Oktyabr ayına qədər Yeddilik Qrupu (G7) ölkələri Qərbdə dondurulmuş Rusiyanın aktivləri hesabına Ukraynaya 50 milyard dollar məbləğində kreditin verilməsi şərtlərini razılaşdıracaq.
Gununsesi.info xəbər verir ki, bunu Reuters agentliyinə müsahibəsində ABŞ-ın maliyyə naziri Canet Yellen deyib.
“Biz burada konstruktiv danışıqlar apardıq. Biz bu təşəbbüsü irəli aparmaq üçün yaxından işləyirik. Nazir İyirmilik Qrupunun (G20) maliyyə departamentləri və mərkəzi banklarının rəhbərlərinin iclası çərçivəsində deyib: “Məncə, hər şey yaxşı görünür, biz bunu, yəqin ki, oktyabr ayına qədər edə biləcəyik”.
Yellen əlavə edib ki, Vaşinqton Avropadan Rusiya aktivlərinin uzun müddət dondurulmuş qalacağına dair zəmanət axtarır.
Moskvanın Ukraynada genişmiqyaslı müharibəyə başlamasından sonra ABŞ, Avropa İttifaqı, Kanada və Yaponiya Rusiyanın təxminən 300 milyard dollarlıq aktivlərini dondurdu.
Bunun yalnız təqribən 5-6 milyard dolları ABŞ-dadır, onun da böyük hissəsi Avropadadır.
May ayında Avropa Komissiyası bloklanmış Rusiya fondlarından əldə edilən gəlirlərin Ukrayna tərəfinə yardım göstərmək üçün istifadə edilməsi təklifini təsdiqləyib.
İyun ayında İtaliyada keçirilən sammitdə G7 liderləri 2024-cü ilin sonuna qədər Rusiyanın dondurulmuş aktivlərindən əldə olunan gəlirdən Kiyevə 50 milyard dollar ayırmaq barədə razılığa gəliblər.
Bir gün əvvəl Aİ diplomatiyasının rəhbəri Xosep Borrell Aİ xarici işlər nazirlərinin görüşündən sonra keçirilən mətbuat konfransında bəyan etmişdi ki, avqustun əvvəlində Kiyev Rusiyanın dondurulmuş aktivlərindən əldə olunan gəlirin birinci tranşının bir hissəsi kimi Avropadan 1,4 milyard avro alacaq.
O vurğulayıb ki, Aİ ölkələri Ukrayna üçün prioritet silahlar, o cümlədən hava hücumundan müdafiə sistemləri və artilleriya üçün sursatları maliyyələşdirmək niyyətindədir.
Bundan əlavə, Avropa İttifaqı Ukraynanın müdafiə sənayesini dəstəkləmək üçün vəsait ayıracaq.
Şəbnəm
Gununsesi.info
