သြဂုတ်-၁၄၊၂၀၂၅။People’s Spring
ဘန်ကောက်မြို့ထဲမှာ မြန်မာတစ်ဦးကို အုပ်စုလိုက် ရန်ပြုပြီး ဓားနဲ့ ထိုးသတ်သွားတဲ့ ဖြစ်စဉ်ကို စုံစမ်းစစ်ဆေးနေကြောင်း ထိုင်းရဲတွေက ပြောပါတယ်။
ဩဂုတ်လ၁၃ရက်၊မနက်အစောပိုင်းကဘန်ကောက်ရဲ့ ခလွန်တွိုင် ဧရိယာမှာရှိတဲ့လူကူးခုံးကျော်တံတား တစ်စင်းပေါ်မှာ အဲဒီ တိုက်ခိုက်မှု ဖြစ်ခဲ့တာပါ။မနက်အစော ၂ နာရီ ဝန်းကျင်လောက်က လူတစ်ယောက် သွေးအိုင်ထဲ လဲနေတာကို သတိထားမိတဲ့ လမ်းသွားလမ်းလာ တစ်ယောက်က ရဲတွေဆီ ဖုန်းဆက် သတင်းပေးခဲ့တဲ့နောက် ရဲတွေ၊ ကယ်ဆယ်ရေးတွေနဲ့ချူလာလောင်ကွန်း တက္ကသိုလ်က ကျန်းမာရေး ဝန်ထမ်းတစ်ဦးတို့ဟာ အခင်းဖြစ်တဲ့ နေရာဆီ အလျင်အမြန် သွားရောက်ခဲ့ပါတယ်။
သေဆုံးသူဟာ အသက် ၃၀ ဝန်းကျင် အရွယ်ဖြစ်ပြီး ဦးခေါင်း၊ လက်၊ တင်ပါးနဲ့ ကျောတို့မှာ နက်ရှိုင်းတဲ့ ဓားဒဏ်ရာတွေ ရထားခဲ့ပါတယ်။ မျက်မြင်တချို့ကတော့ အဲဒီလူဟာ ခလွန်တွိုင် လမ်းဆုံနားမှာ ထွက်ပြေးသွားပြီး သူ့နောက်မှာတော့ သစ်သားတုတ်တွေ ကိုင်ဆောင်ထားတဲ့ လူငယ်တချို့ ပြေးလိုက်သွားတာ မြင်ခဲ့ရတယ်လို့ ပြောပါတယ်။
Public Service Announcement
ဒါပေမဲ့ အရမ်းမှောင်နေလို့ ဘယ်သူဘယ်ဝါတွေ ဆိုတာကို မမှတ်မိကြောင်း၊ အဲဒီလူအုပ်ထဲမှာ ဓားပါလာနိုင်တယ်လို့ ယူဆရကြောင်း၊ သူတို့တွေဟာ သူနားမလည်တဲ့ဘာသာစကား တစ်မျိုးကို အော်ဟစ်နေခဲ့ကြောင်း မျက်မြင်တစ်ဦးက ဆိုပါတယ်။
သိပ်မကြာခင်မှာတော့ နောက်ထပ်လူငယ်တစ်အုပ်က မော်တော်ဆိုင်ကယ်တွေနဲ့ ရောက်လာပြီး တုတ်တွေကိုင်ထားတဲ့ သူတွေကို ခေါ်တင်ပြီးထွက်ခွာသွားခဲ့ကြောင်း သိရပါတယ်။ အနီးတဝိုက်မှာ စျေးရောင်းသူ တစ်ယောက်က လူငယ် ၁၀ ယောက်လောက်ဟာ မော်တော်ဆိုင်ကယ် ၅ စီးပေါ်မှာ စီးနင်းသွားပြီး တစ်ခုခု အော်ဟစ်သွားတာ ကြား
လိုက်မိကြောင်း၊ဒါပေမဲ့ဓါးထိုးမှု ဖြစ်တဲ့အကြောင်းကိုတော့ သတိမထားမိလိုက်ကြောင်း ရဲတွေဆီ ထွက်ဆိုခဲ့ပါတယ်။
သေဆုံးသူဆီမှာဘယ်သူဘယ်ဝါဆိုတာသိရှိနိုင်မယ့်စာရွက်စာတမ်းအထောက်အထားတွေ မတွေ့ရဘဲ မိုဘိုင်းဖုန်း တစ်လုံးသာ ကိုင်ဆောင်ထားခဲ့တယ်လို့ရဲတွေကပြောပါတယ်။သူဟာ မြန်မာတစ်ယောက် ဖြစ်တယ်ဆိုတာ ခိုင်ခိုင်မာမာ ယူဆရပေမယ့် တရားဝင် တိတိကျကျတော့ အတည်မပြုရသေးဘူးလို့လည်း ရဲတွေက ဆိုပါတယ်။
လောလောဆယ်တော့ ရဲတပ်ဖွဲ့ဟာ မျက်မြင်သက်သေတွေဆီကစစ်ချက်ယူတာ၊လုံခြုံရေး ကင်မရာမှတ်တမ်းတွေကို ပြန်လည် ကြည့်ရှုတာတွေနဲ့အတူ စုံစမ်းစစ်ဆေးမှုတွေ ဆက်လုပ်နေပါတယ်။ အစောပိုင်းက အဲဒီတဝိုက်မှာ ရန်ပွဲတစ်ခု ဖြစ်ခဲ့ပြီး အခု ဓားထိုးမှုနဲ့ ဆက်စပ်သလား ဆိုတာကိုတော့ မသိရသေးပါဘူး။
ကိုးကား-ASEAN Now
