ဧပြီ-၃၀၊၂၀၂၅။အိမ်သွင်/People’s Spring
ရှမ်းပြည်နယ်၊ တန့်ယန်းမြို့ရှိနေအိမ်တစ်အိမ်တွင် ယနေ့ မွန်းလွဲပိုင်းက ပြင်းထန်သည့်ပေါက်ကွဲမှု ဖြစ်ခဲ့ပြီး လူသုံးဦးဒဏ်ရာရရှိကာ ဘေးပတ်ဝန်းကျင်နေအိမ်များ ထိခိုက်ပျက်စီးခဲ့သည်။
တန့်ယန်းမြို့အမှတ်၂ ရပ်ကွက်မှ ရှမ်းစာပေနှင့်ယဉ်ကျေးမှုရုံးအနီးမှ အိမ်တစ်လုံးတွင် ဧပြီလ ၃၀ ရက်နေ မွန်းလွဲ ၁၂ နာရီ ၄၀ မိနစ်ခန့်၌ ပေါက်ကွဲခြင်းဖြစ်သည်။
“တစ်မြို့လုံးတုန်သွားတဲ့အထိပေါက်ကွဲအားပြင်းထန်တယ်။မြေအောက်ခန်းကပေါက်ကွဲတာ။ပေါက်ကွဲတဲ့အိမ်မှာ မြေကျင်းအကြီးကြီးဖြစ်သွားတယ်။ ဘေးအိမ်တွေ မှန်တွေကွဲတယ်။ နံရံတွေအက်တယ်။ အဲ့ဒီအိမ်မှာ လက်နက်တွေနဲ့ ခဲယမ်းတွေ လှောင်ထားတာကနေပြီးတော့ပေါက်ကွဲတာ” ဟု ဒေသခံတဦးကပြောသည်။
Public Service Announcement
ပေါက်ကွဲမှုကြောင့်ကနဦးရရှိသော သတင်းများအရ လူသုံးဦး ဒဏ်ရာအပြင်းအထန်ရခဲ့သည်ဟု ဒေသခံသတင်းရင်းမြစ်အချို့ကပြောသည်။
တန့်ယန်းတွင် စစ်ကောင်စီ၊ ဝတပ်ဖွဲ့(UWSA)၊ ရှမ်းတပ်(SSPP)တို့ လှုပ်ရှားပြီး လက်နက်ကိုင်အဖွဲ့များ၏ လက်နက်တိုက်ပေါက်ကွဲခြင်းဖြစ်နိုင်သလို ဒုစရိုက်ကျူးလွန်သူများက ဝှက်ထားသည့် လက်နက်ခဲယမ်းပေါက်ကွဲခြင်းလည်း ဖြစ်နိုင်ကြောင်း ဒေသခံအချို့ကသုံးသပ်သည်။
“လက်နက်ကိုင်အဖွဲ့ပိုင်ဆိုရင် စကစနဲ့ညှ်ိပြီး ဘာမှမထူးဘဲ ပြီးသွားလိမ့်မယ်။လက်နက်တွေအိမ်ထဲထားတာဆိုတော့ အဖွဲ့အစည်းထဲကလည်း ဖြစ်န်ိုင်တယ်။လက်နက်မှောင်ခိုသမားတို့ လက်နက်နဲ့ဓါးပြတိုက်တဲ့မသမာလူတွေလား အများကြီးထင်မြင်ယူဆလို့ရတယ်။တန့်ယန်းမှာဖြစ်ပွါးခဲ့တဲ့ ရွှေဆိုင်ဓါးပြတိုက်မှုတွေအကြီးစားဓါးပြတိုက်လူသတ်မှုတွေက လက်နက်ကိုင်အဖွဲ့အစည်းကလူတွေနဲ့ပတ်သတ်ဆက်နွယ်နေတာလို့ သတင်းသဲ့သဲ့ထွက်နေတာတွေလည်းရှိတယ်ဗျ”ဟု ဒေသခံတစ်ဦးကပြောသည်။
စစ်ကောင်စီက ၂၀၂၄ သြဂုတ်လတွင် အရှေ့မြောက်တိုင်းစစ်ဌာနချုပ်(ရမခ)နှင့် လားရှိုးမြို့ကို MNDAA နှင့် ပူးပေါင်းတပ်ထံလက်လွှတ်ဆုံးရှုံးရပြီးနောက် တန့်ယန်းမြို့တွင် ယာယီရမခ ကိုအခြေပြုခဲ့သည်။ဖြစ်စဉ်နှင့် ပတ်သက်၍ စစ်ကောင်စီ၊ UWSAနှင့် SSPPတို့ကသတင်းမထုတ်ပြန်သေးပေ။
