အာဏာသိမ်းဒု​ခေါင်း​ဆောင် ဘုရား​ပေါ်ဖိနပ်စီးသည်ကို တပ်ချုပ်ရုံးဝက်ဆိုက်က မှတ်ချက်ဖြင့်​ဖော်ပြ

ဧပြီ-၈၊၂၀၂၅။ခွာညို/People’s Spring

အာဏာသိမ်းဒုတိယခေါင်းဆောင် ဒုတိယဗိုလ်ချုပ်မှူးကြီးစိုးဝင်း၏ ငလျင်သင့်ခဲ့​သောပဲခူးတိုင်းသို့သွားခဲ့​သောခရီးစဥ်တွင် နန်း​တော်ဦးဘုရားရင်ပြင်ပေါ် ဖိနပ်စီးတက်ခဲ့သည်ကို တပ်မ​တော်ကာကွယ်​ရေးဦးစီးချုပ်ရုံး၏ တရာဝင် ဝက်ဆိုက်က မှတ်ချက်ဖြင့်​ဖော်ပြလိုက်သည်။

အာဏာသိမ်းဒုတိယခေါင်းဆောင်သည် စစ်ကိုင်းငလျင်ဒဏ်ခံစားခဲ့ရ​သော ပဲခူးတိုင်းရှိ ငလျင်ဒဏ်သင့်ဒေသများသို့ ဧပြီလ ၇ရက်တွင် သွားရောက်ခဲ့ခြင်းဖြစ်သည်။ တောင်ငူမြို့သို့ရောက်ရှိစဉ်စစ်ကိုင်း ငလျင်ဒဏ်ကြောင့် စိန်ဖူးတော်ပြိုကျပျက်စီးသွားသည့်နန်းတော်ဦးလောကမာရဇိန်စေတီတော်သို့ သွားရောက်စဉ် ရင်ပြင်တော်ပေါ်သို့ ဖိနပ်စီး၍ တက်ခဲ့ခြင်းဖြစ်သည်။

အဆိုပါသတင်း ကို တပ်ချုပ်ရုံး၏ တရားဝင်ဝက်ဆိုက်ဖြစ်​သောcincds ဝက်ဆိုက်က ဧပြီ ၈ ရက်၌ သတင်း​ဖော်ပြရာတွင် ​အောက်ဆုံး၌” မှတ်ချက်။ (သတင်းစာများတွင်) အပျက်အစီးတွေ့ရှိများ၊ အပျက်အစီးများ ဦးစားပေးသုံးရန်။ နန်းတော်ဦး ဘုရားတွင် ဖိနပ်စီးထားသဖြင့် ပုံသုံးရာတွင် ဂရုပြုသုံးရန်၊ ဆွာချောင်းတံတား ပျက်စီးမှုနှင့် ပြင်ဆင်ဆောင်ရွက်နေမှုများအား သင့်တော်သလိုသုံးရန်”ဟု ရေးသားထားသည့် မှတ်ချက်ကိုဖော်ပြထားသည်။

Public Service Announcement

အဆိုပါ​ မှတ်ချက်ဖြင့်​ဖော်ပြမှုကိုထုတ်ပြန်ပြီး နာရီ​ပေါင်းများစွာကြာသည့်တိုင် (ယခုသတင်း​ရေးသားချိန် ဧပြီ ၈ ရက် ၊ည ၁၁ နာရီအထိ) ဆက်လက်​ဖော်ပြထားဆဲဖြစ်သည်။ သို့​သော်ဧပြီ ၈ ရက်ထုတ်စစ်ကောင်စီဝါဒဖြန့်သတင်းစာများတွင်မူ “မှတ်ချက်”ကို ထည့်သွင်းဖော်ပြထားခြင်းမရှိပေ။

ဘုရားရင်ပြင်တော်ပေါ်တွင် ခြောက်လုံးပြူးသေနတ်ကိုခါးကြားထိုးလျှက်စစ်စိမ်းယူနီ​ဖောင်းဝတ်လျက် ဘုရားဂေါပကများအား အလှူငွေထောက်ပံ့နေသည့်ဓာတ်ပုံကိုတင်ထားသည်။ ထိုဓာတ်ပုံကို​ဖော်ပြာတွင် ‌ခြေသလုံးနေရာမှစ၍ ဖြတ်တောက်ထားသည်။

“စိုးဝင်းဘုရားပေါ် ဖိနပ်စီးပြီးတက်တာကို မင်းအောင်လှိုင်ထောက်ခံသူတွေက တမင်သက်သက် ပြတာလို့ထင်တယ်။ ဒါမှမဟုတ် သူတို့တွေ မစိစစ်နိုင်အောင် ပြာယာခပ်နေတာလည်း ဖြစ်နိုင်တယ်။ ဒါပေမဲ့ အွန်လိုင်းမှာ ပြန်ဖြုတ်မချပစ်တာကလည်း ထူးခြားနေတယ်” ဟု နိုင်ငံရေးသတင်းများကို စောင့်ကြည့်လေ့လာသူတစ်ဦးကပြောသည်။

ဧပြီ ၈ ရက်ထုတ်သတင်းစာများတွင် စစ်ကောင်စီခေါင်းဆောင် ဗိုလ်ချုပ်မှူးကြီးမင်းအောင်လှိုင်၏ နေပြည်တော်အတွင်းသွားလာနေသည်သတင်းများကို မျက်နှာဖုံးတင်ထားပြီး ဒုတိယဗိုလ်ချုပ်မှူးကြီးစိုးဝင်း၏ ပဲခူးတိုင်းခရီးစဉ်ကို နောက်ကျောဖုံးတွင် ဖော်ပြထားသည်။

စစ်ကောင်စီတပ်ထဲတွင် ဗိုလ်ချုပ်မှူးကြီးမင်အောင်လှိုင်ထက်ဒုတိယဗိုလ်ချုပ်မှူးကြီးစိုးဝင်းကို ထောက်ခံသူများပြီး ၎င်းတို့အချင်းချင်းခြား ပွတ်တိုက်မှုကြီးမားနေကြောင်း ဗန်း​မော်မြို့သိမ်းတိုက်ပွဲတွင်ညKIAထံ မကြာသေးမီကအလင်းဝင်လာခဲ့သည့် စစ်ကောင်စီတပ်ဖွဲ့ဝင်အချို့က ထုတ်ဖော်ပြောကြားခဲ့သည်။

ထို့အပြင် စစ်တပ်အမာခံ​ထောက်ခံသူ မဘသဘုန်းကြီး​ပေါက်ကိုယ်​တော်က ၁၀၂၇ စစ်ဆင်​ရေး​ပထမပိုင်းကြောင့်ရှမ်းပြည်နယ်​မြောက်ပိုင်းတွင် မြို့များစွာလက်လွတ်ရပြီး​နောက် ပြင်ဦးလွင်မြို့တွင် MNDAA ကိုကန့်ကွက်ချုံ့ချပွဲပြုလုပ်စဥ်အာဏာသိမ်း​ခေါင်း​ဆောင်မင်း​အောင်လှိုင်ကို တပ်ချုပ်ရာထူးမှဆင်း၍ စိုးဝင်းကိုလွှဲ​ပေးရန်​ပြောခဲ့သည်။ထို​နောက် ​ပျူ​စောထီးဘုန်းပေါက်ကိုယ်​တော်ကိုစစ်​ကောင်စီက ​ခေတ္တ​ခေါ်ယူစစ်​ဆေးပြီးမှပြန်လွှတ်ခဲ့သည်။

စစ်တပ်အတွင်း မင်း​အောင်လှိုင်ထက် စိုးဝင်းကိုပိုကြိုက်ကြ​ကြောင်းသတင်းများမကြာခဏထွက်​ပေါ်​လေ့ရှိပြီး​နောက်အာဏာသိမ်း​ခေါင်း​ဆောင်က ၎င်း၏ လူယုံဗိုလ်ချုပ်များကို ဒု​ခေါင်း​ဆောင်​ဆောင်စိုးဝင်း နှင့် ရာထူး၊အဆင့်တူများစွာဖန်တီးနေရာ​ပေး၍ စိုးဝင်းကို​နောက်​ရောက်​အောင်လုပ်ခဲ့သည်။

စစ်ကောင်စီဒုတိယခေါင်းဆောင်သည် ပဲခူးတိုင်းခရီးစဉ်တွင် တောင်ငူအကျဉ်းထောင်၊ ဆေးရုံတို့အပြင်ရန်ကုန်-မန္တလေး အမြန်လမ်း ၁၆၅ မိုင် ၁ ဖာလုံနှင့် ၁၆၅ မိုင် ၃ ဖာလုံကြားရှိ ဆွာချောင်းတံတားပျက်စီးမှုကိုလည်းသွားရောက်ကြည်ရှုခဲ့သည်။

ပဲခူးတိုင်းအတွင်း ငလျင်ဒဏ်ကြောင့်ကနဦးစာရင်းများအရသေဆုံးသူ ၄၄ ဦး၊ ဒဏ်ရာရရှိသူ ၂၃၄ ဦးရှိပြီး စေတီ ၇၁ ဆူ၊ ဘုန်းကြီးကျောင်း ၁၈၆ ကျောင်း၊ စာသင်ကျောင်း ၉၂ ကျောင်း၊ ဘာသာရေးကျောင်း ၁၅ ကျောင်း၊ ဌာနဆိုင်ရာအဆောက်အဦ ၂၀၀၊ အခြားအဆောက်အဦ ၂၈၉ခု၊ လူနေအဆောက်အဦ ၁၇၃၆ လုံးနှင့် လမ်းတံတား အချို့ ထိခိုက်ပျက်စီးခဲ့ပြီးကြောင်းစစ်​​​ကောင်စီက ဖော်ပြထားသည်။

သို့သော်ငလျင်ကြောင့်သေဆုံးသူဦးရေသည်ယင်းပမာဏထက်များပြီး တောင်ငူမြို့ရှိ ရွှေတွင်းပြိုကျမှု၌ သေဆုံးသူ ၅၀ ထက်မနည်း ရှိခဲ့ကြောင်း ဒေသခံများကပြောသည်။ တောင်ငူမြို့ပေါ်တွင်လည်း အဆောက်အအုံပြိုကျ၍ လူသေဆုံးမှုအကျိုးရှိခဲ့သည်။ အမျိုးသားညီညွတ်ရေးအစိုးရ၏ ဧပြီလ ၇ရက်က ထုတ်ပြန်ချက်တွင် ပဲခူးတိုင်းတွင် ငလျင်ကြောင့် သေဆုံးသူ ၆၈ဦး၊ ဒဏ်ရာရသူ ၂၃၄ဦးနှင့် ဘေးသင့်ပြည်သူ ၂သိန်း၆သောင်းခန့်ရှိကြောင်း ဖော်ပြထားသည်။

စစ်​ကောင်စီသည်စစ်ကိုင်းငလျင်​​ကြောင့်​သေဆုံးပျက်စီးမှုအ​ခြေအ​နေများကိုသတင်းဖုံးကွယ်ရန်ကြိုးစား​နေပြီး နိုင်ငံတကာမှသတင်း​ထောက်များကိုလာ​ရောက်ခွင့်မပြုသလို ၊ရှာ​ဖွေကယ်ဆယ်​ရေးလုပ်ငန်းများကိုလည်း ရုပ်အ​လောင်း​တွေ့ပါက၎င်းတို့ထံသတင်းပို့ခိုင်းပြီးစစ်​ကောင်စီကသာထိန်းချုပ်ထုတ်ပြန်​သောပုံစံလုပ်လာသည်။ ​မြေပြင်​သေဆုံး​ပျောက်ဆုံးသူမှာ စစ်​ကောင်စီထုတ်ပြန်​သောအ​ရေအတွက်ထက်ပိုများ​​ကြောင်း​ဒေသခံများရှာ​ဖွေကယ်ဆယ်​​ရေးသမားများက​ပြောသည်။

ထိုအပြင် စစ်​ကောင်စီကငလျင်​ဘေးကူညီကယ်ဆယ်သူများကို လွတ်လပ်စွာလုပ်ကိုင်ခွင့်မပြုဘဲဘစစ်​ကောင်စီထံခွင့်​တောင်းပြီးမှလုပ်ရန်ကန့်သတ်ထားသည်။သမိုင်းတ​လျှောက် ပျက်စီးဆုံးရှုံးမှုအများဆုံးငလျင်​ဘေးကိုရင်ဆိုင်ရ​သော်လည်းစစ်​ကောင်စီက အင်တာနက်ဖြတ်​တောက်မှုပိုမိုပြုလုပ်ထားပြီး VPN ကိုလည်းဖွင့်မ​​​ပေး​ပေ။