ဇေအောင်/People’s Spring
စစ်ကိုင်းတိုင်း၊ စစ်ကိုင်းမြို့နယ်မြောက်ခြမ်း တောင်ရင်းကျေးရွာတွင် တိုက်ပွဲဖြစ်ပွားပြီး ဒေသခံပြည်သူတစ်ထောင်ကျော် တိမ်းရှောင်နေရကြောင်း သတင်းရရှိသည်။
ယမန်နေ့(နိုဝင်ဘာ ၂၇ ရက်) ညနေ ၅နာရီခန့်က စစ်ကိုင်းမြို့နယ်၊ တောင်ရင်းကျေးရွာအတွင်း ရောက်ရှိနေသော အင်အား ၁၀၀ကျော်ပါ စစ်ကောင်စီတပ်စစ်ကြောင်းကို တိုက်ခိုက်ရာ ၂နာရီကျော်ကြာ တိုက်ပွဲဖြစ်ပွားခဲ့ကြောင်း ရွှေဘိုခရိုင် အမှတ်(၁၈) တပ်ရင်း၏ပြောရေးဆိုခွင့်ရှိသူ ကိုနေမျိုး(ပဲခူး)က ပြောသည်။
“ကျွန်တော်တို့ဘက်က ၆၀ မမတွေ RPG တွေပါပါတယ်။ ဒရုန်းမပါဘူး။ သူတို့ဘက်က ထိခိုက်မှု မသိရဘူး။ တပ်ရင်းဘက်ကလည်းအထိအခိုက် လုံးဝမရှိခဲ့ပါဘူး”ဟု ၎င်းက ပြောသည်။
Public Service Announcement
တိုက်ပွဲဖြစ်ပွားပြီးနောက် ည ၈နာရီ ၁၀မိနစ်မှ ၈နာရီခွဲအတွင်း စစ်ကောင်စီတပ်က တောင်ရင်းရွာအနီးသို့ ဂျက်ဖိုက်တာတစ်စီးဖြင့် လေကြောင်း တိုက်ခိုက်မှု ၂ကြိမ်ပြုလုပ်ခဲ့ကြောင်း Wetlet Informational Network အဖွဲ့က ပြောသည်။
“တိုက်ပွဲပြီးသွားမှ ဖိုက်တာနဲ့ ဗုံးတစ်လုံးလာချ သွားတယ်။ အထိအခိုက် မရှိပါဘူး။”ဟု ရွှေဘိုခရိုင်အမှတ်(၁၈)တပ်ရင်း၏ ပြောရေးဆိုခွင့်ရှိသူ ကိုနေမျိုး(ပဲခူး)က ပြောသည်။
အဆိုပါစစ်ကြောင်းသည် နိုဝင်ဘာ ၂၄ ရက် နံနက်ပိုင်းကလည်း တောင်ရင်းကျေးရွာကို ဝင်ရောက်ခဲ့သေးသည်။
ယခုအခါ စစ်ကြောင်းသည် ပဒူကျေးရွာရှိ စခန်းသို့ ပြန်လည်ဝင်ရောက်သွားသည်ဟု ကာကွယ်ရေးရဲဘော်တစ်ဦးက ဆိုသည်။
စစ်ရှောင်ကူညီသူများထံမှ သိရသောအချက်အလက်များအရ အဆိုပါစစ်ကြောင်းကြောင့် တောင်ရင်းကျေးရွာမှ ဒေသခံပြည်သူတစ်ထောင်ကျော် ထွက်ပြေးတိမ်းရှောင်နေရပြီး စားနပ်ရိက္ခာများ လိုအပ်နေသည်။
တောင်ရင်းကျေးရွာသည် ပြီးခဲ့သည့် ၂၀၂၂ နိုဝင်ဘာအတွင်းကလည်း စစ်ကောင်စီတပ်က ဝင်ရောက် မီးရှို့ဖျက်ဆီးခဲ့၍ နေအိမ် ၁၄၀ကျော် မီးလောင်ပြာကျခဲ့ဖူးသည်။
