တလေးမြို့က Sky Villa ကွန်ဒို အဆောက်အဦးကို ရှင်းလင်းရာ ဒီနေ့ (မေလ ၆ ) မှာ ကျပ်သိန်းရာချီ ၊ ရွှေတုံးတွေ နဲ့ ဒေါ်လာသောင်းဂဏန်း ရှာတွေ့ခဲ့တယ်လို့ မီးသတ်က ထုတ်ပြန်ပါတယ်။
ကွန်ဒို အဆောက်အဦး B အဆောင် ၊ C အဆောင် နဲ့ D အဆောင်တွေကို ဖယ်ရှားရှင်းလင်းချိန် B အဆောင်ရဲ့ အခန်းအမှတ် ( (I9) ကနေတွေ့ရှိခဲ့ရတာလို့ မီးသတ်က ဆိုပါတယ်။
ကျပ်သိန်း ရှစ်ရာကျော် ၊ အမေရိဒေါ်လာ သုံးသောင်း၊ ရွှေ ၁၀ သား ၁၀ တုံး အပါအဝင် အခြားသော လက်ဝတ်ရတနာပစ္စည်းတွေ ပါတွေ့ ရှိခဲ့ရတယ်လို့ မီးသတ်က ဖော်ပြပါတယ်။
Public Service Announcement
အခုလို တွေ့ရှိရတဲ့ ပစ္စည်းတွေကို ပိုင်ရှင်ကိုယ်စား မောင်တော်စပ်သူထံ ပစ္စည်းလက်ခံလွှဲပြောင်းရေးအဖွဲ့က လွှဲပြောင်းပေးလိုက်ပြီလို့ ဓာတ်ပုံနဲ့အသိပေးထားပါတယ်။
Sky Vill ကွန်ဒို ပြိုကျမှုမှာ မေလ ၃ ရက်အထိ မီးသတ်ရဲ့စာရင်းအရ ရုပ်အလောင်း ၁၃၉ ထိ တွေ့ရှိထားပြီးဖြစ်ပါတယ်။
အမျိုးသား ၄၄ ဦး ၊ အမျိုးသမီး ၇၃ဦး ၊ ကလေး ၁၃ဦး ၊ ကျားမ မခွဲခြားနိုင်တော့ သူ ၉ ဦး စုစုပေါင်း ၁၃၉ဦးရဲ့ ရုပ်အလောင်းတွေကို တွေ့ရှိထားတယ်လို့ မီးသတ်ရဲ့ထုတ်ပြန်ချက်အရသိရပါတယ်။
ပြိုကျသွားတဲ့ကွန်ဒိုအပျက်အစီးတွေထဲမှာပိတ်မိနေသူတွေကို ရှာဖွေကယ်ဆယ်ရေးလုပ်ခဲ့ရာမှာတော့ အသက်ရှင်လျက် ၅၂ ဦးကယ်ဆယ်နိုင်ခဲ့တယ်လို့ မီးသတ်က ဆိုထားပါတယ်။
ငလျင်မလှုပ်ခတ်ခင် မတ်လ ၂၇ ရက်အထိ Sky Villa ကွန်ဒိုမှာနေထိုင်သူဦးရေ ၃၄၈ ဦးရှိတယ်ဆိုတာကို မန္တလေးတိုင်းထွေအုပ်ရဲ့ စာရင်းတွေအရ သိရတယ်လို့ ကယ်ဆယ်ရေးအဖွဲ့ဝင်အချို့ ထံက တဆင့် သိရပါတယ်။
မန္တလေး လမ်း ၆၀ ၊ ၂၃ လမ်း နဲ့ ၂၄ လမ်းကြားမှာရှိတဲ့ Sky Villa ကွန်ဒိုကို ၁၁ ထပ်စီ ရှိတဲ့ အဆောက်အဦး၄ လုံး နဲ့ဖွဲ့စည်းထားပြီး ငလျင်ဒဏ်ခံရပြီးနောက် အဆောက်အဦး ၃ လုံးပြိုကျ သွားခဲ့တာပါ။
