ဇန်နဝါရီ-၂၉၊ ၂၀၂၆ ဇေအောင်/People’s Spring
မကွေးတိုင်း၊ ပေါက်မြို့နယ်နဲ့ စလင်းမြို့နယ်တွေမှာ စစ်ရှောင်တစ်ထောင်ကျော်ဟာ အရေပြားရောဂါတွေ ဖြစ်ပွားနေပြီး ဆေးဝါးအကူအညီတွေလိုအပ်နေကြောင်း စစ်ရှောင်ကူညီနေသူတွေက ပြောပါတယ်။
ပေါက်မြို့နယ် ဇုန်(၁)နယ်မြေအတွင်းက ကာလရှည် နေရပ်စွန့်ခွာနေရတဲ့ စစ်ဘေးရှောင်တွေဟာ လူကြီးနဲ့ ကလေး လူဦးရေ ၁၀၀၀ ခန့် အရေပြားရောဂါဝေဒနာများ ခံစားနေရကြောင်း ပေါက်မြို့နယ် လူသားစာနာဌာန တာဝန်ရှိသူက ပြောပါတယ်။
“ ဆေးဝါးတွေ အဓိကလိုပါတယ်။ ပွေး ၊ ဝဲ ၊ နှင်းခူ ၊ ညှင်း တွေဖြစ်နေတာပါ” လို့ ၎င်းတာဝန်ရှိသူက ပြောပါတယ်။
Public Service Announcement
အလားတူ စလင်းမြို့နယ်မှာလည်း စစ်ရှောင်ကလေးငယ်တွေနဲ့ လူငယ်လေးတွေဟာ အရေပြားရောဂါတွေဖြစ်ပွားနေပြီး ဆေးဝါးလိုအပ်ချက်တွေရှိနေကြောင်း စလင်းမြို့နယ်ပြည်သူ့အုပ်ချုပ်ရေးအဖွဲ့ရဲ့ တာဝန်ရှိသူက ပြောပါတယ်။
စစ်ရှောင်တွေဟာ ရေကောင်းရေသန့်မရတာ၊ ဆပ်ပြာအပါအဝင် တကိုယ်ရေသန့်ရှင်းရေးအသုံးအဆောင်တွေ မလုံလောက်တာတွေကြောင့် ဖြစ်ပွားနေကြတာဖြစ်ကြောင်း ဒေသခံတွေက ပြောပါတယ်။
“ ဆောင်းတွင်းရက်ဆိုပေမဲ့ ရေရှားတာရော၊ ကူးစက်တာတွေရော တလျှောက်လုံးဖြစ်ကြတယ်။ ရဲဘော်တွေလည်းဖြစ်ကြတယ်။ သေသေချာချာတော်တော်ကုယူရတာ။ တစ်ယောက်နဲ့တစ်ယောက်လည်း ဆင့်ဆင့်ပြီး ကူးစက်သွားတာ” လို့ မြိုင်နယ်အခြေစိုက် အညာမြေတပ်ပေါင်းစုတာဝန်ခံ ကိုဘိုဘိုသန့်စင်က ပြောပါတယ်။
ပြည်သူတွေအနေနဲ့ ဆေးဝါးတွေ ချိတ်ဆက်ကူညီပေးကြဖို့ ပေါက်မြို့နယ် လူသားစာနာဌာနကမေတ္တာရပ်ခံထားပါတယ်။
