စစ်ကိုင်းမြို့နှင့် အနီးဆုံးတွင် ပထမဆုံးအကြိမ် တိုက်ပွဲဖော်ဆောင်လာခြင်းဖြစ်
ဇေအောင်/People’s Spring
စစ်ကိုင်းတက္ကသိုလ်အဝင်၌ တပ်စွဲထားသော စစ်ကောင်စီတပ်သားများအား ဝင်ရောက် တိုက်ခိုက်ရာ စစ်ကောင်စီတပ်သားများ ထိခိုက်သေဆုံးမှုများကြောင်း SAGAING PDF ၏ တာဝန်ရှိသူတစ်ဦးက ပြောသည်။
နိုဝင်ဘာ ၅ ရက် နံနက် ၅ နာရီကျော်က စစ်ကိုင်းမြို့နယ်၊ မုံရွာ – မန္တလေးလမ်းပိုင်း၊ ပဲကတိုးကျေးရွာရှိ စစ်ကိုင်းတက္ကသိုလ်တွင် တပ်စွဲထားသည့် စစ်ကောင်စီတပ်သားများအား ဝင်ရောက် တိုက်ခိုက်ခဲ့ရာ ထိခိုက်သေဆုံးမှုရှိကြောင်း SAGAING PDF ၏ တာဝန်ရှိသူတစ်ဦးက ပြောသည်။
ထို့နောက် ရဲဘော်များ ပြန်လည်ဆုတ်ခွာချိန်တွင် တပ်မ(၃၃)မှ စစ်ကူယာဥ်တန်းရောက်ရှိလာ၍ ဖြတ်တောက်ရေးအဖွဲ့က မိုင်းဆွဲတိုက်ခိုက်ခဲ့ရာ စစ်ကောင်စီတပ်သားများ သေဆုံးမှုရှိကြောင်း၊ထို့အပြင် တက္ကသိုလ်ဝင်းအတွင်းရှိ စစ်သားများ ကျောင်းပေါက်ဝ အရောက်တွင်လည်း မိုင်းတစ်လုံးဆွဲကာ ထပ်မံတိုက်ခိုက်ခဲ့ကြောင်း အထက်ပါတာဝန်ရှိသူက ပြောသည်။
Public Service Announcement
အဆိုပါ တိုက်ပွဲတွင် စစ်ကောင်စီတပ်သား၂၀ ခန့်သေဆုံးပြီး အများအပြားဒဏ်ရာရရှိသည်ဟု SAGAING PDF က ဆိုသည်။ သို့သော် စစ်ကောင်စီတပ်၏ ထိခိုက်သေဆုံးမှုအား သီးခြားအတည်ပြုနိုင်ခြင်း မရှိသေးပေ။
“၁၅မိနစ်ဝန်းကျင်ပဲ ကြာပါတယ်။ စစ်ဆင်ရေးဖော်ဆောင်ခဲ့တဲ့အနီးနားတစ်ဝိုက်မှာ စခ ၅၀ဝန်းကျင်ခန့်ရှိပါတယ်။”ဟု SAGAING PDF ၏ တာဝန်ရှိသူက ပြောသည်။
စစ်ကိုင်းတက္ကသိုလ်သည် ရဲသင်တန်းကျောင်းနှင့် မနီးမဝေးတွင်တည်ရှိပြီး မုံရွာ-မန္တလေးလမ်းပေါ်ရှိ တပ်မ (၃၃)၊ ကံတလူတိုးဂိတ်၊ အုန်းတောဂိတ်များနှင့်လည်း မိနစ်ပိုင်းအတွင်း ရောက်ရှိနိုင်သည့်နေရာ တစ်ခုဖြစ်သည်။ ထို့အပြင် စစ်ကိုင်းမြို့နှင့်အနီးဆုံးတွင် ပထမဆုံးအကြိမ် တိုက်ပွဲဖော်ဆောင်လာခြင်းလည်း ဖြစ်သည်။
“ဒီစစ်ဆင်ရေးလုပ်ဖို့ နှစ်ကြိမ်တောင်ကြိုးစားခဲ့ရတာဖြစ်ပြီး ပထမတစ်ကြိမ်မှာ အရပ်သားထိခိုက်မှုရှိနိုင်လို့ Missionဖျက်သိမ်းခဲ့ရပါတယ်။”ဟု SAGAING PDF ၏ တာဝန်ရှိသူက ပြောသည်။
အဆိုပါ စစ်ဆင်ရေးကို SAGAING PDFနှင့်လင်းယုန်ညီနောင်ပြောက်ကျားတပ်ဖွဲ့တို့ ပူးပေါင်းတိုက်ခိုက်ခဲ့ခြင်းဖြစ်သည်။
တိုက်ပွဲဖြစ်ပွားခဲ့၍ မုံရွာ-မန္တလေးလမ်းမကြီးအား နာရီပိုင်းအကြာ ယာယီပိတ်ထားခဲ့သည်။
နံနက် ၁၁ နာရီခန့်တွင်မူ လမ်းကြောပြန်ပွင့်ပြီး ခရီးသွားကားများ ပြန်လည်ဖြတ်သန်းခဲ့ကြောင်း ဒေသခံများက ပြောသည်။
စစ်ကိုင်းမြို့နယ်အတွင်း မုံရွာ – မန္တလေးလမ်းမကြီးပေါ်တွင် စစ်ကောင်စီတပ်က စစ်ကိုင်းတက္ကသိုလ်ဂိတ်အပြင် ကံတလူတိုးဂိတ်၊ အုန်းတောလမ်းဆုံ၊ ညောင်ပင်ဝန်းရွာတို့၌ တပ်စွဲထားသည်။
ထို့အပြင် စစ်ကိုင်းမြို့နယ်အတွင်းရှိ စစ်ရေးပစ်မှတ်များကိုဆက်လက်တိုက်ခိုက်သွားမည်ဟု SAGAING PDF အဖွဲ့က သတိပေးထားသည်။
