ဩဂုတ်-၁၈၊ ၂၀၂၅။ ထားမြတ်/People’s Spring
တအာင်းတပ်မတော်(TNLA)သိမ်းပိုက်ထားသည့် သီပေါမြို့ကို အာဏာသိမ်းစစ်ကောင်စီက ယနေ့ ဩဂုတ် ၁၈ရက် မနက် ၉နာရီခွဲတွင် လေကြောင်းမှဗုံးကြဲတိုက်ခိုက်ခဲ့ရာ အမျိုးသားတဦးနှင့် အမျိုးသမီး ၂ဦး ဒဏ်ရာရခဲ့သည်ဟု TNLA က ထုတ်ပြန်သည်။
သီပေါမြို့အနောက်ရပ်ကွက်နှင့် တောင်မြို့ရပ်ကွက်ရှိ ပြည်သူများရှိရာသို့ ဗုံးများကြဲချ တိုက်ခိုက်ခဲ့ခြင်းဖြစ်ပြီး နေအိမ် ၇လုံး ပျက်စီးခဲ့ကြောင်းလည်း အသိပေးသည်။
စစ်ကောင်စီတပ်သည် ဩဂုတ်အတွင်း သီပေါမြို့ကို လေကြောင်းတိုက်ခိုက်မှုသုံးကြိမ်ပြုလုပ်ခဲ့သည်။ ဩဂုတ် ၃ရက်နှင့် ၉ရက်က သီပေါမြို့ကို လေကြောင်း ဗုံးကြဲခဲ့ရာ ပြည်သူထိခိုက်မှုရှိခဲ့သည်။
Public Service Announcement
စစ်ကောင်စီသည် ယခုလအတွင်း TNLA ထိန်းချုပ်ထားသည့် သီပေါ၊ ကျောက်မဲ၊ မိုးကုတ် မြို့များကို လေကြောင်း ဗုံးကြဲတိုက်ခိုက်မှု ၈ကြိမ်ပြုလုပ်ခဲ့ရာ ကလေးငယ်နှင့် အမျိုးသမီးများ၊သံဃာများ အပါအဝင် ၃၈ဦးသေဆုံးကာ ၃၀ ဦး ဒဏ်ရာရရှိခဲ့ဟု TNLAက ထုတ်ပြန်ထားသည်။
စစ်ကောင်စီက ပြည်သူကို ပစ်မှတ်ထားသည့် လေကြောင်းတိုက်ခိုက်မှုများကျူးလွန် နေ၍ ပြည်သူများ စစ်ရေးသတိရှိရန်၊ လေကြောင်းရန်ကာကွယ် ရေးဆိုင်ရာနည်းလမ်းများ လိုက်နာဆောင်ရွက်ရန် TNLAက တိုက်တွန်းထားသည်။
(သီပေါမြို့အား စစ်ကောင်စီလေကြောင်းတိုက်ခိုက်၍ နေအိမ်များ ပျက်စီးနေသည်ကို တွေ့ရစဉ်။ ဓာတ်ပုံ – TNLA)
