သြဂုတ်-၁၆၊၂၀၂၅။ သုည/People’s Spring
စစ်ကိုင်းတိုင်းအတွင်းမှာ သပိတ်အဖွဲ့တွေ၊ ဒေသခံပြည်သူတွေက ဒီကနေ့ (သြဂုတ် ၁၆)မှာ စစ်အာဏာရှင်ဆန့်ကျင်ဖို့နဲ့ လေကြောင်းအန္တရာယ်ကာကွယ်ဖို့ အသိပညာပေးလှုံ့ဆော်မှုတွေ အသီးသီး ပြုလုပ်ခဲ့ပါတယ်။
စစ်ကိုင်းတိုင်းယင်းမာပင်မြို့နယ်မှာအောင်လံလွှင့်မည်ဒေါင်းသွေးနီ သပိတ်စစ်ကြောင်းက မတရားတဲ့စစ်မှုထမ်းဥပဒေကိုဆန့်ကျင်ကြဖို့နဲ့စစ်အာဏာရှင်ကို ဆန့်ကျင်ကြောင်း လူထုသပိတ် ချီတက်ဆန္ဒပြခဲ့ပါတယ်။
ယင်းမာပင်မြို့နယ်မြောက်ခြမ်းမှာလည်း နောက်ပြန်မလှည့်ကြေး ဒီတော်လှန်ရေး သပိတ်စစ်ကြောင်းက ဒေသခံပြည်သူတွေနဲ့အတူ စစ်အာဏာရှင်ကို ဆန့်ကျင်ရေးသပိတ် ဆန္ဒထုတ်ဖော်ခဲ့ပါတယ်။
Public Service Announcement
ရွှေဘိုမြို့နယ်မှာလည်း သပိတ်အင်အားစု စစ်ကောင်စီရဲ့ အဓိက အကြမ်းဖက်မှု လေကြောင်းအန္တရာယ်မှ ကြိုတင်ကာကွယ်နိုင်ကြဖို့ ဗုံးခိုကျင်းတူးနည်းအကြံပြုချက်တွေ၊ လေကြောင်းတိုက်ခိုက်ခံရချိန် အရေးပေါ်နေထိုင်နည်းတွေကို မျှဝေခဲ့ပါတယ်။
ယင်းလှုပ်ရှားမှုကို ရွှေဘိုမြို့နယ်အတွင်းကျေးရွာအချို့မှာ ရွှေဘိုခရိုင် ပြည်သူ့ကာကွယ်ရေးတပ်မတော် တပ်ရင်း၄၊ မြို့နယ်လူ့အခွင့်ရေးရာတာဝန်ခံနဲ့ ရွှေဘိုမြို့နယ် သပိတ်အင်အားစု တို့ ပူးပေါင်း လုပ်ဆောင်ခဲ့တာ ဖြစ်ပြီး ကျေးရွာပြည်သူလူထုအများအပြား ပူးပေါင်းပါဝင်ခဲ့ကြပါတယ်။
