အောက်တိုဘာ-၁၇၊ ၂၀၂၅။ဇေအောင်/People’s Spring
မန္တလေးတိုင်း၊ မြင်းခြံခရိုင်ပကဖရဲ့ အချုပ်ခန်းကနေ အချုပ်သား ၃၀နီးပါးက လက်နက်တချို့ယူကာ ထွက်ပြေးမှုဖြစ်ပွားခဲ့ပြီး ၈ ဦးကို ပြန်လည်ဖမ်းဆီးရမိထားကြောင်း သတင်းရရှိပါတယ်။
မနေ့က အောက်တိုဘာ ၁၆ရက်မှာ မြင်းခြံခရိုင်ပကဖရဲ့အချုပ်ခန်းက အချုပ်သား ၃၀ခန့်ဟာ သေနတ်တွေယူကာ ထွက်ပြေးသွားကြောင်း မြင်းခြံလူထုလှုပ်ရှားမှုကော်မတီက အသိပေးပါတယ်။
အဲဒီထွက်ပြေးအချုပ်သားတွေထဲက အမျိုးသား ၇ဦးနဲ့ အမျိုးသမီး ၁ဦး စုစုပေါင်း ၈ဦးကို AK ၁လက်၊ အတို ၁လက်၊ ကာဘိုင် ၁လက်၊ ဓါးအရှည် ၁ချောင်းစတဲ့ လက်နက်တွေနဲ့အတူ ပြန်လည်ဖမ်းဆီးရမိထားတယ်လို့ Zero ပြောက်ကျားတပ်ဖွဲ့ခေါင်းဆောင် ကိုသက်ကြီးက ပြောပါတယ်။
Public Service Announcement
“ ဘယ်လို အချုပ်သားတွေဆိုတာ ကျနော်မသိပါဘူး။ဖမ်းပြီးတခါတည်း သက်ဆိုက်ရာအပ်လိုက်တာပါ” လို့ ကိုသက်ကြီးက ပြောပါတယ်။
ဖြစ်စဥ်နဲ့ပတ်သက်ပြီး မြင်းခြံခရိုင်ပကဖကို ဆက်သွယ်မေးမြန်းဖို့ ကြိုးစားနေပြီး လက်တလောဆက်သွယ်လို့ မရသေးပါဘူး။
တော်လှန်ရေးအားကောင်းတဲ့ မြင်းခြံမြို့နယ်မှာ စစ်ကောင်စီတပ်ဟာ မြေပြင်ကနေ စစ်ကြောင်းထိုး မီးရှို့တာတွေ ပြုလုပ်နေပြီး ပြီးခဲ့တဲ့စက်တင်ဘာ ၂၉ရက်ကလည်း မြင်းခြံမြို့နယ်၊ညောင်ပင်ရွာကို ဒရုန်းနဲ့ဗုံးချခဲ့လို့ အသက်၆၅နှစ်အရွယ် အမျိုးသမီး ၁ဦးနဲ့ အသက်(၄၀)အရွယ်သားဖြစ်သူတို့ သေဆုံးခဲ့ပါတယ်။
