ဟန်နွေ/People’s Spring
ကချင်ပြည်နယ် ဝိုင်းမော်မြို့နယ် ဆဒုံးဒေသ၊ ကန်ပိုက်တီဒေသရှိ စစ်ကောင်စီတပ်စခန်း သုံးခုကို ကချင်လွတ်လပ်ရေးတပ်မတော်(KIA)က ယနေ့(ဇွန်လ ၁၁ရက်)တိုက်ခိုက်သိမ်းပိုက်ရရှိထားဟု ကချင်စစ်ရေး သတင်းရင်းမြစ်က အတည်ပြုသည်။
မေလ ၂၁ရက်တွင် ဝိုင်းမော်မြို့နယ် ရွှေညောင်ပင်အခြေစိုက် ခမရ(၃၂၁)ကို တိုက်ခိုက်သိမ်းပိုက်ပြီးနောက် စခန်းသိမ်းတိုက်ပွဲ ဆင်နွှဲမှု ခေတ္တရပ်နားထားသည့် KIAသည် ယမန်နေ့(ဇွန်လ ၁၀ရက်)တွင် တနိုင်းမြို့နယ် ရှိ တပ်စခန်းကို သိမ်းပိုက်ပြီးနောက် ယနေ့ (ဇွန်လ ၁၁ရက်) မနက်တွင် ဝိုင်းမော်မြို့မှ ကန်ပိုက်တီ သွား လမ်းပေါ်ရှိ စစ်ကောင်စီ လက်အောက်ခံ စခန်းများကို တိုက်ခိုက်သိမ်းပိုက်ခြင်းများ တပြိုင်တည်း လုပ်ဆောင်ခဲ့ခြင်းဖြစ်သည်။
“ဆဒုံးလမ်းဘက်က စကစ စခန်း သိမ်းယူနိုင်တာ ဟုတ်တယ်။ ၃ခု သိမ်းတာ”ဟု ကချင်စစ်ရေးသတင်းရင်းမြစ်က ပြောသည်။
Public Service Announcement
အခြားသတင်းရင်းမြစ်တစ်ဦးကလည်း “ချီဖွေ ကန်ပိုင်တည် လမ်းခွဲက စုပေါင်းဂိတ်၊ ကန်ပိုင်တည်လမ်းက လဖိုင် စခန်း၊ ကန်ပိုင်တည်လမ်းကဘွမ်တောင် စခန်း၃ ခုရပြီးပြီ”ဟု ပြောသည်။
စစ်ကောင်စီတပ်ဘက်က လေကြောင်း ပစ်ကူ၊ လက်နက်ကြီး ပစ်ကူပေးတိုက်ခိုက်မှုများရှိသကဲ့သို့ KIA အနေဖြင့်လည်း အခြားနေရာများ၌ ထိုးစစ်ဆင်မှုများ ရှိနေကြောင်း သတင်းရင်းမြစ်က ပြောသည်။
လဖိုင် BGF-၁၀၀၃ ရှေ့တန်းစခန်းအား ဇွန်လ ၁၁ရက် နံနက် ၁၀နာရီ ၅၀မိနစ်တွင် သိမ်းပိုက်နိုင်ခဲ့ခြင်းဖြစ်ပြီး ဆဒုန်းမြို့သွားလမ်းမပေါ်မှ လမ်းဆုံ (၁၃)မိုင် ဂိတ်၊ စခန်းကုန်းနှင့် ပြည်သူ့စစ် စခန်းကုန်းတို့အား ဇွန်လ ၁၁ရက် နံနက် ၉နာရီတွင် သိမ်းပိုက်နိုင်ခဲ့ခြင်းဖြစ်သည်ဟု ကချင်သတင်းရင်းမြစ်တစ်ဦးက လူမှုကွန်ရက်၌ ရေးသားအသိပေးထားသည်။
ထို့ပြင် ဝိုင်းမော်မြို့နယ် ဆဒုန်းလမ်းပေါ်ရှိ ဘွမ်တောင်စခန်းကို မနက် ၇နာရီခန့် သိမ်းပိုက်ခဲ့ရာ စစ်ကောင်စီဘက်က သုံ့ပန်းနှင့် လက်နက်များ ရရှိခဲ့သည်ဟုဆိုသည်။
KIA အနေဖြင့် ၂၀၂၃ အောက်တိုဘာ ၁၈ရက်တွင် ကချင်နှင့် ရှမ်းမြောက်ရှိ စစ်ကောင်စီတပ်စခန်းများ သိမ်းပိုက်သည့် စစ်ဆင်ရေးကို စတင်ခဲ့သည်။ ထို့နောက်မတ်လ ၇ရက်တင် စစ်ရှိန်မြှင့်ပြီး စစ်ကောင်စီတပ်စခန်းများစွာကို တပြိုင်တည်း ထိုးစစ်ဆင် တိုက်ခိုက်ခြင်းကို တဆင့်ပြီး တဆင့်လုပ်ဆောင်ခဲ့ရာ စစ်ကောင်စီတပ်ရင်းဌာနချုပ်များ၊ ဗျူဟာကုန်းများ၊ ရှေ့တန်းစခန်းများ၊ ဂိတ်များ၊ ပြည်သူ့စစ်နှင့် နယ်ခြားစောင့်တပ်စခန်းများ စုစုပေါင်း စစ်ကောင်စီ လက်အောက်ခံတပ်စခန်း ၁၀၀ကျော်ကို မတ်လ ၇ရက် စစ်ဆင်ရေးနောက်ပိုင်း သိမ်းယူနိုင်ခဲ့သည်။
