မေ-၆၊၂၀၂၅။ရဲခေါင်/People’s Spring
စစ်ကောင်စီလက်အောက်ခံ PNO/PNA ပြည်သူ့စစ်မှ အထူးကွန်မန်ဒိုများ၏ လစာအတွက် ဒေသခံများထံမှကောက်ခံမည်ဟု PNO ပြည်သူ့စစ်နှင့်နီးစပ်သူများကပြောသည်။
ရုရှားနိုင်ငံမှသင်တန်းနည်းပြများငှားပြီး PNOအထူးကွန်မန်ဒို အပတ်စဥ် ၁ သင်တန်းဆင်းပွဲကို မေလလ ၂ ရက်နေ့က ပြုလုပ်ခဲ့ပြီး စစ်ကောင်စီ၏ အရှေ့ပိုင်းတိုင်း စစ်ဌာနချုပ်မှ အရာရှိများလည်း တက်ရောက်ခဲ့သည်။
“ရုရှားက သင်တန်းနည်းပြတွေကို ငှားပြီး စကစ စစ်သားတစ်ယောက်ကို စကားပြန်လုပ်ခိုင်းခဲ့တာပါ။စကစ စစ်အရာရှိကို စကားပြန်ထားကတည်း
Public Service Announcement
က PNO ဟာ စကစကို ယုံကြည်ကြောင်း အားကိုးကြောင်း မဟာမိတ်ဖြစ်ကြောင်း သက်သေပါပြနေတဲ့သဘောပါ”ဟု PNOပြည်သူ့စစ်တပ်ဖွဲ့ဝင်များနှင့်နီးစပ်သူတဦးကပြော သည်။
PNO ပြည်သူ့စစ်သည်လည်း အခြား တိုင်းရင်းသား လက်နက်ကိုင်များနည်းတူ စစ်ပညာအရည်အချင်းစွမ်းရည်မြှင့်နိုင်ကြောင်းဝါဒဖြန့်ချီခြင်းဖြစ်ကြောင်း ၎င်းကဆက်သည်။
“ဝင်ခွင့်ရတဲ့(ကွန်မန်ဒို) လူငယ်တွေရဲ့ လစာဖြစ်ဖြစ် PNA army တွေရဲ့ လစာတွေကို ၆လတစ်ကြိမ် ပြည်သူတွေထံ ကောက်ခံမှာပါ”ဟု PNO ပြည်သူ့စစ်နှင့်ဆက်စပ်သူက ပြောသည်။
စစ်ကောင်စီလက်အောက်ခံအဖြစ် ရပ်တည်ကာ အမျိုး သားရေးအမည်ခံပြီး မိသားစုအကျိုးစီးပွားကိုရှေ့တန်းတင်လုပ်နေသည့် PNO ပြည်သူ့စစ်ထိပ်ပိုင်း ခေါင်းဆောင်များ၏ လုပ်ရပ်ကို ဒေသခံများက သိရှိရန်လိုကြောင်း ပအိုဝ်းဒေသခံတစ်ဦးက ပြောသည်။
“ပင်လောင်း၊ ဟိုပုံး၊ ဆီဆိုင်ကို ကိုယ့်လူမျိုးတွေကပဲအုပ်ချုပ်လို့မရဘူးလား။စစ်တပ်လက်အောက်ခံတစ်ဆင့်နိမ့်ဘ၀နဲ့ဝေစား၊မျှစားပေးတာယူကျွေးတာစားခိုင်းတာလုပ် ထားရာနေ စေရာသွား ရုပ်သေးသာသာနဲ့ စစ်တပ်အလိုကျ ကိုယ့်လူမျိုး ကိုယ့်သယံဇာတကို အရှက်မရှိ ဖိနှိပ်ချယ်လှယ်နေတာမြင်ရတာ နှလုံးနာလိုက်တာ။ခများတို့မရှက်ပေမယ့်ကျနော်ရှက်တယ်။ ဘာကိုယ်ပိုင်အုပ်ချုပ်
ခွင့်ရဒေသလဲ ပြည်နယ်ဖွဲ့စည်းပုံအခြေခံဥပဒေလည်းမရှိ အာဏာလည်းမရှိ ပြည်နယ်အစိုးရတစ်ရပ်လည်းမရှိ ။ ရှက်ဖို့ကောင်းလိုက်တာဗျာ ။ အဲလက်နက်နဲ့ပြည်သူကိုအနိုင်ကျင့် စီးပွားရှာ ကိုယ်ကျိုးလုပ် ။စောက်ရှက်လေးလည်းရှိကြပါ”ဟု ၎င်းက PNO ပြည်သူ့စစ်ခေါင်းဆောင်များ၏လုပ်ရပ်များကို ဝေဖန်သည်။
ထိုအပြင် မတ် ၂၈ ရက်ကလှုပ်ခတ်ခဲ့သော စစ်ကိုင်းငလျင်တွင် ပင်လောင်းဒေသမှာ ထိခိုက်ပျက်စီးမှု များသော်လည်း စစ်ကောင်စီကရော ၊PNO/PNA ကပါ ကူညီပေးခဲ့ခြင်းမရှိကြောင်းဒေသခံအချို့ကပြောသည်။
“ပင်လောင်းကအထိများတယ်။လူသေတာကတော့နှစ်ယောက်ပဲအိမ်ပျက်စီးတာ၁၀၀၀လောက်။ရှိမယ်အဲ့ဒီနယ်မြေတွေကို စိုးမိုးတဲ့ PNO ပြည်သူ့စစ် နဲ့ စစ်ကောင်စီကတော့ ဘာမှမကူဘူး။PNOဆို မကူတဲ့အပြင် ပိုက်ဆံတွေကောက် လူသစ်စုဆောင်းတာတောင် မပျက်ဘူး”ဟုဒေသခံတဦးကပြောသည်။
စစ်ကိုင်ငလျင်ဘေးသင့်ဒေသဖြစ်သောပင်လောင်းမြို့နယ် တောင်ထီဗွာရွာတွင် စစ်သားသစ် ၂ ဦးတောင်းရာ မပေးနိုင်၍ တစ်အိမ်လျင် ၆၀၀၀ ကျပ်စီပေးရကြောင်းလည်း ဒေသခံတဦးကပြောသည်။
PNOပြည်သူ့စစ်ခေါင်းဆောင်များသည်စစ်ကောင်စီနှင့်အတူလူမျိုးရေးအကြောင်းပြချက်များ ဖန်တီးကာ ကရင်နီပြည်နယ် နှင့် ရှမ်းတောင်မှစစ်ရှောင်များကို အကြောင်းမဲ့သတ်ဖြတ်ခြင်းများပြုလုပ်ခဲ့သည်။
ထို့အပြင် ၂၀၂၃ ခုနှစ်က ကရင်နီပြည်နယ်၏ ၁၁၁၁ စစ်ဆင်ရေးအလွန်တွင် စစ်အင်္ဂါစဥ်မှ ပျက်ယွင်းသွားသည့်စစ်ကောင်စီတပ်ရင်းများကို PNOက ၎င်း၏ နယ်မြေတွင်လက်ခံကာ ကရင်နီသို့ ပြန်လည်ဝင်ရောက်နိုင်ရန်စစ်ကြောင်းထိုးရာတွင်ပါဝင်ခဲ့သည်။
လက်ရှိတွင်လည်းညောင်ရွှေမြို့နယ် နှင့်ဖယ်ခုံ မြို့နယ်တို့တွင် စစ်ကောင်စီနှင့်အတူ စစ်ရေးလှုပ်ရှားမှုများပြုလုပ်နေပြီးပြည်သူ့နေအိမ်များကို ဖျက်ဆီးနေကြောင်း ဒေသတွင်း လူ့အခွင့်အရေးအဖွဲ့များက ဆိုသည်။
PNOသည်၂၀၂၂ ခုနှစ်နောက်ပိုင်းကစ၍စစ်ကောင်စီထံမှလက်နက်များ ရယူပြီးနောက်ဒေသတွင်း တပ်သားသစ် အဓမ္မ စုဆောင်းခဲ့သည်။ဦးအောင်ခမ်းထီး ဦးဆောင်သည့် PNO သည် ၁၉၉၁ ခုနှစ်ကစ၍ အပစ်ရပ်ပြီးနောက် ရှမ်းပြည်တောင်ပိုင်း၌ အထူးဒေသအဖွဲ့ ၆ ကို စစ်တပ်ကသတ်မှတ်ပေးခဲ့သည်။ယခုနောက်ပိုင်းတွင် ခရိုနီလုပ်ငန်းရှင် နေဝင်းထွန်း ကို PNA ၏ ဒုတိယအကြီးဆုံးရာထူးခန့်အပ်ပြီး စစ်ကောင်စီ အလိုကျပိုမိုပြုလုပ်လာကြောင်းဒေသတွင်းစစ်ရေးရင်းမြစ်များကပြောသည်။
