ဆိုင်းမင်း/People’s Spring
ရွေးကောက်ခံအရပ်သားအစိုးရ မန္တလေးတိုင်းဝန်ကြီးချုပ် ဒေါက်တာဇော်မြင့်မောင်ရဲ့ နာရေးကို ဒီနေ့ မန္တလေး မှာ ပြုလုပ်ရာ မန္တလေးမြို့ပြည်သူလူထု လိုက်ပါပို့ဆောင်ပေးကြတာတွေ့ရပါတယ်။
ဒေါက်တာဇော်မြင့်မောင်ရဲ့ ရုပ်အလောင်းကို သယ်ဆောင်လာတဲ့စျာပနာယာဉ်တန်းကို မြို့လုံးကျွတ်နီးပါး လူထုပရိသတ်က လိုက်ပါ ပို့ဆောင်ကြသလို ယာဉ်တန်းဖြတ်သန်းသွားရာ လမ်းတလျောက်မှာလည်း ပြည်သူတွေက စောင့်ကြိုပြီး သူတို့ချစ်ခင်လေးစားရတဲ့ ဝန်ကြီးချုပ်ရဲ့ နောက်ဆုံးခရီးကို ဂါရဝပြု နှုတ်ဆက်ကြပါတယ်။
Public Service Announcement
” နာရေးကားဖြတ်သွားတာကို လမ်းဘေးညာ နှစ်ဖက်လုံး ရပ်စောင့်ပြီး ဂါရဝပြုကြတာ”လို့ နာရေးကိုလိုက်ပါပို့ဆောင်တဲ့ မန္တလေးမြို့ခံလူငယ်တစ်ဦးကပြောပြပါတယ်။
“တချို့ဆို မိသားစုလိုက် ကားတွေနဲ့လမ်းဘေးကနေ စောင့်ပြီး ပို့ကြတာ” လို့ အဲဒီလူငယ်က ဆိုပါတယ်။
ဒေါက်တာဇော်မြင့်မောင်ရဲ့ နာရေးကို မန္တလေးက တောင်အင်းမြောက်အင်းသုဿန် မှာ ပြုလုပ်မှာဖြစ်ပြီး ဒီနေ့မနက်ပိုင်း ၁၀ နာရီအချိန်မှာ နေအိမ်ကနေ နာရေးကားတွေ စတင်ထွက်ခွာတာပါ။
အာဏာသိမ်းတဲ့ ရက်ကတည်းက ဖမ်းဆီးခံရပြီး ပုဒ်မပေါင်းများစွာနဲ့ စစ်ကောင်စီက ထောင်ဒဏ် ၂၉ နှစ် ချခံရတဲ့ NLD ပါတီ ဒုဥက္ကဋ္ဌ ဒေါက်တာဇော်မြင့်မောင်ဟာ မနေ့ ဒီဇင်ဘာလ ၇ ရက်မနက်ပိုင်းက ဆုံးပါးခဲ့တာပါ။
အသက် ၇၃ နှစ်အရွယ် သွေးကင်ဆာဝေဒနာသည် ဒေါက်တာဇော်မြင့်မောင်ကို စစ်ကောင်စီက အကျဉ်းချချိန်အတွင်း ရောဂါဝေဒနာနဲ့ ကိုက်ညီတဲ့ ကျန်းမာရေးစောင့်ရှောက်မှု မပေးခဲ့ဘူးလို့ NLD ပါတီ ၊ NUG အစိုးရနဲ့ နိုင်ငံတကာသံရုံးတွေက ထုတ်ပြန်ထားပါတယ်။
