အောက်တိုဘာ-၂၃၊၂၀၂၅။အိမ်သွင်/People’s Spring
ပြည်သူ့ကာကွယ်ရေးတပ်ဖွဲ့ တွေထိန်းချုပ်ထားတဲ့ တမူးမြို့နယ်၊ နမ့်မွန်းတားရွာကို ဝင်လာတဲ့စစ်တပ်စစ်ကြောင်းကို တော်လှန်ရေးတပ်တွေကခုခံ တိုက်ခိုက်တာကြောင့် စစ်တပ်ကသေဆုံး ရုပ်အလောင်းတွေဆွဲပြီး ပြန်ထွက်ပြေးသွားပါတယ်။
စစ်ကောင်စီတပ် ၊ကသည်းတပ် နဲ့ ပြည်သူ့စစ်ပူးပေါင်းတပ်တွေကနန်မွန်းတားရွာကို အောက်တိုဘာလ၂၂ရက်မနက်ပိုင်းမှာစစ်ကြောင်းထိုးဖို့ကြိုးစားတာလို့ တမူးမြို့ခံတွေကပြောပါတယ်။
“ အလောင်းတချို့ ပြန်ဆွဲပြေးတယ်။ရွာကို ကာကွယ်ရေးတပ်တွေက ဆက်ထိန်းထားနိုင်တယ်” လို့ တမူးမြို့ခံကပြောပါတယ်။
Public Service Announcement
တမူးမြို့ နဲဲ့ ၁၂မိုင်ဝန်းကျင်အကွာမှာတည်ရှိတဲ့ နမ့်မွန်းတားရွာဟာ ကလေး-တမူးအာရှလမ်းပေါ်မှာ ရှိတာပါ။နမ့်မွန်းတားရွာနဲ့တမူးမြို့ကြားက ပန်းသာရွာမှာ စစ်ကောင်စီကတပ်စွဲထားပြီး စစ်ကြောင်းထိုးဖို့မကြာခဏကြိုးစားနေတာပါ။
နမ့်မွန်းတားရွာကိုဩဂုတ်လဆန်းကလည်းစစ်တပ်၊ကသည်းတပ်နဲ့ ပြည်သူ့စစ်ပူးပေါင်းတပ်တွေက အင်အား ၁၀၀ ကျော်နဲ့ဝင်ရောက်လာလို့ တိုက်ပွဲတွေပြင်းထန်ခဲ့ဖူးပါတယ်။
ဩဂုတ်လ ၅ရက်ကနေ ဩဂုတ်လ၈ရက်နေ့အထိ တိုက်ပွဲတွေပြင်းထန်ခဲ့ပြီး စစ်တပ်ကလေကြောင်းကနေလည်းတိုက်ခိုက်ခဲ့ပါတယ်။ တိုက်ပွဲမှာ စစ်ကောင်စီဘက်ကခြောက်ဦးသေဆုံးပြီး ၂၀ကျော်ဒဏ်ရာရခဲ့သလို ကာကွယ်ရေးရဲဘော်ငါးဦးကျဆုံးခဲ့တယ်လို့ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ အမှတ်(၁)စစ်ဒေသက သတင်းထုတ်ပြန်ခဲ့ပါတယ်။ မနေ့ကဖြစ်ပွားတဲ့တိုက်ပွဲနဲ့ပတ်သက်ပြီးတော့ သတင်းထုတ်ပြန်ထားခြင်းမရှိသေးပါဘူး။
တမူးမြို့မှာ ပန်းသာရွာ၊မင်းသာရွာနဲ့ မြို့ပေါ်နေရာအချို့မှာ စစ်တပ်က အခိုင်အမာတပ်စွဲထားတာပါ။ တမူးခရိုင်အတွင်း ခါမ်းပတ်မြို့နဲ့မြို့သစ်မြို့ကို ပြည်သူ့ကာကွယ်ရေးတပ်ဖွဲ့တွေက ကထိန်းချုပ်ထားပြီး စစ်တပ်က တမူးမြို့ကိုသာ ထိန်းချုပ်ထားနိုင်တာပါ။
လက်ရှိမှာ ကလေး-တမူး အာရှလမ်းကနေလည်း တမူးမြို့ဘက်ကိုဦးတည်ပြီး စစ်တပ်ကစစ်ကြောင်းထိုးဖို့ကြိုးစားနေပါတယ်။ စစ်တပ်စစ်ကြောင်းတွေကြောင့် ကလေး-တမူး အာရှအဝေးပြေးလမ်းနဲ့ ပတ်ဝန်းကျင်ကကျေးရွာဆယ်ရွာထက်မနည်း စစ်ရှောင်နေကြရပြီး အကူအညီတွေလိုအပ်နေပါတယ်။လက်ရှိလုံခြုံရေးအခြေအနေအရ ကလေး-တမူး အာရှလမ်းကိုလည်း အရပ်သားပြည်သူတွေသွားလာခွင့်ကို PDF တွေကယာယီကန့်သတ်ထားပါတယ်။
