ကမ္ဘောဒီးယား နိုင်ငံမှာ လူတစ်ဦး ကြက်ငှက်တုပ်ကွေး ရောဂါကြောင့် သေဆုံးသွားကြောင်း သိရပါတယ်။
နိုဝင်ဘာ ၁၆ ရက်နေ့က ကျန်းမာရေး ဝန်ကြီးဌာနရဲ့ သတင်းထုတ်ပြန်ချက်ထဲမှာတော့ ဖနွမ်ပင်မှာရှိတဲ့ ချာရွိုင်ချန်ဗာ ခရိုင်မှာ အသက် ၂၂ နှစ်အရွယ် လူငယ်တစ်ဦးဟာ H5N1 ကြက်ငှက်တုပ်ကွေး ဗိုင်းရပ်စ် ကူးစက်ခံရပြီး သေဆုံးခဲ့တယ်လို့ ဖော်ပြထားခဲ့ပါတယ်။
လူနာဟာ အဖျားတက်တာ၊ ချောင်းဆိုးတာ၊ အားအင်ကုန်ခမ်း နွမ်းနယ်တာ၊ အသက်ရှူ မွန်းကျပ်တာစတဲ့ ပြင်းထန်တဲ့ ကြက်ငှက်တုပ်ကွေး လက္ခဏာတွေ ပြသပြီး ကွယ်လွန်သွားခဲ့တယ်လို့လည်း ဆိုပါတယ်။
ဒီဖြစ်ရပ်အပြီး ရောဂါတားဆီး ထိန်းချုပ်ရေး အစီအမံတွေကို အပူတပြင်း အသက်သွင်းထားပြီး ကူးစက်မှုရဲ့ အရင်းအမြစ်ကို ရှာဖွေနေတယ်လို့လည်း ကျန်းမာရေး ဝန်ကြီးဌာနက ပြောပါတယ်။
Public Service Announcement
ပြီးတော့ သေဆုံးသူနဲ့ အနီးကပ် ထိတွေ့ခဲ့သူတွေကို တုပ်ကွေးတိုက်ဖျက် ဆေးဝါးတစ်မျိုးဖြစ်တဲ့ Tamifluတွေ ထောက်ပံ့ပေးထားကြောင်း သိရပါတယ်။
တကယ်လို့ ကြက်ငှက်တုပ်ကွေး လက္ခဏာလို့ ယူဆရတဲ့ နာမကျန်းမှုတွေ ခံစားလာရရင် နီးစပ်ရာ ကျန်းမာရေး ဌာနတွေဆီ ချက်ချင်း ဆက်သွယ်ဖို့လည်း အာဏာပိုင်တွေက သတိပေးထားပါတယ်။
ကြက်ငှက်တုပ်ကွေး ဖြစ်ပွားစေတဲ့ H5N1 ဗိုင်းရပ်စ်ဟာ ရောဂါဖြစ်နေတဲ့ ကြက်ငှက်တွေကနေတဆင့် လူအပါအဝင် နို့တိုက်သတ္တဝါတွေဆီ ကူးစက်နိုင်ပါတယ်။ ဗိုင်းရပ်စ်ကြောင့် ခံစားရတဲ့ ရောဂါလက္ခဏာတွေက ပြင်းထန်လေ့ ရှိသလို အသက်အန္တရာယ်ကိုပါ ထိခိုက်နိုင်ကြောင်းလည်း ကျန်းမာရေး ပညာရှင်တွေက ပြောကြားထားပါတယ်။
ကိုးကား: Khmer Times
