အောက်တိုဘာ-၂၆၊၊၂၀၂၅။အိမ်သွင်/People’s Spring
ချင်းပြည်နယ်ကမင်းတပ်မြို့ကိုစစ်ကောင်စီကဒီနေ့အောက်တိုဘာ၂၆ရက် နေ့လယ်ပိုင်းမှာ ဂျက်ဖိုက်တာနဲ့ ဗုံးကြဲတိုက်ခိုက်သွားပါတယ်။
နေ့လယ် ၂နာရီ၁၈မိနစ်မှာ ဗုံးကြဲတာဖြစ်ပြီး လေကြောင်းသတိပေးချက်ကြိုရလို့ ဗုံးခိုကျင်းထဲမှာ ပုန်းနေခဲ့ရတယ်လို့ဒေသခံတစ်ဦးက ပြောပါတယ်။
ဒီနေ့လေကြောင်းတိုက်ခိုက်မှုမှာ ထိခိုက်မှုသတင်းမကြားရသေးကြောင်း ချင်းကာကွယ်ရေးတပ်(မင်းတပ်)နဲ့နီးစပ်သူတစ်ဦးက ပြောပါတယ်။
Public Service Announcement
စစ်ကောင်စီက မနေ့ညပိုင်းကလည်း မင်းတပ်မြို့နဲ့ဆက်စပ်နေတဲ့ကန်ပက်လက်မြို့ကို လေကြောင်းကနေ ဗုံးသုံးလုံးကြဲခဲ့ပါတယ်။
အောက်တိုဘာ ၂၄ရက်မနက်ပိုင်းက ကန်ပက်လက်မြို့မှာကျင်းပနေတဲ့ CDF ကန်ပက်လက်စစ်ဦစီးချုပ် ဆလိုင်းအောင်လိန်းရဲ့ မင်္ဂလာဆောင်ကို ဗုံးကြဲခဲ့တဲ့ဖြစ်စဉ်မှာလည်း လေးဦးသေဆုံးခဲ့ပါတယ်။
ဒီနေ့လေကြောင်းကနေ ဗုံးကြဲတဲ့မင်းတပ်မြို့ကို အောက်တိုဘာ ၈ရက်ကလည်း ဗုံးကြဲခဲ့တဲ့ဖြစ်စဉ်မှာ မသန်စွမ်းသူတစ်ဦးနဲ့ ကျောင်းသားသုံးဦး သေဆုံးခဲ့ပါတယ်။ စစ်ကောင်စီက အောက်တိုဘာအတွင်း ကန်ပက်လက်၊ မင်းတပ်၊ မတူပီ၊ ဟားခါး နဲ့ တွန်းဇံမြို့နယ်တို့ကို လေကြောင်းကနေ ဗုံးကြဲတိုက်ခိုက်ခဲ့ပါတယ်။ လေကြောင်းရန်ကိုသတိပြုကြဖို့၊ လူစုလူဝေးတွေမလုပ်ကြဖို့ ချင်းကာကွယ်ရေးတပ်တွေကသတိပေးထားပါတယ်။
