သရက်ချောင်းမြို့နယ်တွင် စစ်တပ်က ပြည်သူ ၂ဦး သတ်ဖြတ်ပြီး နေအိမ် ၇၀ကျော် မီးရှို့ဖျက်ဆီး

ဩဂုတ်−၂၈၊ ၂၀၂၅။ ထားမြတ်/People’s Spring

ကရင်အမျိုးသားအစည်းအရုံး(KNU) မြိတ်-ထားဝယ်ခရိုင် တပ်မဟာ(၄) နယ်မြေ သရက်ချောင်းမြို့နယ်(ကစယ်ဒိုမြို့နယ်)တွင် အာဏာသိမ်းစစ်တပ်က အရပ်သား ပြည်သူ ၂ဦး သတ်ဖြတ်ပြီး နေအိမ်များ မီးရှို့ဖျက်ဆီးခဲ့ကြောင်း KNU မြိတ်-ထားဝယ်ခရိုင်က သတင်းထုတ်ပြန်သည်။

ဩဂုတ်၂၅ရက်တွင်သရက်ချောင်းမြို့မှ စစ်ကြောင်းထိုးလာသော စစ်တပ်က စော်ဖျားကျေးရွာနှင့် မိုးရွှေကုန်းကျေးရွာအတွင်း ရောက်ရှိချိန် စော်ဖျားကျေးရွာရှိပြည်သူနေအိမ် (၆၀‌‌)လုံးနှင့် ‌‌မိုးရွှေကုန်း ကျေးရွာရှိပြည်သူနေအိမ်(၁၅) လုံးကို မီးရှို့ဖျက်ဆီးခဲ့သည်ဟု ဖော်ပြသည်။

ထို့ပြင်မိုးရွှေကုန်းရွာသားနှစ်ဦးကိုလည်း သတ်ဖြတ်ခဲ့ကြောင်း KNU မြိတ်-ထားဝယ်ခရိုင်က သတင်းထုတ်ပြန်သည်။

Public Service Announcement

“တိုက်ပွဲဖြစ်တာမရှိဘဲနဲ့ ရွာကို မီးရှို့သွားတယ်လို့ သတင်းရတယ်။ သတ်ဖြတ်ာခဲ့တဲ့သူနှစ်ယောက်ကိုလည်း ရက်ရက်စက်စက် သတ်ဖြတ်သွားတာပေါ့။ လည်ပင်းကို ဓားနဲ့လှီးတဲ့ပုံစံနဲ့သတ်ဖြတ်သွားတာ” ဟု ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ(၄) သတင်းရင်းမြစ်က ပြောသည်။

စစ်ကောင်စီတပ်က KNU ထိန်းချုပ်နယ်မြေ တောင်ပျောက်ကျေးရွာအုပ်စုဘက် စစ်ကြောင်းထိုးလာရန် ဆောင်ရွက်လာခြင်းဖြစ်ကြောင်းလည်း ၎င်း ကဆိုသည်။

စစ်ကောင်စီတပ်သည် KNU/KNLA မြိတ်-ထားဝယ်ခရိုင်တပ်မဟာ(၄) နယ် မြေသို့ စစ်ကြောင်းထိုးခြင်း၊ စစ်အင်အားဖြည့်တင်းခြင်းများ ပြုလုပ်နေ၍ စစ်ကောင်စီနှင့် KNLA တော်လှန်ရေးပူးပေါင်းတပ်အကြား တိုက်ပွဲများ ဆက်တိုက်ဖြစ်ပွားလျက်ရှိသည်။

ယခုလပိုင်းများအတွင်း ရေဖြူမြို့နယ်၊ ထားဝယ်မြို့နယ်၊ သရက်ချောင်းမြို့နယ်၊ တနင်္သာရီမြို့နယ်များအတွင်း တိုက်ပွဲများ ဖြစ်ပွားလျက်ရှိသည်ဟု တော်လှန်ရေးပူးပေါင်းတပ်နှင့် KNLA တပ်မဟာ(၄)တို့က သတင်းထုတ်ပြန်ထားသည်။