ဖေဖော်ဝါရီ-၂၊ ၂၀၂၆။ဇေအောင်/People’s Spring
မကွေးတိုင်း၊ မြိုင်မြို့နယ်မှာ စစ်ကောင်စီတပ်စစ်ကြောင်းက ဒေသခံပြည်သူတွေရဲ့ ဆန်အိတ်ပေါင်း ၄၀၀ ကျော်နဲ့ ပဲအိတ်တွေ လုယူသွားကြောင်း ဒေသခံတွေက ပြောပါတယ်။
မြိုင်မြို့နယ်တောင်ပိုင်းက အိုရင်းကျေးရွာမှာ ရောက်နေတဲ့ စစ်ကောင်စီတပ်နဲ့ ပျူစောထီးတွေဟာ မနေ့က ဖေဖော်ဝါရီ ၁ ရက် မနက်ပိုင်းမှာ အိုရင်းရွာဘုန်းကြီးကျောင်းသိမ်းထားတဲ့ ဒေသခံပြည်သူတွေရဲ့ ဆန်အိတ်ပေါင်း ၄၀၀ ကျော်နဲ့ ပဲအိတ်တွေ သိမ်းယူသွားတာဖြစ်ကြောင်း အညာမြေအရပ်ဖက်အဖွဲ့အစည်း-မြိုင်က ပြောပါတယ်။
“ နွားလှည်းနှစ်စီး၊လိုက်ထရပ်တစ်စီး၊ထော်လာဂျီသုံးစီးနဲ့ အိုရင်းကျေးရွာ ဘုန်းကြီးကျောင်းထဲကနေ ဆန်အိတ်တွေနဲ့ ပဲအိတ်တွေကို တွင်းမပျူစောထီးရွာထဲ သယ်သွားတာ” လို့ အထက်ပါအဖွဲ့တာဝန်ရှိသူက ပြောပါတယ်။
Public Service Announcement
ဆန်အိတ်တွေဟာ အိုရင်းရွာ ဘုန်းကြီးကျောင်းကို ရေလာကြီးကျေးရွာ ဇီးခွဲစက်ကနေ လာရောက်သိမ်းထားတဲ့ ဆန်အိတ် ၁၀ဝ ကျော်၊ ထန်းတပင်ကျေးရွာက စျေးသည်တစ်ဦး လာရောက်သိမ်းဆည်းထားတဲ့ ဆန်အိတ် ၂ဝဝ ကျော်နဲ့ ပြည်သူတွေ သိမ်းဆည်းထားတဲ့ ဆန်အိတ်တွေအပါအဝင် ဆန်အိတ် စုစုပေါင်း ၄၀၀ ကျော်နဲ့ ပဲအိတ်တွေ သိမ်းဆည်းခံလိုက်ရတာဖြစ်ကြောင်း အညာမြေအရပ်ဖက်အဖွဲ့အစည်း-မြိုင်က ပြောပါတယ်။
အဲဒီ စစ်ကြောင်းဟာ အိုရင်းကျေးရွာကို ဇန်နဝါရီ ၃၁ ရက်က မနက်ပိုင်းမှာ စတင်ဝင်ရောက်ခဲ့ခြင်းဖြစ်ပြီး ရောက်တဲ့နေ့ကပဲ ကျေးရွာက နေအိမ်အချို့ကို မီးရှို့ဖျက်ဆီးခဲ့ကြောင်း ဒေသခံတွေက ပြောပါတယ်။
စစ်ကောင်စီတပ်စစ်ကြောင်းဟာ ဇန်နဝါရီ နောက်ဆုံးပတ်ကတည်းက မြိုင်မြို့နယ် တောင်ပိုင်းရှိကျေးရွာတွေကို လှည့်ပတ်စစ်ကြောင်းထိုးနေခဲ့ပြီး မနေ့က တွင်းမပျူစောထီးရွာအတွင်း ပြန်လည်ဝင်ရောက်သွားတယ်လို့ သိရပါတယ်။
စစ်ကောင်စီတပ်စစ်ကြောင်းဟာ ပြည်သူတွေရဲ့သီးနှံတွေကိုပါ မီးရှို့ဖျက်ဆီးနေတာကြောင့် လှောင်မထားဖို့ အညာမြေအရပ်ဖက်အဖွဲ့အစည်း-မြိုင်က ပြီးခဲ့တဲ့ရက်ပိုင်းကပဲ သတိပေးခဲ့ပါသေးတယ်။
