ကစားစရာ သဲထုပ်ထဲ ကျောက်ဂွမ်း ရောပါနိုင်ခြေကြောင့် ဩစတြေးလျမှာ ကျောင်း ၇၀ လောက် ပိတ်ထားရ

ဩစတြေးလျ နိုင်ငံမှာ ကလေးတွေ ကစားဖို့ စီစဉ်ပေးထားတဲ့ ရောင်စုံသဲထုပ်တွေထဲမှာ ကျောက်ဂွမ်းအမှုန်တွေ ရောနှောပါဝင်နိုင်ခြေ ရှိနေတာကြောင့် ကျောင်း ၇၀ နီးပါးကို ပိတ်ထားစေဖို့ အစိုးရက ညွှန်ကြားခဲ့ပါတယ်။

ကင်ဘာရာမြို့နဲ့ အနီးတဝိုက်ကို သတ်မှတ်ထားရာ ဩစတြေးလျ မြို့တော်နယ်မြေ (ACT)ထဲမှာ ပါဝင်တဲ့ ကျောင်း ၆၉ ကျောင်းကို နိုဝင်ဘာ ၁၇ ရက်နေ့မှာ ပိတ်ထားစေမယ်လို့ အာဏာပိုင်တွေက အတည်ပြုခဲ့ပါတယ်။ အဲဒီ အတောအတွင်း ကျောင်းတွေမှာ ကလေးတွေ ထိတွေ့ကိုင်တွယ် ကစားတဲ့ ရောင်စုံသဲတွေကို ပြန်လည် သိမ်းဆည်းဖို့ စီစဉ်ထားပါတယ်။

တချို့ သဲထုပ်တွေထဲမှာ ကျောက်ဂွမ်းမှုန် ရောနှောပါဝင်နေကြောင်း အထောက်အထားတွေ တွေ့ရှိခဲ့တဲ့နောက် အဲဒီပစ္စည်းတွေကို ပြန်လည် သိမ်းယူဖို့ ပြီးခဲ့တဲ့ သီတင်းပတ်ကုန် ကတည်းက စတင် လုပ်ဆောင်နေပါတယ်။

ကျောက်ဂွမ်းမှုန်တွေဟာ ရေရှည်ထိတွေ့မှု ရှိနေရင် အသက်ရှူ လမ်းကြောင်းကို ဒုက္ခပေးနိုင်ပြီး အဆုတ်နာ၊ အဆုတ်ကင်ဆာ ရောဂါတွေကို ဖြစ်ပွားစေနိုင်ပါတယ်။ ဒါပေမဲ့ လက်ရှိ အခြေအနေမှာတော့ ရောင်စုံသဲတွေထဲက ကျောက်ဂွမ်းတွေဟာ လေထုထဲ ပျံ့နှံ့ပြီး အသက်ရှူ လမ်းကြောင်းထဲ ဝင်ရောက်ဖို့အထိ ဖြစ်နိုင်ခြေ အရမ်းနည်းတယ်လို့ ဩစတြေးလျ စျေးကွက်ပြိုင်ဆိုင်မှုနှင့် သုံးစွဲသူရေးရာ ကော်မရှင် (ACCC)က မှတ်ချက်ပေးထားပါတယ်။

Public Service Announcement

ကျောင်းတွေမှာရှိတဲ့ ရောင်စုံသဲတွေကို စစ်ဆေးတာ၊ လိုအပ်သလို ပြန်လည်သိမ်းယူ လဲလှယ်တာတွေ လုပ်ဖို့ဆိုရင် ရက်ပိုင်းလောက် အချိန်ယူရမယ်လို့ ACTရဲ့ ပညာရေးဝန်ကြီး ဗက်ဗ်တေးဘယ်ရီက ပြောကြားခဲ့ပါတယ်။

ကျောင်းတွေဆီ ရောင်းချထားတဲ့ ကစားစရာ ရောင်စုံသဲတွေထဲမှာ ကျောက်ဂွမ်းပါဝင်နိုင်တယ်ဆိုတဲ့ သတိပေးချက်ကြောင့် နိုဝင်ဘာ ၁၄ ရက်နေ့ ကတည်းက ဩစတြေးလျနဲ့ နယူးဇီလန်တို့မှာ ကျောင်းတချို့ကို အပြည့်အဝ၊ ဒါမှမဟုတ် အချိန်ပိုင်း ပိတ်ခဲ့ရပါသေးတယ်။

ACTမှာ ရှိနေတဲ့ ကျောင်း ၂၃ ခုကတော့ အဲဒီသဲတွေကို မသုံးတာ၊ ဒါမှမဟုတ် အရမ်း အနည်းအကျဉ်းသာ အသုံးပြုတာတွေကြောင့် နိုဝင်ဘာ ၁၇ ရက်နေ့မှာ ပိတ်ထားမှာ မဟုတ်ပါဘူး။

အဓိက ပြန်လည် သိမ်းယူနေတဲ့ ထုတ်ကုန်ကတော့ Active Sandtubဆိုတဲ့ နာမည်နဲ့ ထုတ်လုပ်ထားပြီး သဲရဲတိုက်လေးတွေနဲ့ တခြား ပုံစံတွေ ဆောက်လုပ်လို့ရတဲ့ ရောင်စုံသဲထုပ်တွေ ဖြစ်ပါတယ်။

ကျောက်ဂွမ်းတွေကို အရင်က ဆောက်လုပ်ရေး လုပ်ငန်းခွင်တွေမှာ ကျယ်ကျယ်ပြန့်ပြန့် သုံးစွဲတာမျိုး ရှိခဲ့ဖူးပေမယ့် အခုတော့ ဩစတြေးလျနဲ့ နယူးဇီလန် ဥပဒေတွေအရ အဲဒီ ပစ္စည်းရောနှောပါဝင်တဲ့ ထုတ်ကုန် အားလုံးကို တားမြစ်ထားကြောင်း သိရပါတယ်။

ကိုးကား: BBC