“ကျနော်တို့ဘက်က (၄) စီးစလုံးကို လိုက်ပစ်တာ (၁) စီးက အမြီးပိုင်းကိုထိသွားပါတယ်။” ခိုင်သုခ
ထားမြတ်၊သရဖူ /People’s Spring
ရက္ခိုင်ပြည်နယ် အမ်းမြို့သိမ်းတိုက်ပွဲတွင် စစ်ကောင်စီ ရဟတ်ယာဉ်လေးစီးကိုပစ်ခတ်ရာ တစ်စီးကို ထိမှန်ခဲ့ကြောင်း ရက္ခိုင့်တပ်တော်(AA) ပြောရေးဆိုခွင့်ရှိသူ ခိုင်သုခက အတည်ပြု သည်။
အနောက်ပိုင်းတိုင်းစစ်ဌာနချုပ်(နပခ) အခြေစိုက်ရာ အမ်းမြို့ကို အပြီးသတ် သိမ်းပိုက်နိုင်ရေး AAက ထိုးစစ်ဆင်နေစဉ် နိုဝင်ဘာ ၁၀ရက် မွန်းလွဲ၂နာရီ ခွဲတွင် ပစ်ချခဲ့ခြင်းဖြစ်သည်ဟု ခိုင်သုခက ပြောသည်။
“မနေ့က အကြမ်းဖက် စစ်ကောင်စီက အမ်း၊ နပခ ဌာနချုပ် ပတ်ဝန်းကျင်မှာ သူတိုရဲ့တပ်ဖွဲဝင် လူနာတွေ၊ လက်နက်ခဲယမ်း၊ ရိက္ခာ၊ စစ်အင်အား လာပို့တဲ့ ရဟတ်ယာဉ် (၄) စီး၊ ရှေ့ဆင့်နောက်ဆင့် ဆင်းသက်လာတာရှိပါတယ်။ ကျနော်တို့ဘက်က (၄) စီးစလုံးကို လိုက်ပစ်တာ (၁) စီးက အမြီးပိုင်းကိုထိသွားပါတယ်။ဒါပေမယ့် အဲဒီထိသွားတဲ့ ရဟတ်ယာဉ်ဟာ အဲဒီနေရာမှာ ထိုးကျပျက်စီးသွားတာမျိုးမဟုတ်ဘဲ သူတို့ အကြမ်းဖက် စစ်ကောင်စီထိမ်းချုပ်ထားတဲ့ နေရာအထိရောက်အောင် သူတိုကြိုးစားထိန်းမောင်းပြီးမှ သတ်မှတ်နေရာကိုမရောက်ဘဲ အဆင်ပြေတဲ့တစ်နေရာမှာဆင်းသက်သွားတယ်လို ကျနော်တို့ သိရပါတယ်” ဟု ခိုင်သုခက People’s Spring ၏ မေးမြန်းမှုကိုဖြေကြားသည်။
Public Service Announcement
အဆိုပါ ရဟတ်ယာဉ်သည် မကွေးတိုင်း ငဖဲမြို့နယ်၊ ကျောက်ဆုံရွာ အနီးသို့ ဆင်းသွားသည်ဟု စုံစမ်းသိရကြောင်းလည်း ULA/AA ပြောရေးဆိုခွင့်ရှိသူက ပြောသည်။
မကွေးတိုင်း၊ ပွင့်ဖြူမြို့နယ်မှ ဒေသခံတစ်ဦးကလည်း”ဖုန်းလိုင်းတွေမရလို့ အသေးစိတ်တော့မသိရဘူး။ ဒါပေမယ့် ရဟတ်ယာဉ်ဆင်းရတာမှန်တယ်ဗျ။ ကျတော် အသေးစိတ်သိရတာနဲ့ထပ်ပြောမယ်” ဟု ပြောသည်။
အမ်းမြို့နယ် ဘက်မှ ပျံသန်းလာသော Mi 17ရဟတ်ယာဥ်တစ်စီး စက်ချို့ယွင်း၍ငဖဲမြို့နယ်ကျောက်ဆုံရွာဘုန်းကြီးကျောင်းအနီး တွင်နိုဝင်ဘာ ၁၁ရက် ၂ နာရီခွဲဝန်းကျင်ချိန်၌အရေးပေါ်ဆင်းသက်ခဲ့ရကြောင်း စုံစမ်းသိရသည်။
စစ်ရေးသတင်းများရေးသားနေသော CDM အရာရှိ ဗိုလ်ကြီးဇင်ယော်ကလည်း အမ်းတိုက်ပွဲမှ ဒဏ်ရာရစစ်သားများသယ်ဆောင်လာသည့် စစ်ကောင်စီရဟတ်ယာဉ်တစ်စင်း ရခိုင်ရိုးမပေါ်၌ ပစ်ခတ်ခံရပြီး ထိမှန်သွားကြောင်း လူမှုကွန်ရက်၌ ရေးသားထားသည်။
“ယမန်နေ့က အမ်း နပခထဲကနလင်းနို့(လူနာ)တွေကောက်လာတဲ့ ပုစင်းတစ်ကောင် ရခိုင်ရိုးပေါ် ဖြတ်အသွားမှာ အောက်ကနေ ပစ်ခတ်လိုက်ပါတယ်။ထိတော့ ထိသွားတယ်။တကယ်တမ်း ခရီးစဉ်က တပ်မ ၈၈ (မကွေး) ကွင်းထဲကို ဆင်းရမှာ။အခြေအနေမဟန်လို့ ဆူးပတောင်းရွာကျောက်ဆုံ ဘုန်းကြီးကျောင်းကို အရေးပေါ်ဆင်းသက်လိုက်ရတယ်” ဟု ဗိုလ်ကြီးဇင်ယော်ကရေးသားထားသည်။စစ်ကောင်စီရဟတ်ယာဉ်သည် ဆူးပတောင်းရွာကျောက်ဆုံ ဘုန်းကြီးကျောင်းဝင်းအတွင်း နိုဝင်ဘာ၁၁ ရက်အထိ ရှိနေဆဲဖြစ်ကြောင်း ၎င်းက ဆက်လက်ရေးထားသည်။
ပြီးခဲ့သည့် အောက်တိုဘာလလယ်ကလည်း နပခမှစစ်ကောင်စီအရာရှိများလိုက်ပါလာသည့် ရဟတ်ယာဉ်တစ်စီးကို နပခဝင်းအတွင်း AAကပစ်ခတ်တိုက်ခိုက်ခဲ့ကြောင်းသတင်းများ ထွက်ခဲ့သည်။ အဆိုပါသတင်းကို AAက မထုတ်ပြန်ခဲ့ပေ။
နိုဝင်ဘာ ၁၀ ရက်တွင် ရဟတ်ယာဥ်များကိုပစ်ခတ်သည်ကိုမှ AA ကအတည်ပြုပေးခဲ့ခြင်းဖြစ်သည်။ ထို့အပြင် AA က ၂၀၂၄ ဖေဖော်ဝါရီ ၃ ရက်က စစ်တပ်ရဟတ်ယာဥ်ကို ပစ်ချပြီးပျက်စီးနေသော ရဟတ်ယာဥ်ကို AA တပ်ဖွဲ့ဝင်များက စစ်ဆေးနေသော သတင်းဓါတ်ပုံကို ထုတ်ပြန်ခဲ့သည်။ သို့သော် မည်သည့်တိုက်ပွဲတွင် မည်သည့်နေ့က ပစ်ချသည်ဆိုသော အချက်အလက်အသေးစိတ်ကို မထုတ်ပြန်ပေ။
အမ်းမြို့သိမ်းတိုက်ပွဲနှင့် ပတ်သက်၍ အာရက္ခတပ်တော်က အောက်တိုဘာလ၇ရက်တွင် နောက်ဆုံးသတင်းထုတ်ပြန်ပြီး နောက်ဆက်တွဲ ထုတ်ပြန်ခြင်းမရှိသေးပေ။
လာမည့် နိုဝင်ဘာလ ၁၃ရက်သည် ရခိုင်ပြည်နယ်၌မြို့သိမ်းတိုက်ပွဲများဖော်ဆောင်နေသည့် ၁၀၂၇ စစ်ဆင်ရေး ၁နှစ် ပြည့်မည့်နေ့ဖြစ်သည်။ AAက ယင်းနေ့တွင် သတင်းထုတ်ပြန်လာနိုင်ကြောင်း စစ်ရေးအကဲခတ်အချို့ကပြောသည်။
AAက ၁၀၂၇ စစ်ဆင်ရေး တစ်နှစ်နီးပါးအတွင် ရခိုင်ပြည်နယ်တွင် မြို့ ပေါင်း ၁၄ မြို့နှင့် ချင်းပြည်နယ်တွင် ပလက်ဝ မြို့နယ်တို့ကို သိမ်းပိုက်ထိန်းချုပ်ထားသည်။ထို့အပြင် အမ်း ၊မောင်တော ၊တောင်ကုတ်၊ ဂွ မြို့နယ်ို့ကိုအပြီးသတ်သိမ်းပိုက်ရန် ထိုးစစ်ဆက်နေသည်။
