ဧပြီ ၃၊ ၂၀၂၅။ အီယိုရီ/People’s Spring
ဗြိတိန်အစိုးရက မြန်မာ့ငလျင်အတွက် စတာလင်ပေါင် ၅သန်း ထပ်မံကူညီမယ်လို့ ကြေညာလိုက်ပြီး အဲဒီအကူအညီဟာ မြန်မာစစ်တပ်ထံ စီးဆင်းခြင်းလုံးဝမရှိကြောင်း အသိပေးပါတယ်။
ဗြိတိန်သည် Disasters Emergency Committee (ဘေးအန္တရာယ်များဆိုင်ရာ အရေးပေါ်ကော်မတီ)ရဲ့ ရန်ပုံငွေကောက်ခံခြင်းအစီအစဥ်မှာ စတာလင်ပေါင် ၅ သန်း ထပ်မံထည့်ဝင်ကြောင်း ဒီနေ့ ကြေညာလိုက်ပါတယ်။
ဗြိတိန်အစိုးရက ငလျင်ဘေးဒဏ်သင့် မြန်မာပြည်သူများအတွက် စတာလင်ပေါင် ၁၀ သန်းကို ကနဦး ပံ့ပိုးပေးခဲ့ပြီးဖြစ်ရာ ဒီနေ့ထပ်တိုး ရန်ပုံငွေအပါအဝင် စုစုပေါင်း စတာလင်ပေါင် ၁၅ သန်း ကူညီထောက်ပံ့ထားပြီးဖြစ်ပါတယ်။
Public Service Announcement
“မငြိမ်မသက်မှုများကြား ကြံ့ကြံ့ခံနေထိုင်နေရတဲ့ မြန်မာပြည်သူများအတွက် အခုအကျပ်အတည်းက ဆင်းရဲဒုက္ခများထပ်တိုးစေကာ အရေးပေါ်အကူအညီများ ပိုမိုလိုအပ်စေပါတယ်”လို့ ဗြိတိန်ဖွံ့ဖြိုးရေးဆိုင်ရာဝန်ကြီး Baroness Chapman က ပြောပါတယ်။
အစားအစာ၊ ရေနဲ့ နေထိုင်စရာ အမိုးအကာများအစရှိတဲ့ အရေးပေါ် ပစ္စည်းများ အပါအဝင် ဗြိတိန်အစိုးရရဲ့ အကူအညီများဟာ ငလျင်ဒဏ်အပြင်းအထန်ဆုံးခံရတဲ့ဒေသများသို့ ရောက်ရှိနေပြီဖြစ်တယ်လို့လည်း ရန်ကုန်မြို့ ဗြိတိန်သံရုံးက အသိပေးပါတယ်။
