ဆီမီးထွန်းပွဲ ဗုံးကြဲခံရမှုကြောင့် ထိခိုက်သူတွေကို ထောက်ပံ့ကူညီဖို့ ကော်မတီဖွဲ့

အောက်တိုဘာ-၁၄၊၂၀၂၅။ဇေအောင်/People’s Spring

ချောင်းဦးမြို့နယ်ကဆီမီးထွန်းပွဲ စစ်တပ်ကဗုံးကြဲမှုကြောင့် ထိခိုက်သူတွေအတွက် အရေးပေါ် ကူညီကယ်ဆယ်ရေးလုပ်ငန်းကော်မတီ ဖွဲ့စည်းကြောင်း အဲဒီကော်မတီကဒီက​နေ့ ထုတ်ပြန်ကြေညာပါတယ်။

ပြီးခဲ့တဲ့အောက်တိုဘာ၆ရက်၊သီတင်းကျွတ်လပြည့်နေ့ညက မုံရွာခရိုင်၊ မုံရွာမြို့နယ်နှင့် ချောင်းဦးမြို့နယ်အစပ်မှာ စစ်တပ်ရဲ့ လေကြောင်းတိုက်ခိုက်မှုကြောင့် ထိခိုက်သေဆုံးခဲ့ရတဲ့ ပြည်သူတွေကို ထောက်ပံ့ကူညီရေးလုပ်ငန်းစဥ်တွေ စနစ်တကျ ဆောင်ရွက်နိုင်ရေးအတွက် အရေးပေါ်ကူညီကယ်ဆယ်ရေးလုပ်ငန်းကော်မတီအား ဖွဲ့စည်းလိုက်ကြောင်း အဲဒီကော်မတီကအောက်တိုဘာ ၁၄ ရက်မှာ ထုတ်ပြန် အသိပေးပါတယ်။

ဗုံးကြဲမှုကြောင့်အနည်းဆုံးပြည်သူ ၂၃ ​ ဦး​သေဆုံးခဲ့ပြီး ၆၀ ခန့် ဒဏ်ရာရရှိခဲ့တယ်လို့ ကော်မတီရဲ့ထုတ်ပြန်ချက်မှာ ဖော်ပြပါတယ်။ လက်ရှိမှာလည်း ယင်းကော်မတီကနေ သေဆုံး ဒဏ်ရာရ ပြည်သူများအတွက် လိုအပ်တာတွေကို အချိန်နဲ့တပြေးညီ ကူညီဆောင်ရွက်နေတယ်လို့သိရပါတယ်။

Public Service Announcement

ကော်မတီဖွဲ့စည်းတာနဲ့ပတ်သက်လို့ ယင်းကော်မတီကို ဆက်သွယ်မေး​မြန်းထားပြီး လက်တလောဖြေကြားခြင်း မရှိသေးပါဘူး။

အဲဒီကော်မတီကိုမုံရွာ-အမြင့်လမ်းသပိတ်ဦးဆောင်ကော်မတီ၊ ချောင်းဦးမြို့နယ် လူငယ်အင်အားစုကော်မတီ၊ မုံရွာလူထုသပိတ်တိုက်ပွဲ ဦးဆောင်ကော်မတီတို့နဲ့ သက်ဆိုင်ရာ မြို့နယ်အသီးသီးမှ တာဝန်ခံများ၊ဒေသခံအဖွဲ့အစည်းများ စုစည်းကာ ဖွဲ့စည်းသွားမယ်လို့ ထုတ်ပြန်ထားပါတယ်။

ချောင်းဦးဆီမီးထွန်းပွဲစစ်တပ် ဗုံးကြဲတိုက်ခိုက်လို့ ထိခိုက်ဒဏ်ရာရသူတွေကို ဆေးကုသရာမှာ ဆေးဝါးနဲ့ ဆေးဘက်ဆိုင်ရာအကူအညီတွေ များစွာလိုအပ်နေတယ်လို့ သွားရောက်ကူညီခဲ့သူတွေက ပြောပါတယ်။

ဆီမီးထွန်းပွဲကို ဗုံးကြဲခဲ့တဲ့ စစ်အုပ်စုကို ဖိအားပေး ဆန့်ကျင်ကန့်ကွက်ရုံသာမက နိုင်ငံတကာရာဇဝတ်မှုများကျူးလွန်နေတဲ့ အကြမ်းဖက်အဖွဲ့အစည်းအဖြစ် သတ်မှတ်ပြီး နိုင်ငံတကာ ယန္တရားတွေမှာ တရားစွဲဆိုအပြစ်ပေးနိုင်ဖို့ ဝိုင်းဝန်းကြိုးစားပေးရန် နိုင်ငံတကာရှိ အစိုးရများနဲ့ အဖွဲ့အစည်းများအား အထွေထွေသပိတ် ပေါင်းစပ်ညှိနှိုင်းရေးအင်အားစု(GSCB)က တောင်းဆိုထားပါတယ်။