သတိုး/People’s Spring
တောင်ငူလေတပ်စခန်းအား ၁၀၇ မမ ရှော့တိုက်ဒုန်းများဖြင့်တိုက်ခိုက်ခဲ့သည့် စစ်ဆင်ရေးအတွင်း စစ်ကောင်စီတပ်ဖွဲ့ဝင်နှစ်ဦးသေဆုံးပြီး ကိုးဦးဒဏ်ရာရရှိကြောင်း ပြောက်ကျားတပ် Brave Warriors For Myanmar -BWM အဖွဲ့မှ တာဝန်ရှိသူက ပြောသည်။
“လေတပ်ရဲ့ အရာရှိလိုင်းခန်းကိုထိတယ်လို့သိရတယ်။စစ်သားနှစ်ဦးပွဲချင်းပြီး သေဆုံးတယ်။သေဆုံးသူ တွေကိုလည်းနေ့ချင်း သဂြိုလ်ပါတယ်”ဟု ၎င်းက ပြောသည်။
ထို့ပြင် စစ်ကောင်စီတပ်မှ ထိခိုက်ဒဏ်ရာရရှိသူ ကိုးဦးအနက်နှစ်ဦးမှာ စိုးရိမ်ရကြောင်းသိရပြီး အဆောက်အဦးတစ်ခုနှင့် ကားတစ်စီးလည်းပျက်စီးသည်ဟု သိရကြောင်း ၎င်းက ဆိုသည်။
Public Service Announcement
သို့သော် ထိခိုက်မှုနှင့်ပတ်သက်၍ လူထုနွေဦးအနေဖြင့် သီးခြားအတည်ပြုနိုင်ခြင်းမရှိပေ။
တောင်ငူလေတပ်စခန်းကို ဒီဇင်ဘာ ၁၁ ရက် ည ၁၁ နာရီတွင် BWM၏ ဦးဆောင်မှုဖြင့် Mountain Knight Civilian Defense Forces (MKCDF) ၊ Anti-Coup People’s Liberation Force (ACPLF)၊ သံတောင်မြောက်ပိုင်း အထူးဒေသ အဖွဲ့ တို့ပူးပေါင်းပြီး ၁၀၇ မမ ရှော့တိုက်ဒုန်း ငါးလုံးဖြင့်တိုက်ခိုက်ခဲ့ရာ သုံးလုံး အောင်မြင်ခဲ့ကြောင်း ယင်းအဖွဲ့က ထုတ်ပြန်ထားသည်။
ယင်းစစ်ဆင်ရေးနှင့်အတူ တောင်ပိုင်းတိုင်းစစ်ဌာနချုပ်ကိုလည်း ၁၀၇ မမရှော့တိုက်ဒုန်းများဖြင့် တိုက်ခိုက်မှုပြုလုပ်ခဲ့ပြီး စစ်ကောင်စီဘက်မှ သတင်းများဖုံးထား သောကြောင့် တပခ နှင့်ပတ်သက်၍ ထိခိုက်မှုအခြေအနေကို စုံစမ်းနေဆဲဖြစ်သည်ဟု အထက်ပါတာဝန်ရှိသူက ပြောသည်။
“ကျွန်ုပ်တို့ BWM အဖွဲ့ ဟာမစ်ရှင် တစ်ခု ပြီးသွားတိုင်းအဲဒီ မစ်ရှင်တွေမှာ လိုအပ်ချက်ရှိတာတွေကို ပြန်လည်သုံးသပ်ပြီး နောက်ထပ် မစ်ရှင်တွေ အတွက် ပိုမိုထိရောက်အောင်ပြင်ဆင်ရင်းနဲ့ တော်လှန်ရေး အရွေ့ဖြစ်အောင် ရှေ့ဆက်နေတာ မို့ ကျွန်ုပ် တို့ BWM နှင့် မဟာမိတ် အဖွဲ့တွေ ရှေ့ဆက် ပိုမိုကြိုးစားသွားမှာ ဖြစ်ကြောင်း ပြည်သူလူထုကို အသိပေးကြေငြာအပ်ပါတယ်”ဟု BWM က ထုတ်ပြန်ထားသည်။
