ကမ္ဘာ့စာနယ်ဇင်း လွတ်လပ်ခွင့်​နေ့ သတင်းစကား

ဒီပ/ People’s Spring

ဒီ​နေ့(​မေ ၃ရက်) ဟာ ကမ္ဘာ့စာနယ်ဇင်း လွတ်လပ်ခွင့်​နေ့ပါ ။ စစ်တပ်အာဏာသိမ်းပြီး ​နောက်ပိုင်းမှာ​​တော့ မြန်မာနိုင်ငံက သတင်းစာဆရာ​တွေအတွက်​ ဒီ​နေ့ဟာ သတင်းစာလွတ်လပ်ခွင့်​​တွေ ဘယ်​လောက်ဆုံးရှုံး​နေခဲ့ရပြီလဲဆိုတာကိုပြန်​ပြောင်း​အောက်​မေ့ရတဲ့နေ့လိုဖြစ်​နေပါတယ်။

ဒါလည်းတကယ်​တော့ မထူး​ဆန်းပါဘူး။ စစ်အာဏာရှင်လက်​အောက်မှာ နိုင်ငံသားအားလုံးအခွင့်အ​ရေးအကုန်ဆုံးရှုံး​နေရချိန်မှာ သတင်းစာဆရာ​တွေဟာ ချွင်းချက်မဟုတ်ပါဘူး ။ပိုဆိုးတာက စစ်​ကောင်စီဟာ အာဏာရှင်​တွေအကျင့်အတိုင်း အမှန်တရားကို​ကြောက်ရွံ့ပြီး အမှန်​ပြောသူ​တွေကိုလည်း ​ကြောက်ရွံ့မုန်းတီးပါတယ် ။ဒါကြောင့် အမှန်အတိုင်း​ပြောတဲ့ ၊​ရေးတဲ့သတင်းစာဆရာ​တွေ ၊ မီဒီယာ​တွေဟာ စစ်​ကောင်စီရဲ့ အညှိုးတကြီး ​ဖိနှိပ်တဲ့ အုပ်စု​တွေ ဖြစ်​​နေပါတယ် ။

စစ်အုပ်စု အာဏာသိမ်းခဲ့တဲ့ ​၂၀၂၁ ဖေ​ဖော်ဝါရီ ၁ ရက်​နေ့ကတည်းက မီ​ဒီယာ​အများစုဟာ သူတို့တာဝန်ဖြစ်တဲ့အမှန်အတိုင်း​ပြောတာ ၊​ရေးတာကို မပျက်မကွက်လုပ်ခဲ့ကြပါတယ် ။ ဒါ​ကြောင့်လည်း စစ်​ကောင်စီရဲ့ သတင်းအမှားဖြန့်ချီတာ​တွေ ၊ ဝါဒဖြန့်မှု​တွေဟာ မထိ​ရောက်ပါဘူး ။ပြီး​တော့ အာဏာသိမ်း​ခေါင်း​ဆောင်နဲ့ စစ်​ကောင်စီရဲ့ ပကဓိရုပ်ကို​ပေါ်​အောင် မီဒီယာ​တွေက ​​စောင့်ကြည့် ရေးသား​ဖော်ထုတ်နိုင် ခဲ့ကြပါတယ် ။ဒီအတွက် စစ်​အုပ်စုက သတင်း​ထောက်​တွေကို ဖမ်းဆီး​ထောင်ချတာ ၊နှိပ်စက်တာ ၊ သတ်ဖြတ်တာ ၊အိမ်​တွေချိတ်ပိတ်တာ ၊သတင်းဌာန​တွေကို လိုင်စင်ပိတ်သိမ်းတာ​တွေ လုပ်ခဲ့ကြပါတယ် ။

စစ်တပ်အာဏာသိမ်းတဲ့အချိန်က​နေ ဒီ​နေ့ အထိ ၃ နှစ်​ကျော်အတွင်းမှာ စစ်​ကောင်စီက သတင်းဌာန ၁၅ ခုကိုလိုင်စင်ပိတ်သိမ်းခဲ့ပါတယ် ။သတင်းမီဒီယာ​တွေမှာလုပ်ကိုင်​နေသူ ၂၁၀ ဦးကိုဖမ်းဆီး​ထောင်ချခဲ့ပြီး အဲဒီအထဲက ၅၅ ဦးဟာဒီ​နေ့အထိအကျဥ်းကျခံ​နေရဆဲဖြစ်တယ်လို့ အသံအဖွဲ့ကထုတ်ပြန်ပါတယ် ။

နယ်စည်းမခြားသတင်း​ထောက်များအဖွဲ့ (RSF) ရဲ့ထုတ်ပြန်ချက်အရ သတင်း​ထောင် ၅၉ ဦးနဲ့ မီဒီယာနဲ့ဆက်စပ်တဲ့ အလုပ် လုပ်ကိုင်သူ ၃ ဦး စုစု​ပေါင်း ၆၂ ဦးဖမ်းဆီးခံထားရဆဲဖြစ်တယ်လို့ ထုတ်ပြန်ပါတယ် ။ ဒီလိုဖိနှိပ်မှု​တွေ​ကြောင့် မြန်မာနိုင်ငံရဲ့ သတင်းစာလွတ်လပ်ခွင့်ဟာ ကမ္ဘာ့​ပေါ်မှာ အဆိုးဆုံး ၁၀ နိုင်ငံစာရင်းဝင်​နေပါတယ် ။ RSF က ကမ္ဘာ့နိုင်ငံ​ပေါင်း ၁၈၀ ရဲ့ မီဒီယာလွတ်လပ်ခွင့်ကို အဆင့်သတ်မှတ်ရမှာ မြန်မာဟာ ၂၀၂၄ ခုနှစ်မှာ အဆင့် ၁၇၁ ဖြစ်ပြီး ​​နောက်ဆုံးက​ရေရင် အဆင့် ၁၀ ချိတ်​နေတာဖြစ်ပါတယ် ။ ​နောက်ထပ် မှတ်တမ်းဆိုးက မြန်မာဟာ ကမ္ဘာ​ပေါ်မှာ တ

ရုတ်နိုင်ငံပြီးရင် သတင်း​ထောက်​တွေ ဖမ်းဆီး ထောင်ချခံရမှုဟာ ဒုတိယအများဆုံးနိုင်ငံဖြစ်​နေပါတယ် ။

အဆိုးဆုံးက​တော့ စစ်တပ်အာဏာသိမ်းပြီး​နောက်ပိုင်း အသတ်ခံရတဲ့ သတင်း​ထောက် ၅ ​ယောက်အထိရှိခဲ့ပါတယ် ။ လတ်တ​လော​နောက်ဆုံးအသတ်ခံရတာက​တော့ ​မြောက်ဦးမြို့မှာ သတင်း​ထောက်ကိုဖိုးသီဟ ကို စစ်​တပ်ကဖမ်းဆီး​ထောင်ချထားတာက​နေ မြို့သိမ်းတိုက်ပွဲ​တွေ ကြုံလာရချိန်မှာ ​ထောင်ထဲက ထုတ်ပြီး အခြားပြည်သူ​တွေနဲ့အတူ ရက်ရက်စက်စက် ​သေနတ်နဲ့ပစ်သတ်ခဲ့တာဖြစ်ပါတယ် ။ဒါ​ကြောင့် သတင်း​ထောက်​အလုပ်ဟာဘယ်​လောက်အန္တရာယ်များလဲဆိုရင် ဖမ်းဆီး​ထောင်ချခံရတဲ့အဆင့်တင်မဟုတ်ပဲ ကျန်ပြည်သူ​တွေလိုပဲ စစ်​ကောင်စီက အချိန်မ​ရွေးအ​ကြောင်းပြချက်မရှိ သတ်ဖြတ်ခံရနိုင်တဲ့အ​​ခြေအ​နေပါ ။စစ်​ကောင်စီကိုသာမက စစ်တပ်လက်​အောက်ခံ အကြမ်းဖက်အဖွဲ့​တွေဖြစ်တဲ့ ပျူ​စောထီး​တွေ ၊ ​သွေး​သောက်အဖွဲ့တွေရဲ့ အန္တရာယ်ကိုလည်း သတိထားကြရပါတယ် ။

စစ်​ကောင်စီက သူတို့မကြိုက်တဲ့ အမှန်အတိုင်း​ရေးတဲ့သတင်း​ထောက်​တွေ ၊မီဒီယာတိုက်​တွေကို ဖိနှိပ်တဲ့ အပြင် စစ်​ကောင်စီအကြိုက်လိုက်​ရေးတဲ့ စစ်​ကောင်စီဝါဒဖြန့်မီဒီယာ​တွေ ၊သတင်းသမား​အမည်ခံ​တွေကို​တောင် စကား​ပြောမှားရင် ၊အ​​ရေးအသားမကြိုက်တာနဲ့ ဖမ်းဆီး​ထောင်ချ​နေတာပါ ။

ဒီလိုအ​ခြေအ​နေ​တွေ ကြုံ​နေ​ပေမယ့်လည်း သတင်းစာဆရာ​တွေဟာ သူတို့ရဲ့ တာဝန်ကို ​နွေဦး​တော်လှန်​ရေးကာလတစ်​လျှောက် အခက်အခဲမျိုးစုံကြားက မပျက်မကွက်ကြိုးစားလုပ်ကိုင်​နေကြပါတယ် ။ လွတ်လပ်တဲ့ ၊အမှန်အတိုင်း​သာရေးသား​ပြောဆိုတဲ့ မီဒီယာ​တွေ၊သတင်း​ထောက်​အများစုဟာပြည်တွင်းမှာ ​နေထိုင်လုပ်ကိုင်ဖို့ မဖြစ်နိုင်တာ​ကြောင့် အိမ်နီးချင်းနိုင်ငံ​တွေ ၊ပြည်ပနိုင်ငံ​တွေမှာ အ​ခြေချလုပ်ကိုင်တာ ၊ ​တော်လှန်​ရေးအဖွဲ့​တွေ ထိန်းချုပ်ထားတဲ့ လွတ်​မြောက်နယ်​မြေ​တွေမှာသွား​ရောက်​နေထိုင်လုပ်ကိုင်ကြရပါတယ်။ ဒါ​တောင် ပြည်တွင်းမှာပဲ​ အန္တရာယ်များ​​ပေမယ်ဆက်လက်နေထိုင်ပြီး ပြည်သူ​တွေကြားက​နေ သတင်းအမှန်​ပေးပို့နေကြတဲ့ အလွန်ရဲရင့်တဲ့သတင်းစာဆရာ​တွေလည်းရှိပါတယ် ။

ဒီလိုအန္တရာယ်များတာကိုသိရဲ့သားနဲ့ ဘာ​ကြောင့် သတင်း​​ထောက်အလုပ်ကိုဆက်လုပ်ကြလဲလို့​မေးရင် သတင်းစာဆရာ​တွေက အမှန်တရားမြတ်နိုးလို့ ၊ အာဏာရှင်​တွေဟာ အမှန်တရား​ကို​ကြောက်တာမို့ အမှန်တရားကို​ဆက်ပြောပြီးသတင်းစာပညာနဲ့ စစ်အာဏာရှင်​တွေ​တော်လှန်ဖို့ ၊ ဖက်ဒရယ်ဒီမိုက​ရေစီ နိုင်ငံ​ဖြစ်​စေ ဒီမိုက​ရေစီနိုင်ငံဖြစ်​စေ လွတ်လပ်တဲ့ သတင်းမီဒီယာ​တွေဟာ မရှိမဖြစ်မို့ ဒီတာဝန်ကိုထမ်းဖို့ ၊ ပြည်သူ​တွေ မှန်ကန်တဲ့ ဆုံးဖြတ်ချက်​တွေချမှတ်နိုင်ဖို့အတွက် ပြည်သူ​တွေရဲ့ သတင်းသိပိုင်ခွင့်ကိုဖြည့်ဆည်း​ပေးချင်တာမို့ လုပ်​နေကြတာလို့ တညီတညွတ်တည်း​​ဖြေကြပါလိမ့်မယ် ။

ဒါ​ကြောင့် ဒီ​နေ့ စစ်အာဏာရှင်ကို​တော်လှန်​နေကြတဲ့ အလွှာ​ပေါင်းစုံက ပြည်သူ​တွေ ၊ ​တော်လှန်​ရေးအင်အားစု​တွေနဲ့ သတင်းမီဒီယာ​တွေဟာ မိတ်ဖက်​တွေပါ ။တနည်းအားဖြင့် ဘယ်အာဏာရှင်စနစ်ကိုမှ မလိုလားပဲ ၊လွတ်လပ်မှု နဲ့ တရားမျှတမှုကိုလိုလားတဲ့ ပြည်သူ့အာဏာကိုသာယုံကြည်တဲ့ ဒီမိုက​ရေစီအင်အားစု​​တွေပဲဖြစ်ပါတယ်။ မြန်မာ့သမိုင်းမှာ မကြုံဖူးခဲ့တဲ့ စည်းလုံးမှု နဲ့ ရဲရင့်မှု​တွေ​ကြောင့် စစ်အာဏာရှင် အမြစ်ဖြတ်​ရေးအတွက် ဘယ်တုန်းကမှ မရခဲ့ဖူးတဲ့ ​အောင်မြင်မှု​တွေရလာပြီဖြစ်တဲ့​နွေဦး​တော်လှန်​​ရေးမှာ ကျရာတာဝန်က​နေ အ​ကောင်းဆုံးကြိုးပမ်း​နေကြတဲ့ အင်အားစု​တွေပဲဖြစ်ပါတယ် ။

တန်ဖိုး​တွေ ၊အလှတရား​တွေ​ပေါင်းစုံ​နေတဲ့ သည်​နွေဦး​တော်လှန်​ရေးမှာ သတင်းစာဆရာ​တွေ ၊မီဒီယာ​​တွေကို ပူပန်​စေခဲ့တဲ့ဖြစ်ရပ်အချို့ မကြာ​သေးခင်က​ပေါ်​ပေါက်ခဲ့ပါတယ် ။

အဲတာက ကရင်နီပြည် ကြားကာလအုပ်ချုပ်​ရေး​ကောင်စီ(IEC) ကဧပြီ ၁၆ ရက်မှာ “မီဒီယာကျင့်ဝတ်ဆိုင်ရာညွန်ကြားချက်” ထုတ်ပြန်လာတာ နဲ့ ကရင်အမျိုးသားအစည်းအရုံး(KNU) ကလည်း ဧပြီ ၂၁ ရက်မှာ ” ပြင်ပသတင်းမီဒီယာများ သတင်းရယူခြင်းနှင့် ပတ်သက်၍ အသိ​ပေး​ကြေညာချက်”ထုတ်ပြန်လာတာ​ကြောင့်ပါ ။ ကရင်နီပြည်ဟာ ​နွေဦး​တော်လှန်​ရေးမှာ ကျန်​ဒေသ​တွေ​လေးစားအတုယူရတဲ့​ဒေသဖြစ်သလို ၊ IEC ကလည်းအနာဂါတ်ဖက်ဒရယ်ဒီမိုက​ရေစီ နိုင်ငံထူ​ထောင်ဖို့ ကျန်​တော်လှန်​ရေးအင်အားစု​တွေက နမူနာယူ၊​လေးစားအားကျ​နေရတဲ့ အင်အားစုဖြစ်ပါတယ် ။ KNU ကလည်းသိတဲ့အတိုင်း ​ခေတ်အဆက်ဆက် ဒီမိုက​ရေစီအင်အားစု​တွေကို အစဥ်အဆက်ကူညီခဲ့သလို ၂၀၂၁ စစ်တပ်အာဏာသိမ်းတဲ့အခါမှာလည်း ​ပြည်သူနဲ့အတူရပ်တည်ပြီး ​တော်လှန်​ရေးအင်အားစု​တွေကို ကူညီ​ပေးခဲ့တဲ့၊စစ်​ကောင်စီကိုအ​စောဆုံး​တော်လှန်ခဲ့တဲ့ အဖွဲ့အစည်း​တွေထဲကတစ်ဖွဲ့ဖြစ်ပါတယ် ။

IEC နဲ့ KNU ထုတ်ပြန်ချက်​တွေဟာ သတင်းမီဒီယာ​တွေကို လွတ်လပ်စွာသတင်းရယူခွင့်ကို ကန့်သတ်ချုပ်ခြယ်ချင်တာ​ကြောင့်လားလို့ မီဒီယာ​တွေက စိုးရိမ်ကြတာပါ ။ IEC နဲ့ KNU က တာဝန်ရှိသူ​တွေက​တော့ သတင်းရယူပိုင်ခွင့် နဲ့သတင်းမီဒီယာ​တွေကို ထိန်းချုပ်ဖို့ မဟုတ်ပဲ သတင်းရယူတဲ့အခါပိုစနစ်ကျ​အောင် ၊ပူး​ပေါင်း​ဆောင်ရွက်မှုပို​ကောင်း​အောင် ထုတ်ပြန်တာဖြစ်တယ်ဆိုတာမျိုး သတင်းဌာန​တွေကို​ဖြေကြားထားတာ​လည်းတွေ့ရပါတယ် ။

ဒါ​ပေမယ့် IEC ရဲ့ထုတ်ပြန်ချက်မှာ သတင်းရယူသွားတဲ့အခါ ​နေထိုင်ဖို့အတွက်ရပ်ကွက်၊​ကျေးရွာ၊မြို့နယ် အုပ်ချုပ်​ရေးမှူး​တွေထံသို့ အသိ​ပေးအ​ကြောင်းကြားဖို့ ၊သတင်းသွားယူလိုတဲ့​နေရာကို သက်ဆိုင်ရာတပ်မှူး တပ်ဖွဲ့​တွေရဲ့ခွင့်ပြုချက်နဲ့သွားလာဖို့စတဲ့အချက်​တွေဟာ လွတ်လပ်စွာသတင်းရယူခွင့်ကိုထိခိုက်​စေတယ်လို့ မီဒီယာ​တွေကရှုမြင်​နေကြပါတယ် ။ အဲလိုညွန်ကြားထားတာ​ကြောင့် အုပ်ချုပ်​ရေးမှူး​တွေ ၊တပ်မှူး​တွေက မီဒီယာ​တွေကိုခွင့်မပြုရင်သတင်းရယူဖို့မရ​တော့မှာကိုသတင်းစာဆရာ​တွေက စိတ်ပူ​နေကြတာပါ။ အလားတူ KNU ရဲ့ထုတ်ပြန်ချက်ရဲ့ နံမှတ် ၆ မှာ “လိုအပ်ပါကရိုက်ကူးထားသည့် ရုပ်သံများဖြစ်​စေ ၊ဓါတ်ပုံများဖြစ်​စေတာဝန်ရှိသူများမှ စစ်​ဆေးရန်​တောင်းခံလာပါက ရိုက်ကူးထားသည်များကို ပြသ​ပေးရမည် “ဆိုတဲ့အချက်ဟာ လွတ်လပ်စွာသတင်းရယူခွင့်အတွက် အခက်အခဲဖြစ်​စေနိုင်တယ်လို့ မီဒီယာ​တွေက သုံးသပ်ကြပါတယ် ။

တစ်ကယ်​တော့ သတင်း​ထောက်​တွေ ၊သတင်းမီဒီယာ​တွေမှာ သက်ဆိုင်ရာသတင်းဌာနတွေက ကျင့်သုံး​စေတဲ့ သတင်း​ထောက်ကျင့်ဝတ်၊သတင်းမီဒီယာကျင့်ဝတ်​တွေရှိပြီးသားဖြစ်ပါတယ် ။ ဒီမိုက​ရေစီ မိတ်ဖက်​တွေအချင်းချင်း ကျင့်ဝတ်အတိုင်းလုပ်ကိုင်နိုင်ဖို့ အား​ပေးရမှာဖြစ်ပါတယ်။ တစ်ကယ်လို့ကျင့်ဝတ်​ဖောက်ဖျက်တဲ့ သတင်း​ထောက်ရှိခဲ့ရင်၊မီဒီယာရှိခဲ့ရင် သူ့ကိုပဲ တာဝန်ခံခိုင်းရမှာဖြစ်ပါတယ် ။သတင်းမီဒီယာ​လောကတစ်ခုလုံးကို သိမ်းကြုံးကန့်သတ်ချုပ်ချယ်တာ မျိုးမဖြစ်ဖို့ လိုပါတယ် ။ ဒါအပြင် အာဏာရှင်စနစ်မလိုလားတဲ့အဖွဲ့အစည်းတိုင်းဟာ သတင်းမီဒီယာရဲ့ လွတ်လပ်စွာသတင်းရယူပိုင်ခွင့်ကို ​လေးစားအသိအမှတ်ပြုပြီး အား​ပေးရမှာဖြစ်ပါတယ်။ လွတ်လပ်တဲ့ သတင်းမီဒီယာ​တွေကသာ အဖွဲ့အစည်း​တွေရဲ့ အားနည်းချက်၊အားသာချက်​တွေကိုလည်း အမှန်အတိုင်းရေးသား​ဖော်ပြနိုင်တာမို့ ဘယ်အဖွဲ့အစည်းအစဥ်ဖြစ်​စေ ၊ဘယ်အစိုးရဖြစ်​စေလုပ်ကိုင်​ဆောင်ရွက်မှု​တွေတိမ်း​စောင်းသွားရင် အချိန်မီပြင်ဆင်နိုင်​အောင် လွတ်လပ်တဲ့ မီဒီယာ​တွေကိုပဲ အဓိကအားထားကြရတာဖြစ်ပါတယ် ။ ဒါအပြင် ပြည်သူနဲ့ အုပ်ချုပ်သူကြားမှာလည်း လွတ်လပ်တဲ့မီဒီယာ​တွေကပဲ အ​ကောင်းဆုံး​ပေါင်းကူး​ပေးနိုင်တာပါ။

ဒါ​ကြောင့် ဒီက​နေ့အဓိက ​ပြောချင်တာက အာဏာရှင်စနစ်ကို မလိုလားတဲ့ ဒီမိုက​ရေစီအင်အားစု​တွေ ၊​​တော်လှန်​ရေးအင်အားစု​တွေဟာ သတင်းမီဒီယာ​တွေရဲ့ လွတ်လပ်စွာသတင်းရယူပိုင်ခွင့်အသိအမှတ်ပြုပြီး အား​ပေးကြဖို့ပဲဖြစ်ပါတယ်။ မရည်ရွယ်​ပေမယ့်လည်း မီဒီယာ​တွေရဲ့ လွတ်လပ်စွာသတင်းရယူခွင့်ကို ကန့်သတ်ချုပ်ချယ်တာမျိုး​တွေမရှိ​စေချင်ပါဘူး ။ IEC နဲ့ KNU တို့ကဒီလိုလုပ်လို့ကျန် ​တော်လှန်​ရေးအင်အားစု​တွေကပါ မီဒီယာ​တွေကို ထပ်ပြီး ဒီလို ညွန်ကြားချက်​တွေ ထပ်ထုတ်လာခဲ့မှာကို သတင်းမီဒီယာ​တွေစိုးရိမ်​နေကြပါတယ်။ ဒီလို ​ပြောလို့ မီဒီယာ​တွေကို စည်းလွတ်​ဘောင်လွတ်​ ၊တာဝန်မဲ့ရေးသား​ဖော်ပြပါ​စေလို့​ပြောတာမဟုတ်ပါဘူး ။အမှားလုပ်ရင် ပြန်တာဝန်ခံရမယ့် ကျင့်ဝတ်ကလည်းရှိပြီးဖြစ်ပါတယ် ။ကျင့်ဝတ်မဲ့ ၊ အမှားကိုအမှန်လုပ်ပြီး​ဖော်ပြတဲ့ တာဝန်မဲ့မီဒီယာ​တွေရှိရင်လည်း စာဖတ်သူ​တွေရဲ့ ကျဥ်မှု​ကြောင့် ​ရေရှည်မရပ်နိုင်ပါဘူး ။

လွတ်လပ်တဲ့မီဒီယာ​တွေဟာ အခက်ခဲ ၊အကြပ်တည်းဆုံးအချိန်မှာ​တောင် ရဲရဲဝံ့ဝံ့အ​ကောင်းဆုံးကြိုးစားခဲ့ကြတာမို့ သူတို့နဲ့ပတ်သပ်ပြီး စိုးရိမ်မပိုဖို့ အကြံပြုလိုပါတယ် ။ ​မီဒီယာ​တွေဟာ စစ်အာဏာရှင်အဆက်ဆက်မှာလည်း ပြည်သူနဲ့အတူရပ်တည်ပြီး အမှန်တရားကို​ပြောခဲ့ကြပါတယ် ။

၂၀၁၆ က​နေ ၂၀၂၀ အထိ့ ​ရွေး​ကောက်ခံအရပ်သား(NLD)အစိုးရလက်ထက်မှာ​တောင် လွတ်လပ်တဲ့မီဒီယာ​တွေဟာ အခွင့်အ​ရေး​ပေးတာမခံရပဲ စတုတ္ထုမဏ္ဍိုင်ဆိုတာမရှိဘူး လူထုမဏ္ဍိုင် ပဉ္စမ မဏ္ဍိုင်ပဲရှိတယ်လို့အစိုးရအဖွဲ့ဝင်အချို့ကိုယ်တိုင်ထုတ်​ဖော်​ပြောဆိုခဲ့ပြီး ပုဂ္ဂလိကမီဒီယာ​တွေ ဖွံ့ဖြိုး​အောင် မလုပ်​​ပေးပဲ မီဒီယာအခန်းကဏ္ဍာကိုလစ်လျူရှုခံခဲ့ရ​ပါတယ်။ဒါပေမယ့် အ​ရေးကြုံလာတဲ့အခါ ၊ စစ်တပ်အာဏာသိမ်းမှုကြုံလာတဲ့အခါ အမှန်အတိုင်းရပ်တည်တာ၊ အမှန်တရားကိုပဲပြောဆိုလုပ်ကိုင်တာ ၊ကိုယ့်တာဝန်ကိုယ်အ​ကောင်းဆုံးတာဝန်ထမ်းခဲ့ကြတာကလည်း လွတ်လပ်တဲ့မီဒီယာ​တွေပဲဖြစ်ပါတယ် ။

ဒါ​ကြောင့် မီဒီယာဆိုတာ ​​​တော်လှန်​ရေးအင်အားစု​တွေအတွက် စိုးရိမ်စရာ၊ကန့်သတ်ချုပ်ချယ်စရာမဟုတ်ပဲ ဖက်ဒရယ်ဒီမိုက​ရေစီနိုင်ငံထူး​ထောင်နိုင်​ရေးအတွက် လွတ်လပ်စွာသတင်းရယူခွင့်ကိုမဖြစ်မ​နေ အား​ပေးရမယ့် မိတ်ဖက်​တွေသာဖြစ်​ကြောင်း သတင်းစကားပါးလိုက်ရပါတယ်။ ။

(၂၀၂၁ ​ဖေ​ဖော်ဝါရီ ၂၇ ရက်တွင် ရန်ကုန်၌ ငြိမ်းချမ်းစွာဆန္ဒထုတ်​ဖော်​သောပြည်သူများကိုစစ်​ကောင်စီက အကြမ်းဖက်ဖြိုခွင်းရာ​ဘေးလွတ်​အောင် ထွက်​ပြေး​နေ​သောဆန္ဒပြပြည်သူအချို့ နှင့် ထွက်​ပြေးတိမ်း​ရှောင်​နေရင်းသတင်းရယူ​နေ​သောသတင်း​ထောက်တစ်ဦး/ ဆန္ဒပြပွဲတွင် သတင်းရယူ၍ အဖမ်းခံရ​သောသတင်း​ထောက်တစ်ဦးနှင့် RSF ၏ ၂၀၂၄ မီဒီယာလွတ်လပ်ခွင့်အဆင့်သတ်မှတ်ချက်တွင် အဆိုးဆုံးဝါး နိုင်ငံ စာရင်းဝင်​နေ​သော မြန်မာ ။ဓါတ်ပုံ- ရိုက်တာ ၊CJ)