■စစ်ကောင်စီတပ်မှ ၄ ဦးသေပြီး ဒဏ်ရာရသူများကို ဆွဲထုတ်သွားဟုဒေသခံအချို့ပြော
သြဂုတ်-၂၉၊၂၀၂၅။လူအေး/People’s Spring
ရှမ်းပြည်အရှေ့ပိုင်းမိုင်းယောင်းမြို့နယ်တွင် စစ်ကောင်စီတပ် နှင့် RCSS ယမန်နေ့က တိုက်ပွဲဖြစ်ခဲ့ပြီး စစ်ကောင်စီဘက်မှ ၄ဦး သေဆုံးခဲ့သည်ဟု ဒေသခံသတင်းရင်းမြစ်များကပြောသည်။
တာချီလိတ်မြို့နှင့်ဆက်စပ်နေသော မိုင်းယောင်းမြို့မှ RCSS တပ်စွဲထားသောနေရာကို စစ်ကောင်စီ၏အမှတ်(၃၃၅)ခြေမြန်တပ်ရင်း(ခမရ၃၃၅)နှင့်ဌာနေပြည်သူ့စစ်ဖြစ်သောလားဟူပြည်သူ့စစ် ပူးပေါင်းအင်အား ၁၀၀ ကျော်ဖြစ် ဝင်ရောက်လာ၍ သြဂုတ် ၂၈ ရက်နေ့တွင်တိုက်ပွဲဖြစ်ပွားခြင်းဟုသတင်းရရှိသည်။
Public Service Announcement
“မနေ့ကဖြစ်တာ။တစ်နေ့ခင်းလုံးပဲ။အမှန်က အစကတည်းက ငြိနေတာ။အခုတော့ထိပ်တိုက်တိုက်ပွဲဖြစ်တာ။မနေ့ကတော့နယ်ခံလူတွေကပြောတယ်။ စစ်တပ်ဖက်က ၄ယောက်သေပြီး ဒဏ်ရာရတာတွေကို ဆွဲထုတ်သွားတယ်တဲ့။ ဒီနေ့အထိ စစ်ရေးက ဆက်တင်းမာနေတဲ့ အခြေအနေလို့သိရတယ်” ဟု မိုင်းယောင်းမြို့ ပေါ်တွင်နေထိုင်သူတစ်ဦးကပြောသည်။
တိုက်ပွဲအတွင်း စစ်ကောင်စီဘက်မှ ၄ ဦးသေဆုံးပြီး ၅ ဦး ဒဏ်ရာရသည်ဟုဒေသခံများကို ကိုးကား၍ Tai Youth Support SNLD က ဖော်ပြထားသည်။ RCSS ဘက်၌ ထိခိုက်သူမရှိဟု ဆိုသည်။Tai Youth Support SNLD ရှမ်းပြည်နယ်မှ နိုင်ငံရေးနှင့် ဒေသတွင်းသတင်းများ ဖော်ပြပေးနေသည်။ တိုက်ပွဲတွင် စစ်ကောင်စီတပ်သေဆုံးထိခိုက်မှုအခြေအနေကို People’s Spring ကသီးခြားအတည်မပြုနိုင်သေးပါ။
ပြီးခဲ့သည့်သြဂုတ်လလယ်တွင် ရှမ်းအရှေ့နှင့် ရှမ်းတောင်ပိုင်းတွင် စစ်ကောင်စီတပ်က လှုံ့ဆော် ဝါဒဖြန့် ခဲ့သည့် TNLAနှင့် MNDAA ဆန့်ကျင်ရေးလှုပ်ရှားမှုများကို RCSSက လက်မခံ၍ စစ်ကောင်စီဘက်မှ ရန်စလာခြင်းဖြစ်ကြောင်း တိုင်းရင်းသားအရေးလှုပ်ရှားသူတစ်ဦးကသုံးသပ်ပြောကြားသည်။
စစ်ကောင်စီက ရှမ်းပြည်နယ်တောင်ပိုင်းနှင့် အရှေ့ပိုင်းမှပြည်သူများကို မလိုက်မနေရဖိအားပေးခေါ်ဆောင်ပြီး TNLA နှင့် MNDAA တို့ကို ဆန့်ကျင်ရန် ဆန္ဒပြခိုင်းခဲ့သည်။ထိုသို့ ဆန္ဒပြလှုံ့ဆော်ခိုင်းခြင်းသည် လူမျိုးရေး ရန်တိုက်ပေးခြင်းဖြစ်ကြောင်း RCSSကထုတ်ပြန် ကန့်ကွက်ရှုတ်ချထားသည်။
တိုက်ပွဲသတင်းကို RCSSရော စစ်ကောင်စီကပါ ထုတ်ပြန်ထားခြင်းမရှိသေးပေ။
