ဇန်နဝါရီ ၂၉၊ ၂၀၂၆။ ထားမြတ်/People’s Spring
တနင်္သာရီတိုင်း၊ ပုလောမြို့နယ်အတွင်း ဖမ်းဆီးရမိခဲ့တဲ့ စိတ်ကြွမူးယစ်ဆေးဝါး ၅သောင်းကျော်ကို မီးရှို့ဖျက်ဆီးလိုက်ကြောင်း ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ(၄) အထူးတပ်ဖွဲ့က သတင်းထုတ်ပြန်ပါတယ်။
၂၀၂၅ စက်တင်ဘာ ၂၀ရက်က ပုလောမြို့နယ်မှာ မူးယစ်ဆေးသယ်သူ ၂ဦးကိုဖမ်းမိခဲ့ပြီးသိမ်းဆည်းရရှိခဲ့တဲ့ မူးယစ်ဆေးပြားတွေကို မီးရှို့ဖျက်ဆီးခဲ့ကြောင်း KNLA တပ်မဟာ(၄) အထူးတပ်ဖွဲ့က ဒီကနေ့ ဇန်နဝါရီ ၂၉ရက်မှာ ထုတ်ပြန်ခဲ့တာပါ။
KNLAအထူးတပ်ဖွဲ့အနေနဲ့ စစ်ကောင်စီရဲ့ စစ်ရေးလှုပ်ရှားသွားလာမှုတွေကို ထောက်လှမ်းဖို့ ၊ လုံခြုံရေး စစ်ဆေးဖို့ လုပ်ဆောင်စဉ် မသင်္ကာတဲ့ လူငယ် ၂ဦးကို စစ်ဆေးခဲ့ရာ WY မူးယစ်ဆေးဝါး ၅၃,၀၀၀ ကျော် ဖမ်းမိခဲ့တာလို့ဆိုပါတယ်။
Public Service Announcement
မူးယစ်ဆေးဝါး ဖမ်းဆီးဖို့ ရည်ရွယ်စစ်ဆေးခြင်းမဟုတ်ပေမယ့် ပမာဏ အမြောက်အများ လက်ဝယ်သယ်ဆောင်လာတာ တွေ့ရှိရလို့ ဖမ်းဆီးခဲ့ပြီး အများရှေ့မှောက်မှာ ရေတွက် စာရင်းသွင်း မှတ်တမ်းတင်ပြီး မူးယစ်ဆေးဝါးတွေကို မီးရှို့ဖျက်ဆီးခဲ့တာလို့ ရုပ်သံမှတ်တမ်းနဲ့အတူ ဖော်ပြပါတယ်။
စစ်ကောင်စီကို တော်လှန်နေတဲ့နည်းတူ အများပြည်သူတွေရဲ့ လုံခြုံရေးနဲ့ ကျန်းမာရေးကို ထိခိုက်စေနိုင်တဲ့ မူးယစ်ဆေးဝါး သုံးစွဲ ရောင်းဝယ်ဖောက်ကားမှုတွေကိုလည်း တပြိုင်နက်တည်း တွေ့တဲ့နေရာမှာ ကိုင်တွယ်ဖြေရှင်းသွားမယ်လို့လည်း KNLA အထူးတပ်ဖွဲ့က ကြေညာပါတယ်။
KNLA အထူးတပ်ဖွဲ့ အနေနဲ့ စစ်ကောင်စီ ကြိုးပမ်းနေတဲ့ အတုအယောင် ရွေးကောက်ပွဲကို စစ်ရေးအရ ဖိအားပေးတဲ့ စစ်ဆင်ရေးတွေ ဖော်ဆောင်ခဲ့ကြောင်း အသိပေးထားပြီး ၂၀၂၅ ဒီဇင်ဘာလအတွင်း ပုလောမြို့နယ်ရှိ စစ်ကောင်စီတပ်တွေကို ဒရုန်း၊ မိုင်းတွေနဲ့ တိုက်ခိုက်ခဲ့တာ၊ တိုက်ပွဲဖြစ်ပွားခဲ့တာတွေကို ၂၀၂၆ ဇန်နဝါရီ ၂၇ရက်မှာ သတင်းထုတ်ပြန် ထားပါတယ်။
ရုပ်သံ – KNLA တပ်မဟာ(၄)
