ဟာနာဆန်/People’s Spring
မကွေးတိုင်း၊ ပေါက်မြို့နယ် ရေပြာကျေးရွာရှိ နယ်မြေရဲစခန်း၌ ဖမ်းဆီးခံထားရသည့် PDF ရဲဘော် ငါးဦး အချုပ်ခန်းဖောက် ထွက်ပြေးလွတ်မြောက်လာကြောင်း ပြည်သူ့ကာကွယ်ရေးတပ်မတော် ပခုက္ကူခရိုင် အမှတ်(၁၆)တပ်ရင်းမှ ပြန်ကြားရေးတာဝန်ခံက ပြောသည်။
ပေါက်မြို့နယ် ရေပြာရဲစခန်း၌ ဖမ်းဆီးခံထားရသည့် အမျိုးသမီးရဲဘော်တစ်ဦးအပါအဝင် ရဲဘော် ၅ ဦးသည် ယမန်နေ့ (နိုဝင်ဘာ ၂၅ ရက်) နံနက် ၂ နာရီခန့်က အချုပ်ခန်းဖောက်၍ လွတ်မြောက်လာခဲ့ခြင်းဖြစ်ကြောင်း ပခုက္ကူခရိုင် အမှတ် (၁၆)တပ်ရင်းမှ ပြန်ကြားရေးတာဝန်ခံက ပြောသည်။
“အမိုးတွေဖောက်ပြီး ပြေးလာတယ်။ ရဲစခန်းထဲက အစောင့်တွေ ပေါ့နေတဲ့အချိန်၊ သူတို့အိပ်နေတဲ့အချိန်။ ဖောက်ဖို့ဆိုတာလည်း သူတို့ လနဲ့ချီပြီး ကြိုးစားခဲ့ရတယ်။ ကင်းလွတ်တဲ့အချိန်၊ ပေါ့တဲ့အချိန်မှာ ထွက်ပြေးလာတာ။”ဟု ၎င်းတာဝမ်ခံက ရှင်းပြသည်။
Public Service Announcement
လွတ်မြောက်လာသူများသည် ပခုက္ကူခရိုင် အမှတ်(၁၆)တပ်ရင်းမှ တပ်ဖွဲ့ဝင်ရဲဘော် သုံးဦးနှင့် အခြားဒေသတွင်း LPDF အဖွဲ့တစ်ဖွဲ့မှ အမျိုးသမီးတပ်ဖွဲ့ဝင် ရဲဘော်တစ်ဦးအပါအဝင် နှစ်ဦးတို့သည် မေလနှင့် သြဂုတ်အတွင်းက ဖမ်းဆီးခံခဲ့ရခြင်းဖြစ်ကြောင်း သိရသည်။
ပေါက်မြို့နယ်အရှေ့ဘက် (၁၂)မိုင်အကွာရှိ ရေပြာရဲစခန်းကို တော်လှန်ရေးတပ်ဖွဲ့များက မကြာခဏတိုက်ခိုက်နေသည်။
၂၀၂၂ဖေဖော်ဝါရီကလည်း ရေပြာရဲစခန်းအား တော်လှန်ရေးတပ်ဖွဲ့များက တိုက်ခိုက်ရာ စခန်းမှူးအပါအဝင် ရဲ ၅ ဦး သေဆုံးခဲ့သည်။ ၂၀၂၃ ဇွန်လကလည်း ရေပြာရဲစခန်းမှ ရဲတပ်ကြပ်တစ်ဦးကို တော်လှန်ရေးတပ်ဖွဲ့များက ပစ်ခတ်ခဲ့သေးသည်။
မကွေးတိုင်းရှိ ပခုက္ကူ၊ ပေါက်နှင့် မြိုင်မြို့နယ်များတွင် စစ်ကောင်စီ၏ စခန်းများ၊ ပျူစောထီးရွာများအား တော်လှန်ရေးတပ်ဖွဲ့များက လမ်းကြောင်းပိတ်ဆို့ဖြတ်တောက်ထားသည်။
