Cənubi Koreya hökuməti durğun daxili bazarı canlandırmaq və istehlakı artırmaq məqsədilə bütün vətəndaşlara nağd ödənişləri təmin edəcək genişmiqyaslı yardım proqramına başlayır.
Gununsesi.info xarici mediaya istinadən xəbər verir ki, Cənubi Koreyanın planlaşdırdığı proqramın bir hissəsi olaraq, şəxslərə 150.000 von (təxminən 110 dollar) dəyərində “istehlak kuponları” veriləcək.
Təşəbbüs Cənubi Koreya Milli Assambleyası tərəfindən təsdiqlənən təxminən 31,8 trilyon von (təxminən 23,3 milyard dollar) məbləğində əlavə büdcənin bir hissəsidir. Proqram iyulun 21-də başlayacaq və sentyabrın 12-dək davam edəcək.
Daxili İşlər Nazirinin müavini Kim Min-jae yardım planı ilə bağlı açıqlamasında “Biz bu ödənişləri vətəndaşların xərclərini artırmaqla iqtisadi bərpanı sürətləndirməyi və həmçinin aşağı gəlirli qrupları dəstəkləməyi hədəfləyirik” deyib.
Yardım fiziki şəxslərə debet kartları, kredit kartları, əvvəlcədən ödənilmiş kartlar və ya yerli hökumətlər tərəfindən paylanan hədiyyə kartları vasitəsilə çatdırılacaq.
Bununla belə, proqram ümumi dəstəklə məhdudlaşmır. Ehtiyacı olan qruplar üçün əlavə xüsusi yardım da planlaşdırılır.
Orxan
