ဧပြီ-၂၈၊၂၀၂၅။ရဲခေါင်/People’s Spring
ပြည်တွင်းရွှေစျေးသည် ယနေ့(ဧပြီ ၂၈)တွင်၁၆ ပဲရည်တစ်ကျပ်သားလျင် ၇၄ သိန်းခွဲ ဝန်းကျင်ထိတက်လာသည်။
ဧပြီ ၂၈ ရက်ည ၁၀ နာရီအထိ ကမ္ဘာရွှေစျေးသည် တစ်အောင်စ ၃,၃၂၄ဒေါ်လာဝန်းကျင်စျေးရှိသည်။
ကမ္ဘာ့ရွှေဈေးတက်နေသဖြင့် ပြည်တွင်း ဈေးကွက်တွင် ပြင်ပပေါင်ဈေးမှာ ၁၆ ပဲရည် တစ်ကျပ်သား မှာ ၇,၄၅၀,၀၀၀ ကျပ် ရှိသည်။ ၁၅ ပဲရည်စျေးသည် ကျပ်သိန်း ၇၀ ဝန်းကျင်ဖြင့် အရောင်း အဝယ်ရှိနေကြောင်း ရွှေစျေးကွက်အတွင်း အရောင်း အဝယ်ပြုလုပ်နေသူအချို့က ပြောသည်။
Public Service Announcement
“ကမ္ဘာ့ရွှေက အတက်အကျ မငြိမ်ဘူး။ပြီးခဲ့တဲ့အပတ်က ဆို ဒေါ်လာ ၃,၄၀၀ ကို တော်တော်ကျော်သွားတာ။အခု တစ်ပတ်အဖွင့်စျေးကွက်အရဆို လည်း ၃,၄၀၀ စျေးတန်းရောက်မလားဆိုတာ သတိထားရမယ်။အထူးသဖြင့်တော့ ဝယ်၊ရောင်းတွေ ဂရုစိုက်ရမှာပေါ့”ဟု ပြည်တွင်းရွှေလုပ်ငန်းရှင်တဦးက လူထုနွေဦးသို့ပြောသည်။
ဧပြီ ၂၈ရက် ညနေပိုင်း ပြည်တွင်းရွှေစျေးကွက်အရ ၁၆ ပဲရည်တစ်ကျပ်သားရောင်းစျေး ၇,၄၅၀, ၀၀၀ ကျပ် နှင့် ဝယ်စျေး ၇,၃၄၀,၀၀၀ကျပ် ခန့်ရှိနေသည်။
“ပြည်တွင်းရွှေစျေးကတော့ စကစ ဘယ်လိုပဲ စျေးနှိမ့်ပြီး ထိန်းထိန်း ကမ္ဘာ့ရွှေစျေးအတိုင်းပဲသွားနေရတာပဲ။ ဘယ်ဆိုင်မှလဲ သူတို့(စကစ ၏ ထိန်းချုပ်သတ်မှတ် စျေး)နှုန်းအတိုင်း မလုပ်နိုင်ဘူးလေ။ရွှေ ကို ကိုင်ထားပါလို့လဲ မပြောချင်ဘူး။ဝယ်ထားပါဆိုပြီးလည်း မတိုက်တွန်းဘူး။ဘာလိုလဲဆိုတော့ ပြည်သူက ကြပ်တည်းနေတာလေ”ဟု ပြည်တွင်းရွှေလုပ်ငန်းရှင်တဦးကပြောသည်။
ပြည်တွင်း၌ ရွှေ ချိန်တွယ်ရာတွင်မူ ကျပ်၊ပဲ၊မူး၊ရွေး ကိုအသုံးပြုပြီး တစ်ကျပ်သားလျှင် ၀ ဒသမ ၅၂၅ အောင် စ ရှိကာ (ယနေ့ကမ္ဘာ့ရွှေပေါက်စျေး× တစ်ဒေါ်လာငွေလဲနှုန်း× ၀ ဒသမ ၅၂၅ )ဖြင့် တွက်ချက်ပါက ရရှိသည့် ပမာဏသည် အနီးစပ်ဆုံးပြည်တွင်း အခေါက်ရွှေစျေးရရှိမည် ဖြစ်သည်။ပြည်တွင်းနိုင်ငံ ခြားငွေလဲနှုန်းစျေးကွက်၌မူ စျေးတည်ငြိမ်နေပြီး ဧပြီ ၂၈ ရက်နေ့ တစ်ဒေါ်လာ ပြင်ပပေါက်စျေး အရောင်း ၄,၄၂၀ ကျပ်နှင့် အဝယ် ၄,၃၇၀ ကျပ်ဝန်းကျင်ရှိသည်။
မတ်လ ဒုတိယပတ်ကစ၍ ရွှေဈေးသည် သမိုင်းတွင် ပထမဆုံးအကြိမ် တစ်အောင်စလျင် ဒေါ်လာ ၃,၀၀၀ ကျော်သို့ ရောက်ရှိခဲ့မှုနှင့်အတူ ပြည် တွင်း ရွှေစျေးကွက်မှာလည်း ၆၅ သိန်း ဝန်းကျင်မှ ဆက်တိုက်ဈေးတက်လာခဲ့ခြင်းဖြစ်သည်။
စစ်ကောင်စီလက်အောက်ခံရွှေလုပ်ငန်းရှင်အသင်းက၁၆ ပဲရည်တစ်ကျပ်သားအတွက်ရည်ညွှန်းသတ်မှတ်စျေးသည် ၅,၆၆၀,၀၀၀ (၅၆ သိန်းကျော်)ကျပ်သာဖြစ်သည်။သို့သော်၎င်းတို့သတ်မှတ်စျေးဖြင့် ရွှေဆိုင်များက အရောင်းအဝယ်မပြုလုပ်ကြပေ။
