လူအေး/People’s Spring
စစ်ကိုင်းတိုင်း၊ ပင်လည်ဘူးမြို့ကို ပြည်သူ့ကာကွယ်ရေးတပ်ဖွဲ့များက ယနေ့(အောက်တိုဘာ ၈ရက်)နံနက်ပိုင်းတွင် သိမ်းယူလိုက်ပြီးနောက် စစ်ကောင်စီသည် နေ့လည်ပိုင်းကစတင်၍ လေကြောင်းမှ ဗုံးကြဲတိုက်ခိုက်နေကြောင်း သတင်းရရှိသည်။
ပင်လည်ဘူးမြို့ရှိ စစ်ကောင်စီစခန်းများကို ပြည်သူ့ကာကွယ်ရေးတပ်ဖွဲ့များက မကြာခဏတိုက်ခိုက်ခဲ့ပြီး မြို့သိမ်းတိုက်ပွဲကို သြဂုတ် ၁၇ရက်တွင် စတင်ခဲ့ခြင်းဖြစ်သည်။
Public Service Announcement
” စခန်းအသေးတွေကို လက်လွှတ်လိုက်ရပြီးတဲ့နောက် စစ်ကောင်စီက ရဲစခန်းမှာ အခိုင်မာတပ်စွဲပြီး ခံစစ်ပြင်ခဲ့တာပါ။ သူတို့ကို လနဲ့ချီပြီး ရိက္ခာဖြတ်တောက်ခဲ့ပါတယ်။ ဒီကြားထဲမှာ တိုက်ပွဲတွေလည်း အပြင်းအထန်ဖြစ်ခဲ့ပြီး ကိုယ့်ဘက်ကထိခိုက်မှုတွေလည်းရှိခဲ့တယ်။ စစ်အုပ်စုက တောင့်မခံနိုင်တော့တဲ့အတွက် လက်နက်ချတာပါ”ဟု စစ်ကိုင်းတိုင်းမှ စစ်ရေးသတင်းရင်းမြစ်တစ်ဦးက ပြောသည်။
ပင်လည်ဘူးမြို့သိမ်းတိုက်ပွဲမှာ ရက်ပေါင်း ၅၃ရက်တိတိကြာမြင့်ခဲ့ပြီး စစ်သုံ့ပန်းအများအပြားဖမ်းမိထားသလို စစ်ကောင်စီတပ်ဖွဲ့ဝင်မိသားစုဝင်များအား ၎င်းတို့သွားလိုသည့် ဝန်းသိုမြို့သို့ ပို့ဆောင်ရန် ပြင်ဆင်နေကြောင်း အဆိုပါ စစ်ရေးသတင်းရင်းမြစ်က ပြောသည်။
ဝန်းသိုမြို့သည် ပင်လယ်ဘူးမြို့နယ်ထိဆက်နေပြီး စစ်ကောင်စီ၏ ခမရ(၁၀၂)အခြေစိုက်သည်။
ပင်လယ်ဘူးမြို့သိမ်းတိုက်ပွဲအတွင်း လက်နက်ခဲယမ်းအများအပြား သိမ်းဆည်းရရှိထားကာ စစ်သုံ့ပန်း ၅၀ခန့် ဖမ်းမိထားကြောင်း သတင်းရရှိသည်။
ပင်လယ်ဘူးမြို့သိမ်းနိုင်ပြီဖြစ်ပြီး ၎င်းတို့တပ်ရင်းမှ ရဲဘော်တစ်ဦး ကျဆုံးခဲ့ရသည်ဟု ယင်းမာပင်ခရိုင် တပ်ရင်း (၁၂)မှ တာဝန်ရှိသူတစ်ဦးက အသိပေးထားသည်။
“ပင်လည်ဘူး ရတာဟုတ်တယ်။ ရှင်းလင်းရေးတွေ လုပ်နေတယ်။ အသေးစိတ်ကိုတော့ ကာကွယ်ရေူဝန်ကြီးဌာနဘက်က အသေးစိတ်ထုတ်ပြန်မှာပါ”ဟု အမျိုးသားညီညွတ်ရေးအစိုးရ၊ကာကွယ်ရေးဝဣ်ကြီးဌာနမှ တာဝန်ရှိသူတစ်ဦးက ပြောသည်။
ယနေ့ညနေ ၃နာရီခွဲအချိန် နောက်ဆုံးရရှိထားသောသတင်းများအရ မိတ္ထီလာလေတပ်မှတက်လာသည့် စစ်ကောင်စီလေယာဉ်များက ပင်လည်ဘူးမြို့ကို ပစ်ခတ်တိုက်ခိုက်နေကြောင်း သတင်းရရှိသည်။
