“Mandalay 82” အမည်ပေးထားတဲ့ ဒုတိယအသုတ်ကယ်ဆယ်ရေးအဖွဲ့ထိုင်းစေလွှတ်

ဧပြီ – ၅ ၊ ၂၀၂၅ /People’s Spring

ငလျင်ဒဏ်သင့် မြန်မာနိုင်ငံကို ကူညီဖို့ ထိုင်းစစ်တပ်က “Mandalay 82” လို့အမည်ပေးထားတဲ့ ရှာဖွေကယ်ဆယ်ရေး အဖွဲ့ ဒုတိယအသုတ် ကို ဒီနေ့ (ဧပြီ ၅) ရက်မှာ ဒွန်မောင်းလေဆိပ်ကနေတဆင့် ထပ်မံ စေလွှတ်လိုက်ပြီလို့ ထိုင်းသတင်းမီဒီယာ Khaosod က ဖော်ပြပါတယ်။

ငလျင်လှုပ်ခတ်ပြီး သုံးရက်အကြာ မတ်လ ၃၀ ရက်က ထိုင်းကြည်းတပ် အထူးတပ်ဖွဲ့ဝင် ၅၅ ဦးကို ရှာဖွေကယ်ဆယ်ရေးအတွက် ကနဦး စေလွှတ်ထားပါတယ်။

အဲဒီ ၅၅ ဦးအဖွဲ့မှာတော့ စီမံခန့်ခွဲရေးအဖွဲ့ ၊ ရှာဖွေကယ်ဆယ်ရေးအဖွဲ့ ၊ အရေးပါ် ကုသရေးဆေးအဖွဲ့ ၊ ပျက်စီးဆုံးရှုံးမှု စစ်ဆေးရေးအဖွဲ့နဲ့ ဆက်သွယ်ရေးအဖွဲ့တွေ ပါဝင်ပြီး နေပြည်တော်မှာ ရှာဖွေကယ်ဆယ်ရေးလုပ်ဆောင်နေတယ်လို့ ရန်ကုန်မြို့မှာရှိတဲ့ ထိုင်းသံရုံးရဲ့ သတင်းဖော်ပြချက်တွေအရသိရပါတယ်။

Public Service Announcement

အခုတစ်ခေါက်အသုတ်မှာတော့ ထိုင်းတပ်ဖွဲ့ဝင် ဘယ်နှစ်ဦးပါဝင်မလဲဆိုတာကို မထုတ်ပြန်လာပေမယ့် သတင်းဓာတ်ပုံအရ ဦးရေ ၅၀ ထက်မနည်း စုဖွဲ့ထားတာတွေ့ရပါတယ်။

ထိုင်းနိုင်ငံဟာလည်း မြန်မာနိုင်ငံမှာ လှုပ်ခတ်သွားတဲ့ ငလျင်ဒဏ်သင့်ခဲ့ရပြီး မြို့တော်ဘန်ကောက် က ဆောက်လုပ်စ မိုးမျှော်တိုက် ပြိုကျပျက်စီးမှု မှာ တစ်ပတ်တာ ရှာဖွေကယ်ဆယ်မှုအတွင်း အသက်ရှင်လျှက် ၁၀ ဦးကိုကယ်ထုတ်နိုင်ခဲ့ပြီး အလောင်း ၁၅ လောင်းသယ် ထုတ်နိုင်ခဲ့ပေမယ့် ပိတ်မိနေသူ ၇၉ ဦးရှိနေတယ်လို့ ထိုင်းသတင်းမီဒီယာတွေက ဖော်ပြထားကြပါတယ်။