ဆဏ်း / People’s Spring
တော်လှန်ရေးကာလမှာ ပထမဆုံးတစ်ကိုယ်တော်ဖျော်ဖြေပွဲအနေနဲ့ London မှာ နိုဝင်ဘာ ၂ ရက်နေ့ပြုလုပ်မယ်လို့ ဖြူဖြူကျော်သိန်းက အသိပေးထားပါတယ်။
“Phyu Phyu in London! စဖွင့်ပါပြီ။ ဘာလုပ်ဖို့လဲ?အိမ်အတူတူပြန်ဖို့။” လို့ ဖျော်ဖြေပွဲပြလုပ်ရတဲ့ ရည်ရွယ်ချက်ကို ဖြူဖြူကျော်သိန်းက ပြောထားပါတယ်။
Public Service Announcement
ဖျော်ဖြေပွဲတွေကို Tour အနေနဲ့ပြုလုပ်မှာဖြစ်ပြီး နောက်တစ်ပွဲကတော့ သူမရဲ့ ကျန်းမာရေးအခြေအနေအပေါ်မူတည်တယ်လို့ဆိုပါတယ်။
“ဒီ Tour ရဲ့ နောက်ဆုံးမြို့က ဘယ်မှာလဲ ဆိုတော့…
ရန်ကုန်မြို့ ပြည်သူ့ရင်ပြင်မှာပါ။ ဘယ်တော့လဲဆိုတော့…ဖြူဖြူတို့ ပြည်သူတွေ အားလုံး အားကုန်ရုန်းနိုင်တဲ့တစ်နေ့။တကယ်ဖြစ်မှာလား။
အဖြေက ခု ဒီစာကို ဖတ်နေတဲ့ လူတစ်ယောက်ချင်းစီရဲ့ လက်ထဲမှာပဲ ရှိပါတယ်။” လို့ဖြူဖြူကျော်သိန်းက ပြောပါတယ်။
ဖျော်ဖြေပွဲလက်မှတ်တွေကို ဒေါ်လာ ၅၀ ၊၇၅၊ ၁၀၀ နဲ့ ၁၂၅ သတ်မှတ်ထားပြီး အောက်တိုဘာ ၉ ရက်မှာစတင်ရောင်းချနေပြီလို့ ပွဲကိုစီစဉ်တဲ့ Myanmar Events in UK ရဲ့ပေ့ခ်ျမှာ အသိပေးထားပါတယ်။
ပွဲမတိုင်ခင် ပရိသတ်နဲ့ ရင်းရင်းနှီးနှီးတွေ့ဆုံမယ့်အစီအစဉ်အတွက်လူဦးရေ ၁၅၀ သတ်မှတ်ထားပြီး ဝင်ကြ ဒေါ်လာ ၅၀ ကျသင့်မယ်လို့ ကြေညာထားပါတယ်။
“လက်မှတ်ဈေး။ အရမ်းဈေးကြီးပါတယ်။ ဘာဖြစ်လို့လဲ။ မြန်မာပြည်ရဲ့ ဒုက္ခက ဈေးကြီးသလို မြန်မာပြည်သူတွေကလည်း တန်ဖိုးကြီးကြီးထား ကူညီထိုက်တဲ့သူတွေ မို့ပါ။ ” လို့ ဖြူဖြူကျော်သိန်းက ပြောပါတယ်။
ဖြူဖြူကျော်သိန်းက အာဏာသိမ်းတဲ့ကာလစတင်ကတည်းက ပြည်သူဘက်ကနေ ရပ်တည်ခဲ့သူဖြစ်ပြီး တော်လှန်ရေးနဲ့ သက်ဆိုင်တဲ့ ကမ်ပိန်းတွေအတွက် ပါဝင်ပေးနေသလို ဒီကာလခံစားမှုတွေကိုယ်တိုင်သီချင်းရေးကာ တင်ဆက်ပေးနေသူပါ။
ဒီဖျော်ဖြေပွဲကရတဲ့ငွေတွေကလည်း မြေပြင်ကိုပဲ စီးဆင်းမှာဖြစ်ပြီး ဒီပွဲအတွက် ဖြူဖြူကျော်သိန်းက အနုပညာကြေး လုံးဝမယူဘူးလို့ သိရပါတယ်။
