အလှူအိမ်ကို လက်နက်ကြီးနဲ့ပစ်တဲ့စစ်တပ်ကို​တော်လှန်​ရေးတပ်​တွေ တိုက်ခိုက်

မတ်-၈၊၂၀၂၆။အိမ်သွင်/People’s Spring

ကနီမြို့နယ်မှာအလှူအိမ်ကို လက်နက်ကြီးနဲ့ပစ်ပြီး ‌ ရဟန်းနဲ့ ​​မောင်ရင်​လောင်း​တွေအပါအဝင် ပြည်သူ ၇ ဦးကိုသတ်ခဲ့တဲ့ စစ်တပ်စစ်ကြောင်းကို ULF စစ်ကြောင်းကပဒေသာမိုင်းနဲ့ တိုက်ခိုက်ခဲ့တယ်လို့ထုတ်ပြန်ပါတယ်။

အင်အား ၃၀၀ ကျော်ပါတဲ့ စစ်ကြောင်းကို မဟာမိတ်ပူးပေါင်းအဖွဲ့တွေနဲ့အတူ မိုင်းဆွဲတိုက်ခိုက်တာလို့ ယင်းမာပင်မြို့နယ် ပကဖ ULFစစ်ကြောင်းက မတ်လ ၈ရက်မှာ သတင်းထုတ်ပြန်တာပါ။

အဲဒီစစ်ကြောင်းက မတ်လ ၇ ရက်နေ့၊ ​​နေ့ခင်းပိုင်းမှာယင်းမာပင်မြို့နယ်၊ဘန့်ဘွေးရွာမှာတပ်စွဲထားတဲ့စစ်တပ်က ကနီမြို့နယ်၊နတ်လာပို့တောင်ရွာမှာရှင်ပြု အလှူပွဲလုပ်​နေတဲ့အိမ်ကိုလက်နက်ကြီးနဲ့ ပစ်ခတ်ပြီး မြေပြင်စစ်ကြောင်းထိုးဖို့ကြိုးစားခဲ့တာလို့သိရပါတယ်။ လက်နက်ကြီးနဲ့ပစ်ခတ်တဲ့အပြင်အ​သေခံ ဒရုန်းနဲ့ပါတိုက်ခိုက်တာ​ကြောင့် အလှူပရိတ်တရားနာအပြီး သာသနာ့ဘောင် ဝင်ရောက်တောမယ့် ရှင်သာမဏေနှစ်ပါး အပါအဝင် ပရိတ်တရားနာကြားနေတဲ့ ပြည်သူငါးဦး သေဆုံးခဲ့တယ်လို့ ULFစစ်ကြောင်းက ထုတ်ပြန်ပါတယ်။

Public Service Announcement

ဒါ့အပြင် ဒဏ်ရာရပြည်သူ တစ်ဒါဇင်ကျော်ရှိခဲ့ပြီး အသက်၂၅ နှစ် နဲ့၃၀ နှစ်ဝန်းကျင် အမျိုးသားနှစ်ဦးကတော့ ဆေးရုံပို့ချိန် လမ်းမှာတင်သေဆုံးသွားလို့ သေဆုံးသူ ၇ ဦးရှိခဲ့တယ်လို့ ဒေသခံတစ်ဦးကပြောပါတယ်။ ​သံဃာ​တော် တစ်ပါးလည်းပျံလွန်​တော်မူခဲ့တယ်လို့ ​ဒေသခံအချို့က​ပြောပါတယ်။

​မြေပြင်စစ်​ကြောင်းထိုးဖို့ကြိုးစားတဲ့ စစ်​ကြောင်းကို ပဒေသာမိုင်းနဲ့ တိုက်ခိုက်တဲ့ ရုပ်သံမှတ်တမ်းကိုလည်း ULFစစ်ကြောင်းက ထုတ်ပြန်ထားပါတယ်။တိုက်ခိုက်မှု​ကြောင့် ထိခိုက် သေဆုံးသူများပြားခဲ့တယ်လို့ ကနဦးသိထားပြီး အသေးစိတ်အတည်ပြုနေဆဲလို့ တော်လှန်ရေးရဲဘော်တစ်ဦးကပြောပါတယ်။

လက်ရှိမှာ ကနီမြို့နယ်မှာလည်း အင်အား ၃၀၀ ကျော်ပါတဲ့ စစ်ကြောင်းရှိသလို ယင်းမာပင်၊ကနီမြို့နယ်တွေနဲ့ ဆက်စပ်နေတဲ့ ပုလဲမြို့နယ်မှာလည်း စစ်တပ်ကစစ်ကြောင်းတွေထိုးနေပါတယ်။

မတ်လ ၄ရက်နေ့ကလည်းပုလဲမြို့နယ်၊ မရိုးတုန်းကျေးရွာကို စစ်တပ်က လေကြောင်းကနေ ဗုံးကြဲလို့ ကလေးတစ်ဦးအပါအဝင် အရပ်သား လေးဦး သေဆုံးခဲ့ပါတယ်။ကနီနဲ့ ပုလဲမြို့နယ်ဟာ ယင်းမာပင်ခရိုင်မှာပါဝင်ပြီး စစ်တပ်စစ်ကြောင်းတွေရဲ့ အန္တရာယ်​ကြောင့် ထွက်​ပြေးတိမ်း​ရှောင်​နေရတဲ့ပြည်သူ​သောင်းနဲ့ချီပြီး ရှိပါတယ်။

ရုပ်သံ-ULF

𝗣𝗲𝗼𝗽𝗹𝗲’𝘀 𝗦𝗽𝗿𝗶𝗻𝗴